ಈ ವರ್ಷ ಐಟಿ ಕ್ಷೇತ್ರದಲ್ಲಿ 2 ಲಕ್ಷ ಉದ್ಯೋಗವಕಾಶ

ಹೊಸದಿಲ್ಲಿ: ಹೊಸ ನೇಮಕಾತಿ ವಿಚಾರದಲ್ಲಿ 2017ನೇ ವರ್ಷ ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ಸಾಕಷ್ಟು ನಿರಾಸೆ ಮೂಡಿಸಿತು. ಆದರೆ 2018ನೇ ವರ್ಷ ಆಶಾಭಾವನೆಯಿಂದ ಕೂಡಿದೆ. ಈ ವರ್ಷ ಐಟಿ ನೇಮಕಾತಿಯಲ್ಲಿ ಹೆಚ್ಚಳವಾಗಲಿದೆ ಎಂದು ಮಾನವ ಸಂಪನ್ಮೂಲ ನೇಮಕಾತಿ ಕಂಪೆನಿಗಳು ಅಂದಾಜಿಸಿವೆ. ದೇಶದ ಐಟಿ ಕ್ಷೇತ್ರ ಈ ವರ್ಷ 2 ಲಕ್ಷ ಮಂದಿಗೆ ಉದ್ಯೋಗ ಕಲ್ಪಿಸಲಿದೆ ಎಂದು ಟೀಮ್‌ಲೀಸ್ ಸರ್ವಿಸಸ್ ಕಂಪೆನಿ ಅಂದಾಜು ಮಾಡಿದೆ.

ಕೃತಕ ಬುದ್ಧಿಮತ್ತೆ (ಎಐ) ಬಳಕೆಯಲ್ಲಿ ಹೆಚ್ಚಳವಾಗಿರುವುದು ಇದಕ್ಕೆ ಮುಖ್ಯ ಕಾರಣ ಎಂದು ತಿಳಿಸಿದೆ. ಆದರೆ ತಮ್ಮ ಉದ್ಯೋಗ ಉಳಿಸಿಕೊಳ್ಳಬೇಕಾದರೆ ಹೊಸ ಕೌಶಲ್ಯಗಳನ್ನು ಕಲಿಯುವುದು ಕೆಲವು ಉದ್ಯೋಗಿಗಳಿಗೆ ಕಡ್ಡಾಯ ಎಂದು ಸೂಚಿಸಿದೆ. ಕೆಲವು ಕ್ಷೇತ್ರಗಳಲ್ಲಿ ಮಾತ್ರ ಯಾಂತ್ರೀಕೃತ (ಆಟೋಮೇಷನ್) ತಂತ್ರಜ್ಞಾನದಿಂದ ಉದ್ಯೋಗವಕಾಶಗಳು ಕಡಿಮೆಯಾಗುತ್ತವೆಂದು ತಿಳಿಸಿದೆ. ಮೊಬೈಲ್ ತಯಾರಿ, ಆರ್ಥಿಕ ಸೇವೆಗಳ ತಂತ್ರಜ್ಞಾನ, ಫಿನ್‌ಟೆಕ್ (ಫೈನಾನ್ಶಿಯಲ್‌ ಟೆಕ್ನಾಲಜಿ), ನವೋದ್ಯಮದಲ್ಲಿ ಅವಕಾಶಗಳು ಉತ್ತಮವಾಗಿರುತ್ತವೆ ಎಂದು ಹೇಳಿದೆ.

ಆರ್ಥಿಕ ಸೇವಾ ಕ್ಷೇತ್ರ ಸುಧಾರಣೆಯಾಗಿರುವುದು, ಡಿಜಿಟಲ್ ವಹಿವಾಟಿನಲ್ಲಿ ಹೆಚ್ಚಳ, ಡಿಜಿಟಲೀಕರಣ, ಯಾಂತ್ರೀಕರಣ ಕ್ಷೇತ್ರದಲ್ಲಿ ಬಂಡವಾಳ ಹೂಡಿಕೆ ಹೆಚ್ಚಿರುವಂತಹ ವ್ಯಾಪಾರದ ಅಭಿವೃದ್ಧಿಗೆ ಸಹಕರಿಸುತ್ತವೆ ಎಂದು ಟೀಮ್‍ಲೀಸ್ ಸರ್ವಿಸಸ್ ಐಟಿ ನೇಮಕಾತಿ ವಿಭಾಗದ ಜನರಲ್ ಮ್ಯಾನೇಜರ್ ಅಲ್ಕಾ ಧಿಂಗ್ರಾ ತಿಳಿಸಿದ್ದಾರೆ.

ಈ ವರ್ಷ ಹೊಸದಾಗಿ ಉದ್ಯೋಗ ಕಲ್ಪಿಸುವ ಕಂಪೆನಿಗಳು ಶೇ.20ರಷ್ಟು ಹೆಚ್ಚಾಗಲಿದ್ದು, ಪ್ರತಿಫಲವಾಗಿ 1.8-2.0 ಲಕ್ಷ ಉದ್ಯೋಗವಕಾಶಗಳು ಸಿಗಬಹುದೆಂದು ಅಂದಾಜಿಸಲಾಗಿದೆ. ಡಿಜಿಟಲೀಕರಣಕ್ಕಾಗಿ ಡಿಜಿಟಲ್ ತಂತ್ರಜ್ಞಾನದಲ್ಲಿ ಪ್ರಾವೀಣ್ಯತೆಯುಳ್ಳ ಶೇ.50 ಮಂದಿ ಹೆಚ್ಚುವರಿಯಾಗಿ ಅಗತ್ಯವಿದೆ ಎಂದಿದ್ದಾರೆ. 2030ರ ವೇಳೆಗೆ ಅಂತಾರಾಷ್ಟ್ರೀಯ ಕೃತಕ ಬುದ್ಧಿಮತ್ತೆ ಕ್ಷೇತ್ರವೊಂದೇ 23 ಲಕ್ಷ ಉದ್ಯೋಗವಕಾಶಗಳನ್ನು ಕಲ್ಪಿಸಲಿದೆ.

ಹೊಸ ತರಹದ ತಂತ್ರಜ್ಞಾನದ ಬಳಕೆಗೆ ಡಿಜಿಟಲ್ ಕೌಶಲ್ಯವುಳ್ಳ ಉದ್ಯೋಗಿಗಳೂ ಅಗತ್ಯ ಎಂದು ಅಡೋಬ್ ಇಂಡಿಯಾ ಉಪಾಧ್ಯಕ್ಷ ಅಬ್ದುಲ್ ಜಲೀಲ್ ಹೇಳಿದ್ದಾರೆ. ಅನುಭವ, ಅಧಿಕ ಕೌಶಲ್ಯವುಳ್ಳ ಉದ್ಯೋಗಿಗಳನ್ನು ಕಾಪಾಡಿಕೊಳ್ಳುವುದು ಕಂಪೆನಿಗಳಿಗೆ ಸವಾಲಾಗಿ ಬದಲಾಗಿದೆ ಎಂದಿದ್ದಾರೆ.