ಸೆನ್ಸೆಕ್ಸ್ 699 ಅಂಕ ಪತನ

ಮುಂಬಯಿ: ಮುಂಬಯಿ ಷೇರು ಮಾರುಕಟ್ಟೆ ಸಂವೇದಿ ಸೂಚ್ಯಂಕ ಸೆನ್ಸೆಕ್ಸ್ ಶುಕ್ರವಾರ 699 ಅಂಕ ಪತನಕ್ಕೀಡಾಯಿತು. ಕಳೆದ 9 ತಿಂಗಳಿನಲ್ಲಿಯೇ ಒಂದು ದಿನದ ವಹಿವಾಟಿನಲ್ಲಿ ಅತಿ ದೊಡ್ಡ ಕುಸಿತ ಇದಾಗಿದೆ. ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ತೆಗೆದುಕೊಳ್ಳಲಿರುವ ಆರ್ಥಿಕ ಸುಧಾರಣಾ ನೀತಿಗಳು ಪ್ರಗತಿಪರ ರಾಷ್ಟ್ರಗಳಿಗೆ ಮಾರಕವಾಗಬಹುದು ಎಂಬ ಹೂಡಿಕೆದಾರರ ಆತಂಕ ಷೇರು ಸೂಚ್ಯಂಕ ಪತನಕ್ಕೆ ಕಾರಣವಾಯಿತು.

ಗುರುವಾರ ಚೇತರಿಸಿದ್ದ ಸೆನ್ಸೆಕ್ಸ್ ಶುಕ್ರವಾರ ಮತ್ತೆ ಕುಸಿದಿದ್ದು, ಏಷ್ಯಾದ ಮಾರುಕಟ್ಟೆಗಳ ದುರ್ಬಲ ಪರಿಸ್ಥಿತಿ ಮತ್ತು ಅಮೆರಿಕದಲ್ಲಿ ಬಾಂಡ್‌ಗಳ ಉತ್ಪತ್ತಿಯಲ್ಲಿ ಏರಿಕೆಯಾಗಿರುವುದು ಕೂಡ ನಕಾರಾತ್ಮಕ ಪ್ರಭಾವ ಬೀರಿತು ಎಂದು ಹೇಳಲಾಗಿದೆ.

ಸೆನ್ಸೆಕ್ಸ್ 698.86 ಅಂಕ ಕಳೆದುಕೊಂಡು 26,777.18ಕ್ಕೆ ಸ್ಥಿರವಾದರೆ, ನಿಫ್ಟಿ 229.45 ಅಂಕ ನಷ್ಟಕ್ಕೀಡಾಗಿ, 8,296.30ಕ್ಕೆ ಸ್ಥಿರವಾಯಿತು.

ಡೊನಾಲ್ಡ್ ಟ್ರಂಪ್ ಅವರು ಭಾರಿ ವೆಚ್ಚದ ಯೋಜನೆಗಳನ್ನು ಹಮ್ಮಿಕೊಂಡಿದ್ದು, ಇದರಿಂದ ಹಣದುಬ್ಬರ ಹೆಚ್ಚಲಿದೆ ಮತ್ತು ಬಡ್ಡಿ ದರ ಏರಿಕೆಯ ಸಾಧ್ಯತೆ ಇದೆ. ಬಡ್ಡಿ ದರ ಏರಿಕೆಯಾದರೆ, ಪ್ರಗತಿಪರ ಆರ್ಥಿಕತೆಗಳಿಗೆ ಮಾರಕವಾಗಲಿದೆ ಎಂದು ಹೂಡಿಕೆದಾರರು ಆತಂಕಿತರಾಗಿದ್ದಾರೆ.

ಪ್ರಗತಿಪರ ಮಾರುಕಟ್ಟೆಗಳಿಂದ ಹೂಡಿಕೆಯು ಮತ್ತೆ ಅಮರಿಕಕ್ಕೆ ಹೋಗಬಹುದು ಎಂಬ ಆತಂಕ ಮತ್ತು ಅಮೆರಿಕದ ಬಾಂಡ್‌ಗಳ ಉತ್ಪತ್ತಿ ಏರಿಕೆ ಪ್ರಭಾವ ಬೀರಿತು ಎನ್ನಲಾಗಿದೆ. ದೇಶದ ಅತಿ ದೊಡ್ಡ ಬ್ಯಾಂಕ್ ಎಸ್‌ಬಿಐನ ಕಳಪೆ ತ್ರೈಮಾಸಿಕ ಫಲಿತಾಂಶ ಕೂಡ ನಕಾರಾತ್ಮಕ ಪ್ರಭಾವ ಬೀರಿತು. ವಿದೇಶಿ ಹೂಡಿಕೆದಾರರು ಶುಕ್ರವಾರ 733 ಕೋಟಿ ರೂ. ಬೆಲೆಯ ಷೇರುಗಳನ್ನು ಮಾರಿದ್ದರು. ಏಷ್ಯಾ, ಅಮೆರಿಕ, ಯುರೋಪ್‌ನಲ್ಲೂ ಷೇರು ಸೂಚ್ಯಂಕಗಳು ಕುಸಿದವು.

ಬಿಎಸ್‌ಇನಲ್ಲಿ 2,198 ಷೇರುಗಳು ನಷ್ಟಕ್ಕೀಡಾದರೆ, 489 ಷೇರುಗಳು ಲಾಭ ಗಳಿಸಿತು. ಗುರುನಾನಕ್ ಜಯಂತಿ ಪ್ರಯುಕ್ತ ಬಿಎಸ್‌ಇ, ಎನ್‌ಎಸ್‌ಇಗೆ ಸೋಮವಾರ (ನವೆಂಬರ್ 14) ರಜಾ ದಿನ.