ಐಟಿ ರಿಟರ್ನ್ಸ್‌ ಸಲ್ಲಿಕೆಗೆ ದಿನಾಂಕ ವಿಸ್ತರಣೆ: ಅ. 15 ಕೊನೇ ದಿನ

ಹೊಸದಿಲ್ಲಿ: ಆದಾಯ ತೆರಿಗೆ ಮರುಪಾವತಿ (ಐಟಿ ರಿಟರ್ನ್ಸ್‌) ಸಲ್ಲಿಕೆಗೆ ಕೊನೆ ದಿನಾಂಕವನ್ನು ಅ. 15ರವರೆಗೆ ವಿಸ್ತರಿಸಿ ಆದಾಯ ತೆರಿಗೆ ಇಲಾಖೆ ಆದೇಶ ಹೊರಡಿಸಿದೆ.

ಐಟಿ ರಿಟರ್ನ್ಸ್‌ ಜತೆಗೆ 2017-18ನೇ ಹಣಕಾಸು ವರ್ಷದ ಆಡಿಟ್ ವರದಿಯನ್ನು ಕೂಡ ಸಲ್ಲಿಸಲು ಅ. 15 ಕೊನೇ ದಿನವಾಗಿರುತ್ತದೆ. ತೆರಿಗೆದಾರರ ಮನವಿ ಮೇರೆಗೆ ದಿನಾಂಕ ವಿಸ್ತರಿಸಲು ಕೇಂದ್ರ ನೇರ ತೆರಿಗೆ ಮಂಡಳಿ ಸಮ್ಮತಿಸಿದ್ದು. ಸೋಮವಾರ ದಿನಾಂಕ ವಿಸ್ತರಿಸಿ ಆದೇಶ ಹೊರಡಿಸಿದೆ.

ಈ ಮೊದಲು ಆ. 31 ಐಟಿ ರಿಟರ್ನ್ಸ್‌ ಸಲ್ಲಿಸಲು ಕೊನೆಯ ದಿನವಾಗಿತ್ತು. ನಂತರ ತೆರಿಗೆದಾರರಿಗೆ ಸಮಸ್ಯೆಯಾಗುವುದನ್ನು ತಪ್ಪಿಸಲು ದಿನಾಂಕ ವಿಸ್ತರಿಸಿ ಸೆ. 30ರವರೆಗೆ ಅವಕಾಶ ಕಲ್ಪಿಸಲಾಗಿತ್ತು. ಆದರೆ ತಾಂತ್ರಿಕ ಅಡಚಣೆಗಳ ಕಾರಣ ನೀಡಿ ತೆರಿಗೆದಾರರು ಮತ್ತಷ್ಟು ಕಾಲಾವಕಾಶ ಕೋರಿದ್ದರು. ಹೀಗಾಗಿ ಮತ್ತೆ 15 ದಿನ ಸಮಯ ನೀಡಿದ್ದು, ಅ. 15ರವರೆಗೆ ತೆರಿಗೆದಾರರು ಐಟಿ ರಿಟರ್ನ್ಸ್‌ ಸಲ್ಲಿಸಬಹುದಾಗಿದೆ.

ಈ ಮೊದಲು ದತ್ತಾಂಶ ಬಿಡುಗಡೆ ಮಾಡಿದ್ದ ಕೇಂದ್ರ ನೇರ ತೆರಿಗೆ ಮಂಡಳಿ, ಆ. 31ರವರೆಗೆ ವೇತನ ಪಡೆಯುತ್ತಿರುವ ತೆರಿಗೆದಾರರು ಮತ್ತು ಇತರ ಆದಾಯ ಹೊಂದಿರುವವರು ಪಾವತಿಸುತ್ತಿರುವ ಪ್ರಮಾಣದಲ್ಲಿ ಶೇ. 71 ಏರಿಕೆ ಕಂಡು 5.42 ಕೋಟಿ ತಲುಪಿತ್ತು.