ಕಳೆದ 7 ತಿಂಗಳಲ್ಲಿ ಬರೋಬ್ಬರಿ ಶೇ.40ರಷ್ಟು ಏರಿಕೆಯಾದ ಚಿನ್ನದ ದರ

ಮುಂಬಯಿ: ಈ ವರ್ಷ ಚಿನ್ನದ ದರವು 40% ಏರಿಕೆಯಾಗಿದೆ. ಸದ್ಯದ ಲೆಕ್ಕಾಚಾರಗಳ ಪ್ರಕಾರ, ದೀಪಾವಳಿ ಹೊತ್ತಿಗೆ 10 ಗ್ರಾಮ್‌ ಶುದ್ಧ ಬಂಗಾರದ ದರ 70,000 ರೂ. ಮುಟ್ಟಬಹುದು. ಪ್ರತಿದಿನವೂ ದಾಖಲೆ ಮಟ್ಟಕ್ಕೆ ಚಿನ್ನ ಏರುತ್ತಲೇ ಇದ್ದು, ಮುಂದಿನ ದಿನಗಳಲ್ಲೂ ಇದೇ ವೇಗವನ್ನು ನಿರೀಕ್ಷಿಸಲಾಗಿದೆ. ಕಳೆದ ಶುಕ್ರವಾರವಷ್ಟೇ ರಾಷ್ಟ್ರ ರಾಜಧಾನಿ ಹೊಸದಿಲ್ಲಿಯಲ್ಲಿ ಚಿನ್ನದ ದರ ರೂ.57,000 ಮಟ್ಟವನ್ನು ದಾಟಿತ್ತು.

ಜೆಪಿ ಮೋರ್ಗಾನ್‌ ವರದಿ ಪ್ರಕಾರ, ದೀಪಾವಳಿ ಹೊತ್ತಿಗೆ 70,000 ರೂ. ಮುಟ್ಟಲಿದೆ. ಜಾಗತಿಕ ಆರ್ಥಿಕ ಕುಸಿತವು ಕೊನೆಯಾಗುವ ಲಕ್ಷಣಗಳು ಸದ್ಯಕ್ಕೆ ಕಾಣಿಸುತ್ತಿಲ್ಲ. ಒಂದು ವೇಳೆ ಕೋವಿಡ್‌-19 ಬಿಕ್ಕಟ್ಟು ತಿಳಿಯಾದರೂ, ಆರ್ಥಿಕ ಹಿನ್ನಡೆ ಮುಂದುವರಿಯಲಿದೆ. ಇಂಥ ಪರಿಸ್ಥಿತಿಯಲ್ಲಿ ಸುರಕ್ಷಿತ ಹೂಡಿಕೆಯಾದ ಚಿನ್ನಕ್ಕೆ ಬೇಡಿಕೆ ಏರಲಿದೆ. ಮುಂದಿನ ದಿನಗಳಲ್ಲಿ ದರ ಇನ್ನಷ್ಟು ಹೆಚ್ಚಾಗಲಿದೆ ಎನ್ನುವುದು ಜಾಗತಿಕ ಮಾರುಕಟ್ಟೆ ತಜ್ಞರ ಅಂದಾಜು.

ದರ ಏರಿಕೆಗೆ ಏನು ಕಾರಣ?
ಕೋವಿಡ್‌-19 ಹಿನ್ನೆಲೆಯಲ್ಲಿ ಜಾಗತಿಕ ಆರ್ಥಿಕತೆಯು ಅನಿಶ್ಚಿತವಾಗಿದೆ. ಸುರಕ್ಷಿತ ಹೂಡಿಕೆಯಾಗಿ ಚಿನ್ನ, ಬೆಳ್ಳಿಯತ್ತ ಜನ ಗಮನ ಹರಿಸಿದ್ದಾರೆ. ಡಾಲರ್‌ ದರ ಕುಸಿತವೂ ಈ ಲೋಹಗಳ ದರ ಏರಿಕೆಗೆ ಪೂರಕವಾಗಿದೆ. ಜುಲೈನಲ್ಲಿ ಡಾಲರ್‌ ಮೌಲ್ಯವು ಶೇ.5ರಷ್ಟು ಕಳೆದುಕೊಂಡಿದೆ.

ರಾಜ್ಯದಲ್ಲಿ ಅಲ್ಪ ಇಳಿಕೆ ಕಂಡ ಬಂಗಾರದ ಬೆಲೆ, ಇಂದಿನ ಬೆಲೆ ವಿವರ ಇಲ್ಲಿದೆ

ದಶಕಗಳಲ್ಲಿಯೇ ಇದು ದೊಡ್ಡ ಕುಸಿತ. ಚೀನಾದೊಂದಿಗಿನ ವಾಣಿಜ್ಯ ಸಂಘರ್ಷ, ಹೆಚ್ಚುತ್ತಿರುವ ನಿರುದ್ಯೋಗ, ಕೋವಿಡ್‌ನ ದೊಡ್ಡ ಹೊಡೆತದಿಂದ ಅಮೆರಿಕ ಕಂಗೆಟ್ಟಿದೆ. ಡಾಲರ್‌ ಕುಸಿದಷ್ಟೂ ಇತರೆ ದೇಶಗಳ ಕರೆನ್ಸಿಗಳ ಮೌಲ್ಯ ಹೆಚ್ಚುತ್ತದೆ.

ಇದು ಚಿನ್ನದ ದರ ಏರಿಕೆಗೆ ಕಾರಣವಾಗುತ್ತದೆ ಎನ್ನುತ್ತಾರೆ ಮಾರುಕಟ್ಟೆ ತಜ್ಞರು. ಕಳೆದ ವಾರವಷ್ಟೇ ಅಮೆರಿಕದ ಕ್ರೆಡಿಟ್‌ ಮುನ್ನೋಟವನ್ನು 'ಸ್ಥಿರ' ದಿಂದ 'ನಕಾರಾತ್ಮಕ' ಎಂದು ಫಿಚ್‌ ರೇಟಿಂಗ್‌ ಏಜೆನ್ಸಿ ಬದಲಿಸಿದೆ. ಇದು ಜಾಗತಿಕ ಹೂಡಿಕೆದಾರರ ಮೇಲೆ ಪ್ರಭಾವ ಬೀರಲಿದೆ.