ITR Filing Deadline: ಇನ್‌ಕಮ್‌ ಟ್ಯಾಕ್ಸ್‌ ಸಲ್ಲಿಕೆಗೆ ಆಗಸ್ಟ್‌ 31ರವರೆಗೆ ಗಡುವು ವಿಸ್ತರಣೆ

ಹೊಸದಿಲ್ಲಿ: ಆದಾಯ ತೆರಿಗೆ ರಿಟರ್ನ್ಸ್ ಸಲ್ಲಿಕೆಗೆ ಆದಾಯ ತೆರಿಗೆ ಇಲಾಖೆ ನಿಗದಿಪಡಿಸಿದ್ದ ಜುಲೈ 31ರ ಗಡುವನ್ನು ಗುರುವಾರ ಕೆಲ ವಿಭಾಗಗಳಿಗೆ ವಿಸ್ತರಿಸಿದ್ದು, ಆಗಸ್ಟ್‌ 31ರವರೆಗೆ ಸಲ್ಲಿಸಲು ಅವಕಾಶ ಕಲ್ಪಿಸಲಾಗಿದೆ.

ಹಣಕಾಸು ಸಚಿವಾಲಯ ಈ ಸಂಬಂಧ ಹೇಳಿಕೆ ನೀಡಿದ್ದು, ಕೇಂದ್ರೀಯ ನೇರ ತೆರಿಗೆ ಮಂಡಳಿಯು ಐಟಿಆರ್ ಸಲ್ಲಿಕೆಗೆ ನಿಗದಿಪಡಿಸಿದ್ದ ಕೊನೆ ದಿನಾಂಕವನ್ನು ಒಂದು ತಿಂಗಳ ಕಾಲ ಮುಂದೂಡಿದೆ. ಈ ಮೊದಲು 31 ಜುಲೈ 2018 ಕೊನೆ ದಿನಾಂಕವಾಗಿದ್ದರೆ, ಪರಿಷ್ಕೃತ ಆದೇಶದ ಪ್ರಕಾರ 31 ಆಗಸ್ಟ್‌ 2018 ಐಟಿ ರಿಟರ್ನ್ಸ್ ಸಲ್ಲಿಸಲು ಕೊನೆಯ ದಿನಾಂಕವಾಗಿರುತ್ತದೆ.


ಇದರಿಂದ ತೆರಿಗೆ ಪಾವತಿದಾರರಿಗೆ ಅನುಕೂಲವಾಗಲಿದೆ. ಐಟಿಆರ್ ಸಲ್ಲಿಕೆ ಸಂಬಂಧ ಈಗಾಗಲೇ ಸೂಚನೆ ಹೊರಡಿಸಿದ್ದ ಐಟಿ ಇಲಾಖೆ, ನಿಗದಿತ ದಿನಾಂಕದ ನಂತರದ ಪಾವತಿಗೆ 5,000 ರೂ. ವರೆಗೆ ದಂಡ ವಿಧಿಸಲಾಗುತ್ತದೆ ಎಂದಿತ್ತು. ಅಲ್ಲದೆ ಕೊನೆ ಕ್ಷಣದವರೆಗೆ ಕಾದರೆ, ತಾಂತ್ರಿಕ ಸಮಸ್ಯೆ ಎದುರಾಗಿ ಜನರು ತೊಂದರೆ ಅನುಭವಿಸುವ ಸಾಧ್ಯತೆಯೂ ಇತ್ತು. ಇದೀಗ ದಿನಾಂಕ ವಿಸ್ತರಣೆಯಾಗಿರುವುದು ತೆರಿಗೆದಾರರಿಗೆ ಕೊಂಚ ನೆಮ್ಮದಿ ತರಲಿದೆ.