ಆದಾಯ ತೆರಿಗೆ ಸಂಗ್ರಹಣೆ ಹೆಚ್ಚಳ: ಮುಂಬಯಿ ಜತೆ ದಿಲ್ಲಿ ಸ್ಪರ್ಧೆ

ಹೊಸದಿಲ್ಲಿ: ಆದಾಯ ತೆರಿಗೆ ಸಂಗ್ರಹಣೆಯಲ್ಲಿ ಪ್ರಾದೇಶಿಕವಾರು ಅಂಕಿ-ಅಂಶಗಳನ್ನು ಗಮನಿಸಿದರೆ ದೇಶದ ಆರ್ಥಿಕ ವ್ಯವಸ್ಥೆಯಲ್ಲಿ ಭಾರೀ ಬದಲಾವಣೆಗಳು ಗೋಚರಿಸುತ್ತಿವೆ.

ಒಟ್ಟಾರೆ ಆದಾಯ ತೆರಿಗೆ ಸಂಗ್ರಹಣೆಯಲ್ಲಿ ದೇಶದ ವಾಣಿಜ್ಯ ರಾಜಧಾನಿಯಾಗಿರುವ ಮುಂಬಯಿಯ ಕೊಡುಗೆ ಶೇ 29ರಷ್ಟಿದೆ. ಆದರೆ ಒಂದು ವರ್ಷದಿಂದ ಮುಂಬಯಿಯ ಕೊಡುಗೆ ಕುಸಿಯುತ್ತಿದ್ದು, ರಾಷ್ಟ್ರೀಯ ರಾಜಧಾನಿ ದಿಲ್ಲಿಯ ಕೊಡುಗೆಯಲ್ಲಿ ಶೇ 45ರಷ್ಟು ಏರಿಕೆಯಾಗಿದೆ. (2017ರ ಏಪ್ರಿಲ್‌ನಿಂದ 2018ರ ನವೆಂಬರ್ 13ರ ವರೆಗೆ).

ಮುಂಬಯಿಯಲ್ಲಿ ಈ ಏರಿಕೆ ಪ್ರಮಾಣ ಕೇವಲ ಶೇ 5ರಷ್ಟಿದ್ದು, ಭಾರೀ ಮೊತ್ತದ ಹಿಂಪಾವತಿ (ರೀಫಂಡ್) ಯಿಂದಾಗಿ ಬೆಳವಣಿಗೆ ನಿಧಾನ ಗತಿಯಲ್ಲಿದೆ. ದಿಲ್ಲಿ ಪ್ರಾಂತ್ಯದಲ್ಲಿ ಆದಾಯ ತೆರಿಗೆ ಸಂಗ್ರಹಣೆ ಪ್ರಮಾಣ ಶೇ 16.5ರಷ್ಟು ಏರಿಕೆಯಾಗಿರುವುದು ಕಂಡುಬಂದಿದೆ.

ಚೆನ್ನೈ ಮತ್ತು ಕೋಲ್ಕೊತದಂತಹ ಸಣ್ಣ ಕೇಂದ್ರಗಳಲ್ಲಿ ಏಳೂವರೆ ತಿಂಗಳ ಅವಧಿಯಲ್ಲಿ ಒಂದಂಕಿಯ ಬೆಳವಣಿಗೆಯಷ್ಟೇ ದಾಖಲಾಗಿದೆ. 'ದೇಶಾದ್ಯಂತ ಮರುಪಾವತಿ ವಿಚಾರದಲ್ಲಿ ಇಲಾಖೆ ಕ್ರಿಯಾಶೀಲವಾಗಿ ಕೆಲಸ ಮಾಡುತ್ತಿದೆ. ಆದರೆ ಮುಂಬಯಿಯಲ್ಲಿ ರೀಫಂಡ್‌ ಪ್ರಮಾಣ ಅಧಿಕವಾಗಿದೆ' ಎಂದು ಅಧಿಕಾರಿಯೊಬ್ಬರು ತಿಳಿಸಿದರು.

ದಿಲ್ಲಿಯಲ್ಲಿ ರೀಫಂಡ್‌ ಕ್ಲೇಮುಗಳು ಹೆಚ್ಚಾಗಿಲ್ಲ. ಹೀಗಾಗಿ ಒಟ್ಟಾರೆ ತೆರಿಗೆ ಸಂಗ್ರಹಣೆ ಅಧಿಕವಾಗಿದೆ.