ಐಟಿಆರ್‌ ಅರ್ಜಿಗಳಲ್ಲಿ ಏನಿದೆ ಹೊಸತು?

ಹೊಸದಿಲ್ಲಿ: ಆದಾಯ ತೆರಿಗೆ ರಿಟರ್ನ್ಸ್‌ನ(ಐಟಿಆರ್‌) ಹೊಸ ಅರ್ಜಿಗಳಲ್ಲಿ ತೆರಿಗೆದಾರನ ಆದಾಯದ ವಿವಿಧ ಮೂಲಗಳ ಬಗ್ಗೆ ಮಾಹಿತಿಗಳನ್ನು ಕೇಳಲಾಗಿದೆ.

ಕೃಷಿ ಆದಾಯ ತೋರಿಸಿ ಹೆಚ್ಚು ತೆರಿಗೆ ವಿನಾಯಿತಿ ಪಡೆಯುವ ಮಂದಿ, ಕಂಪನಿಗಳ ಆಡಳಿತ ಮಂಡಳಿಯ ನಿರ್ದೇಶಕರು, ವಿದೇಶಿ ಆಸ್ತಿ ಅಥವಾ ಬ್ಯಾಂಕ್‌ ಖಾತೆಗಳನ್ನು ಹೊಂದಿದವರು, ಅನ್‌ಲಿಸ್ಟೆಡ್‌ ಕಂಪನಿಗಳಲ್ಲಿ ಷೇರು ಹೊಂದಿದವರು ಹೆಚ್ಚಿನ ಮಾಹಿತಿಯನ್ನು ಹೊಸ ಐಟಿಆರ್‌ ಅರ್ಜಿಗಳಲ್ಲಿ ನೀಡಬೇಕಾಗುತ್ತದೆ.

ವೇತನದಾರರ ಗಮನಕ್ಕೆ
ವಾರ್ಷಿಕ 50 ಲಕ್ಷ ರೂ. ವರೆಗಿನ ವೇತನ ಅಥವಾ ಪಿಂಚಣಿ ಹೊಂದಿದವರು ಭರ್ತಿ ಮಾಡಬೇಕಾದ ಸಹಜ್‌ ಅಥವಾ ಐಟಿಆರ್‌-1 ಅರ್ಜಿಗಳನ್ನು ಬಳಸುತ್ತಾರೆ. ವೇತನದಾರರು ತಮ್ಮ ಭತ್ಯೆಗಳು, ಮನೆ ಬಾಡಿಗೆ, ಪ್ರವಾಸ, ಮಕ್ಕಳ ಶಿಕ್ಷ ಣ ಮತ್ತಿತರ ವಿವರಗಳನ್ನು ಹೊಸ ಅರ್ಜಿಯಲ್ಲಿ ನೀಡಬೇಕು.

ಕೃಷಿ ಆದಾಯ ಹೇಗೆ?
ನೀವು ಕೃಷಿಯಿಂದ 5 ಲಕ್ಷ ರೂ.ಗೂ ಅಧಿಕ ಆದಾಯ ಪಡೆಯುತ್ತಿದ್ದರೆ, ಕೃಷಿ ಜಮೀನು ಇರುವ ಜಿಲ್ಲೆ ಮತ್ತು ಪಿನ್‌ಕೋಡ್‌, ಭೂಮಿಯ ಅಳತೆ, ನೀರಾವರಿ ಮತ್ತಿತರ ವಿವರಗಳನ್ನು ಹೊಸ ಐಟಿಆರ್‌ಗಳಲ್ಲಿ ತುಂಬಬೇಕಾಗುತ್ತದೆ.

2018-19ನೇ ಸಾಲಿನ ಆದಾಯ ತೆರಿಗೆ ರಿಟರ್ನ್ಸ್‌(ಐಟಿಆರ್‌) ಸಲ್ಲಿಕೆಗೆ ಜು.31 ಕಡೆಯ ದಿನವಾಗಿದೆ.

ಕಳೆದ ಹಣಕಾಸು ವರ್ಷ 2018-19ರ ಐಟಿಆರ್‌ ಅನ್ನು ಫೈಲ್‌ ಮಾಡಲು ನೀವು ಈಗಲೇ ಮುಂದಾಗಬಹುದು. ಮಂಗಳವಾರವಷ್ಟೇ ಆದಾಯ ತೆರಿಗೆ ಇಲಾಖೆಯು ಐಟಿಆರ್‌ ಫಾರ್ಮ್‌ 1(ಸಹಜ್‌) ಮತ್ತು ಐಟಿಆರ್‌-4(ಸುಗಮ್‌) ಅನ್ನು ಬಿಡುಗಡೆ ಮಾಡಿದೆ.

ಈ ಅರ್ಜಿಗಳು ಆದಾಯ ಇಲಾಖೆಯ ಇ-ಫೈಲಿಂಗ್‌ ವೆಬ್‌ಸೈಟ್‌ನಲ್ಲಿ ಲಭ್ಯವಿದ್ದು, ಉಳಿದ ಅರ್ಜಿಗಳು ಸದ್ಯದಲ್ಲಿಯೇ ಬಿಡುಗಡೆ ಮಾಡುವುದಾಗಿ ಇಲಾಖೆ ತಿಳಿಸಿದೆ.