ಜಿಎಸ್‌ಟಿ ರೇಟ್ ಫೈಂಡರ್: ದರ ಪರಿಶೀಲನೆಗೆ ಆ್ಯಪ್‌ ಸೇವೆ

ಹೊಸದಿಲ್ಲಿ: ಸಾರ್ವಜನಿಕರು ಹಾಗೂ ಗ್ರಾಹಕರು ಸರಕು ಮತ್ತು ಸೇವಾ ತೆರಿಗೆ (ಜಿಎಸ್‌ಟಿ) ದರಗಳನ್ನು ಸುಲಭವಾಗಿ ತಿಳಿದುಕೊಳ್ಳಲು ಸರಕಾರ ಮೊಬೈಲ್ ಆ್ಯಪ್‌ ಬಿಡುಗಡೆ ಮಾಡಿದೆ.

ಈ ನೂತನ ಅಪ್ಲಿಕೇಶನ್‌ನ್ನು ಸೆಂಟ್ರಲ್ ಬೋರ್ಡ್ ಆಫ್ ಎಕ್ಸೈಸ್ ಮತ್ತು ಕಸ್ಟಮ್ (ಸಿಬಿಇಸಿ) ಅಭಿವೃದ್ದಿಪಡಿಸಿದೆ. ಜಿಎಸ್‌ಟಿ ಕುರಿತು ಸಮಗ್ರ ಮಾಹಿತಿಯನ್ನೊಳಗೊಂಡ ಜಿಎಸ್‌ಟಿ ರೇಟ್ ಫೈಂಡರ್ ಆ್ಯಪ್‌‌ನ್ನು ಗ್ರಾಹಕರು, ವರ್ತಕರು ಹಾಗೂ ವಿದ್ಯಾರ್ಥಿಗಳು ಸೇರಿದಂತೆ ಪ್ರತಿಯೊಬ್ಬರು ಸುಲಭವಾಗಿ ಬಳಸಬಹುದಾಗಿದೆ ಎಂದು ಸಿಬಿಇಸಿ ಅಧ್ಯಕ್ಷೆ ವನಜಾ ಸರ್ನಾ ಹೇಳಿದರು.

ಪ್ರಸ್ತುತ ಆಂಡ್ರಾಯ್ಡ್ ಪ್ಲಾಟ್‌ಫಾರ್ಮ್‌ನಲ್ಲಿ ಈ ಅಪ್ಲಿಕೇಶನ್ ಲಭ್ಯ ಇದೆ. ಶೀಘ್ರವೇ ಆ್ಯಪಲ್, ಐಓಎಸ್ ಫೋನ್‌ಗಳಲ್ಲಿಯೂ ಲಭ್ಯವಾಗಲಿದೆ ಎಂದು ಹಣಕಾಸು ಸಚಿವಾಲಯ ಹೇಳಿದೆ.

ಹಣಕಾಸು ಸಚಿವಾಲಯದ ಪ್ರಕಾರ, ಜಿಎಸ್‌ಟಿ ರೇಟ್ ಫೈಂಡರ್ ಅಪ್ಲಿಕೇಶನ್ ಡೌನ್‌ಲೋಡ್ ಮಾಡಿಕೊಂಡು ಬಳಿಕ ಆಫ್‌ಲೈನ್‌ನಲ್ಲಿಯೂ ಕೂಡ ಬಳಸಬಹುದಾಗಿದೆ.

ಈ ನೂತನ ಆ್ಯಪ್ ಮೂಲಕ ಸಿಜಿಎಸ್‌ಟಿ (ಕೇಂದ್ರ ಜಿಎಸ್‌ಟಿ), ಎಸ್‌ಜಿಎಸ್‌ಟಿ (ರಾಜ್ಯ ಜಿಎಸ್‌ಟಿ), ಯುಟಿಜಿಎಸ್‌ಟಿ ( ಯೂನಿಯನ್ ಟೆರಿಟರಿ ಜಿಎಸ್‌ಟಿ) ದರ ಹಾಗೂ ಪೂರೈಕೆ ಮೇಲಿನ ಸೆಸ್‌ದ ದರವನ್ನು ಸುಲಭವಾಗಿ ಕಂಡುಕೊಳ್ಳಬಹುದಾಗಿದೆ.