ಕೊರೊನಾ ಎಫೆಕ್ಟ್‌, ಈ ವರ್ಷ ದೇಶದ ಜಿಡಿಪಿ 0% - ಮೂಡೀಸ್‌

ಹೊಸದಿಲ್ಲಿ: ಪ್ರಸಕ್ತ ಹಣಕಾಸು ವರ್ಷ 2020-21ರಲ್ಲಿ ದೇಶದ ಜಿಡಿಪಿ ಯಾವುದೇ ಬೆಳವಣಿಗೆ ಕಾಣದೇ, ಶೂನ್ಯಕ್ಕೆ (ಶೇ. 0) ಕುಸಿಯಲಿದೆ ಎಂದು ಜಾಗತಿಕ ರೇಟಿಂಗ್‌ ಸಂಸ್ಥೆ ಮೂಡೀಸ್‌ ಇನ್ವೆಸ್ಟರ್ಸ್‌ ಸರ್ವೀಸ್‌ ‌ ಶುಕ್ರವಾರ ಹೇಳಿದೆ. ಆದಾಗ್ಯೂ, ಮುಂದಿನ ಹಣಕಾಸು ವರ್ಷ 2021-22ರಲ್ಲಿ ಜಿಡಿಪಿ ದರವು ಶೇ. 6.6ಕ್ಕೆ ಜಿಗಿಯಲಿದೆ ಎಂದು ಸಂಸ್ಥೆ ಅಂದಾಜು ಮಾಡಿದೆ.

ಕೋವಿಡ್‌-19 ಬಿಕ್ಕಟ್ಟಿನಿಂದಾಗಿ ಭಾರತದ ವಿತ್ತೀಯ ಕೊರತೆ ಹಿಗ್ಗಲಿದೆ. ಸರಕಾರದ ಸಾಲಗಳು ಮತ್ತು ಖರ್ಚುಗಳು ಹೆಚ್ಚಲಿವೆ. ಮೂಲ ಸೌಕರ್ಯ ಮತ್ತು ಇತರೆ ವಲಯಗಳು ನೆಲಕಚ್ಚಲಿದ್ದು, ಹಣಕಾಸು ವಲಯ ತತ್ತರಿಸಲಿದೆ ಎಂದು ಮೂಡೀಸ್‌ ಅಭಿಪ್ರಾಯಪಟ್ಟಿದೆ.

ಭಾರತದ ಆರ್ಥಿಕ ಪ್ರಗತಿ ಇತ್ತೀಚಿನ ವರ್ಷಗಳಲ್ಲಿ ಇಳಿಕೆಯಾಗುತ್ತಲೇ ಇದೆ. ಗ್ರಾಮೀಣ ಕುಟುಂಬಗಳ ಹಣಕಾಸು ಸ್ಥಿತಿ ಕುಗ್ಗುತ್ತಿದೆ. ಉತ್ಪಾದನೆ ಕಡಿಮೆಯಾಗಿದ್ದು, ಉದ್ಯೋಗ ಸೃಷ್ಟಿಯೂ ಆಗುತ್ತಿಲ್ಲ ಎಂದು ಮೂಡೀಸ್‌ ವರದಿಯಲ್ಲಿ ಹೇಳಲಾಗಿದೆ. ಡಿಸೆಂಬರ್‌ಗೆ ಅಂತ್ಯವಾಗುವ ಪ್ರಸಕ್ತ ವರ್ಷದ ಕ್ಯಾಲೆಂಡರ್‌ ವರ್ಷದಲ್ಲಿ ದೇಶದ ಜಿಡಿಪಿ ಶೇ.0.2ರಷ್ಟಿರಲಿದೆ ಎಂದು ಕಳೆದ ತಿಂಗಳು ಮೂಡೀಸ್‌ ಹೇಳಿತ್ತು. ಇದೀಗ ಅದಕ್ಕಿಂತಲೂ ಕೆಳಗಿರಲಿದೆ ಎಂದು ಹೇಳಿದ್ದು ಪರಿಸ್ಥಿತಿ ಇದೇ ರೀತಿ ಮುಂದುವರಿದರೆ ಆರ್ಥಿಕ ಹಿಂಜರಿತ ಕಾಣುವ ಸಾಧ್ಯತೆಗಳೂ ಇದೆ.