10 ರೂ. ನಾಣ್ಯಗಳನ್ನು ಹೊರುವುದಕ್ಕೆ ಸಿದ್ಧವಿಲ್ಲದ ಜನ, ಬ್ಯಾಂಕ್‌ಗಳಿಗೆ ಹೊರೆ!

ಬೆಂಗಳೂರು: ನಗರದ ಬ್ಯಾಂಕ್‌ಗಳಲ್ಲಿ 10 ರೂ.ಗಳ ನಾಣ್ಯಗಳ ಜಮೆ ಪ್ರಮಾಣ ಹೆಚ್ಚಾಗಿದೆ. ಜನಗಳು, ಹೋಟೆಲ್‌ ಮಾಲೀಕರು, ಅಂಗಡಿ ಮಾಲೀಕರು 10 ರೂ. ನಾಣ್ಯವನ್ನು ಸ್ವೀಕರಿಸಲು ಹಿಂದೇಟು ಹಾಕುತ್ತಿರುವ ಕಾರಣ ಬ್ಯಾಂಕ್‌ಗೆ ತಂದು ಜಮೆ ಮಾಡುತ್ತಿರುವವರ ಸಂಖ್ಯೆ ಹೆಚ್ಚಾಗಿದೆ.

ಹೋಟೆಲ್‌ ಉದ್ಯಮದ ಅಗತ್ಯತೆಗಳ ಪೂರೈಕೆಗಾಗಿ ಪ್ರತಿವರ್ಷ ಭಾರತೀಯ ರಿಸರ್ವ್‌ ಬ್ಯಾಂಕ್‌ ರೂ. 1,2, 5 ಮತ್ತು 10ರ ಹೊಸ ನಾಣ್ಯಗಳನ್ನು ಬಿಡುಗಡೆ ಮಾಡುತ್ತದೆ. ಜನವರಿಯಲ್ಲಿ ಬಿಡುಗಡೆಯಾದ ನಾಣ್ಯಗಳ ಪೈಕಿ ಶೇ.50ರಷ್ಟು 10 ರೂ. ನಾಣ್ಯಗಳಾಗಿವೆ.

ಒಂದೆಡೆ ಆರ್‌ಬಿಐ, ಮತ್ತೊಂದೆಡೆ ಸುಪ್ರೀಂ ಕೋರ್ಟ್‌ 10 ರೂ. ನಾಣ್ಯವನ್ನು ಕಡ್ಡಾಯವಾಗಿ ಸ್ವೀಕರಿಸಬೇಕು, ತಿರಸ್ಕರಿಸುವುದು ಅಪರಾಧ ಎಂದಿದ್ದರೂ ಸ್ವೀಕರಿಸಲು ಹಿಂದೇಟು ಹಾಕುತ್ತಿರುವವರೇ ಹೆಚ್ಚು.

ತಮ್ಮ ವಹಿವಾಟುಗಳನ್ನು ಅವಲಂಬಿಸಿ ಸೀಮಿತ ಮೊತ್ತದ ನಾಣ್ಯ ಸಂಗ್ರಹಿಸಲು ಬ್ಯಾಂಕ್‌ಗಳಿಗೆ ಅವಕಾಶವಿದೆ. ಆದರೆ ಈಗಾಗಲೇ 10 ರೂಪಾಯಿ ನಾಣ್ಯದ ಸಂಗ್ರಹ
25% ನಗದು ಮಿತಿಯನ್ನು ಮೀರಿರುವುದು ಬ್ಯಾಂಕ್‌ಗಳಿಗೆ ತಲೆನೋವಾಗಿ ಪರಿಣಮಿಸಿದೆ.

ಸಾಮಾನ್ಯವಾಗಿ ಬ್ಯಾಂಕ್‌ಗಳಲ್ಲಿ 50,000 ರೂ. ಮೌಲ್ಯದ ನಾಣ್ಯಗಳನ್ನು ಇರಿಸಿಕೊಳ್ಳಬಹುದು. ಅದಕ್ಕಿಂತ ಹೆಚ್ಚಿನ ಮೊತ್ತವನ್ನು ನಾಣ್ಯಗಳ ರೂಪದಲ್ಲಿ ಸಂಗ್ರಹಿಸಿಟ್ಟುಕೊಳ್ಳುಂತಿಲ್ಲ. ಆದರೆ ಕೆಲವು ಬ್ಯಾಂಕ್‌ಗಳಲ್ಲಿ ಸಂಗ್ರಹಗೊಂಡ 10 ರೂ. ನಾಣ್ಯಗಳ ಒಟ್ಟು ಮೊತ್ತ ರೂ. 8 ಲಕ್ಷ ಎನ್ನಲಾಗಿದೆ.

10 ರೂ. ನಾಣ್ಯಗಳ ಚಲಾವಣೆ ಬಗ್ಗೆ ಜನರಲ್ಲಿ ಅರಿವು ಮೂಡಿಸಲು ಆರ್‌ಬಿಐ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ಬ್ಯಾಂಕ್‌ ಅಧಿಕಾರಿಗಳು ಅಭಿಪ್ರಾಯ ವ್ಯಕ್ತ ಪಡಿಸಿದ್ದಾರೆ.