ನಾನು ಬ್ರಿಟನ್‌ ನಿವಾಸಿ, ಭಾರತದಿಂದ ಓಡಿ ಬಂದವನಲ್ಲ: ಮಲ್ಯ

ಸಿಲ್ವರ್‌ಸ್ಟೋನ್‌: 'ನಾನು ಯಾವತ್ತೂ ಬ್ರಿಟನ್‌ ನಿವಾಸಿ, ಅನಿವಾಸಿ ಭಾರತೀಯ. ಹೀಗಿರುವಾಗ ನಾನು ಎಲ್ಲಿಗೆ ನಾನು ಮರಳಬೇಕು, ಓಡಿ ಹೋಗಿದ್ದೇನೆ ಎಂಬುದಕ್ಕೆ ಅರ್ಥವಿದೆಯೇ, ಇದೆಲ್ಲ ರಾಜಕೀಯಕ್ಕಾಗಿ ನಡೆಯುತ್ತಿರುವುದು ಎಂದು' ಭಾರತದಲ್ಲಿ ಬಹುಕೋಟಿ ಸುಸ್ತಿದಾರನಾಗಿ ಲಂಡನ್‌ನಲ್ಲಿ ವಾಸವಿರುವ ವಿಜಯ್‌ ಮಲ್ಯ ಹೇಳಿದ್ದಾರೆ.

ಚುನಾವಣೆ ಹತ್ತಿರ ಬರುತ್ತಿರುವುದರಿಂದ ಮತಗಳಿಕೆ ಉದ್ದೇಶಕ್ಕೆ ನನ್ನನ್ನು ಭಾರತಕ್ಕೆ ಕರೆಸಿ ಶಿಕ್ಷೆಗೆ ಗುರಿಪಡಿಸುವ ಉದ್ದೇಶವಿರುವಂತೆ ಕಾಣಿಸುತ್ತಿರುವುದಾಗಿ ಮಲ್ಯ ಹೇಳಿದ್ದಾರೆ.

ಬ್ರಿಟನ್‌ನಲ್ಲಿರುವ ತನ್ನ ಆಸ್ತಿಗಳನ್ನು ಜಪ್ತಿ ಮಾಡಿಕೊಳ್ಳುವಂತೆ ಮಲ್ಯ ಅವರು ಬ್ರಿಟನ್‌ ಜಾರಿ ನಿರ್ದೇಶನಾಲಯಗಳಿಗೆ ಮನವಿ ಮಾಡುತ್ತಿದ್ದೇನೆ, ಆಸ್ತಿ ಜಪ್ತಿಯಾದರೂ ಐಷಾರಾಮಿ ಬಂಗಲೆಯಲ್ಲಿ ವಾಸಕ್ಕೆ ಯಾವುದೇ ತೊಂದರೆಯಿಲ್ಲ ಎಂದು ಅವರು ಹೇಳಿದ್ದಾರೆ.

ಬ್ಯಾಂಕುಗಳಿಗೆ ಬಹುಕೋಟಿ ವಂಚನೆ ಮಾಡಿರುವುದಕ್ಕೆ ಸಂಂಧಿಸಿದಂತೆ ಮಲ್ಯ ಅವರನ್ನು ಹಸ್ತಾಂತರಿಸುವಂತೆ ಭಾರತ ಮಾಡಿರುವ ಮನವಿಯನ್ನು ಪರಿಶೀಲಿಸಿ ಬ್ರಿಟನ್ ಕೋರ್ಟ್‌ ಸೆಪ್ಟಂಬರ್‌ ಮೊದಲ ವಾರ ತೀರ್ಪು ಪ್ರಕಟಿಸಲಿದೆ.

ಬ್ರಿಟನ್‌ನಲ್ಲಿರುವ ತನ್ನ ಆಸ್ತಿಯನ್ನು ಸರಕಾರಕ್ಕೆ ನೀಡುತ್ತೇನೆ. ಆದರೆ ಇಲ್ಲಿ ಮಕ್ಕಳ ಹೆಸರಿನಲ್ಲಿರುವ ಐಷಾರಾಮಿ ಬಂಗಲೆಗಳು, ಲಂಡನ್‌ನಲ್ಲಿ ತಾಯಿಯ ಹೆಸರಿನಲ್ಲಿರುವ ನಿವಾಸಗಳನ್ನು ಯಾರೂ ಮುಟ್ಟುವಂತಿಲ್ಲ ಎಂದು ಮಲ್ಯ ಹೇಳಿದ್ದಾರೆ.

ಫಾರ್ಮುಲಾ ವನ್‌ ಬ್ರಾಂಡ್‌ ಪ್ರಿಕ್ಸ್‌ನಲ್ಲಿ ಫೋರ್ಸ್‌ ಇಂಡಿಯಾ ತಂಡದ ಸಹ ಸ್ಥಾಪಕರಾಗಿರುವ ವಿಜಯ್‌ ಮಲ್ಯ ರಾಯಿಟರ್ಸ್‌ ಜತೆ ಮಾತನಾಡಿದರು. ಮನೆ, ಕೆಲವು ಕಾರು, ಜ್ಯುವೆಲ್ಲರಿಯನ್ನು ಹಸ್ತಾಂತರಿಸುವುದಕ್ಕೆ ಸಂಬಂಧಿಸಿದ ಪ್ರಮಾಣಪತ್ರವನ್ನು ಸಲ್ಲಿಸಿದ್ದೇನೆ. ನನ್ನ ಹೆಸರಿನಲ್ಲಿರುವ ಆಸ್ತಿ ಜಪ್ತಿ ಮಾಡಬಹುದು, ಅದನ್ನು ಮೀರಿ ಏನೂ ಮಾಡಲಾಗದು ಎಂದು ಹೇಳಿದ್ದಾರೆ.