RuPay: ವಿದೇಶಿ ಕಾರ್ಡ್‌ಗೆ ನಡುಕ ಹುಟ್ಟಿಸಿದ ಸ್ವದೇಶಿ ರುಪೇ ಕಾರ್ಡ್‌!

ಹೊಸದಿಲ್ಲಿ: ಕೇವಲ 6 ವರ್ಷಗಳ ಹಿಂದೆಯಷ್ಟೇ ಅಸ್ತಿತ್ವಕ್ಕೆ ಬಂದಿರುವ ಭಾರತದ ರುಪೇ ಕಾರ್ಡ್‌, ಎಲ್ಲರೂ ಅಚ್ಚರಿಗೀಡಾಗುವಂತೆ ವ್ಯಾಪಕವಾಗಿ ಬಳಕೆಯಾಗುತ್ತಿದೆ. ಅಮೆರಿಕ ಮೂಲದ ಅಂತಾರಾಷ್ಟ್ರೀಯ ದಿಗ್ಗಜ ಕಾರ್ಡ್‌ ಕಂಪನಿಗಳಾದ ವೀಸಾ ಮತ್ತು ಮಾಸ್ಟರ್‌ ಕಾರ್ಡ್‌ಗೂ ಈ ಬೆಳವಣಿಗೆ ನಡುಕ ಹುಟ್ಟಿಸಿದೆ. ರುಪೇ ಕಾರ್ಡ್‌ ಬಳಸುವ ಮೂಲಕ ದೇಶಸೇವೆ ಮಾಡಬಹುದು ಎಂದು ಪ್ರಧಾನಿ ನರೇಂದ್ರ ಮೋದಿಯವರು ಕೊಟ್ಟ ಕರೆಗೆ ಅಸಂಖ್ಯಾತ ಮಂದಿ ಭಾರತೀಯರು ಸ್ಪಂದಿಸಿದ್ದು, ವೀಸಾ, ಮಾಸ್ಟರ್‌ ಕಾರ್ಡ್‌ಗಳ ಬದಲಿಗೆ ಸ್ವದೇಶಿ ರುಪೇ ಕಾರ್ಡ್‌ ಆಯ್ಕೆ ಮಾಡಿಕೊಳ್ಳುತ್ತಿದ್ದಾರೆ!

ಪ್ರಧಾನಿ ಮೋದಿ ಏನೆಂದಿದ್ದರು?

'ದೇಶವಾಸಿಗಳೇ, ರುಪೇಕಾರ್ಡ್‌ ಡಿಜಿಟಲ್‌ ಪೇಮೆಂಟ್‌ ವಲಯದಲ್ಲಿ ಕ್ರಾಂತಿಕಾರಕ ಪರಿವರ್ತನೆ ತರುತ್ತಿದೆ. ಈಗ ಭಾರತದಲ್ಲಿ 50 ಕೋಟಿ ರುಪೇ ಕಾರ್ಡ್‌ ಜನರ ಜೇಬಿನಲ್ಲಿದೆ. ಕೇವಲ ಭಾರತದಲ್ಲಿ ಮಾತ್ರವಲ್ಲ, ವಿದೇಶದಲ್ಲೂ ಇದರ ಪ್ರಯೋಗ ನಡೆಯುತ್ತಿದೆ. ನಾನು ಬಾಲಿ, ಸಿಂಗಾಪುರದಲ್ಲಿ ರುಪೇ ಕಾರ್ಡ್‌ ಬಳಸಿ ಕೆಲ ವಸ್ತುಗಳನ್ನು ಖರೀದಿಸಿದ್ದೆ. ನಾವು ವಿದೇಶಿ ಮೂಲದ ಕಾರ್ಡ್‌ಗಳನ್ನು ಬಳಸಿದರೆ, ಅದಕ್ಕೆ ತಗಲುವ ಶುಲ್ಕ ವಿದೇಶಕ್ಕೆ ಹೋಗುತ್ತದೆ. ಆದರೆ ರುಪೇ ಕಾರ್ಡ್‌ ಬಳಸಿದರೆ ನಮ್ಮ ದೇಶದಲ್ಲೇ ದುಡ್ಡು ಇರುತ್ತದೆ. ಅದರಿಂದ ಸರಕಾರ ಗಳಸುವ ಆದಾಯವನ್ನು ಸಾರ್ವಜನಿಕ ಆಸ್ಪತ್ರೆ, ಬಡವರಿಗೆ ಶಿಕ್ಷಣ, ಗ್ರಾಮಗಳಲ್ಲಿ ಮೂಲ ಸೌಕರ್ಯ ಇತ್ಯಾದಿಗಳಿಗೆ ಖರ್ಚು ಮಾಡಬಹುದು. ಎಲ್ಲರಿಗೂ ಗಡಿಗೆ ತೆರಳಿ ದೇಶ ಕಾಯಲು ಸಾಧ್ಯವಾಗದು. ಆದರೆ ರುಪೇ ಕಾರ್ಡ್‌ ಬಳಸಿಯೂ ದೇಶ ಸೇವೆ ಮಾಡಬಹುದು' ಎಂದು ಪ್ರಧಾನಿ ನರೇಂದ್ರ ಮೋದಿಯವರು ಕರೆ ನೀಡಿದ್ದರು.

ಮಾಸ್ಟರ್‌ ಕಾರ್ಡ್‌ ಆತಂಕಕ್ಕೆ ಕಾರಣ?

ಪ್ರಧಾನಿ ಮೋದಿಯವರು ದೇಶಭಕ್ತಿಯ ಹೆಸರಿನಲ್ಲಿ ರುಪೇ ಕಾರ್ಡನ್ನು ಜನಪ್ರಿಯಗೊಳಿಸುತ್ತಿದ್ದಾರೆ. ಇದರಿಂದ ನಮ್ಮ ಕಾರ್ಡ್‌ ಬಿಸಿನೆಸ್‌ಗೆ ಹೊಡೆತ ಬೀಳುತ್ತಿದೆ ಎಂದು ಮಾಸ್ಟರ್‌ಕಾರ್ಡ್‌ ಅಮೆರಿಕದ ಟ್ರಂಪ್‌ ಸರಕಾರಕ್ಕೆ ದೂರು ನೀಡಿದೆ.

ಭಾರತದಲ್ಲಿ ಇದುವರೆಗೆ ವೀಸಾ ಮತ್ತು ಮಾಸ್ಟರ್‌ ಕಾರ್ಡ್‌ನದ್ದೇ ಅಬ್ಬರವಿತ್ತು. ಜನತೆ ಡೆಬಿಟ್‌, ಕ್ರೆಡಿಟ್‌ ಕಾರ್ಡ್‌ ಮೂಲಕ ಮಾಡುವ ಪ್ರತಿಯೊಂದು ಪೇಮೆಂಟ್‌ನಲ್ಲೂ ನಿಗದಿತ ಶುಲ್ಕವನ್ನು ಆಯಾ ಕಾರ್ಡ್‌ ಕಂಪನಿಗಳು ಪಡೆಯುತ್ತವೆ. ಆದರೆ ಕೇವಲ 6 ವರ್ಷಗಳಲ್ಲಿ 50 ಕೋಟಿ ರುಪೇ ಕಾರ್ಡ್‌ ಬಳಕೆಯಾಗುತ್ತಿದೆ. ವಿದೇಶಿ ಕಂಪನಿಗಳಿಗೆ ಗ್ರಾಹಕರ ಸಂಖ್ಯೆ ಇಳಿಯುತ್ತಿದೆ.

ಸ್ವದೇಶಿ ರುಪೇಕಾರ್ಡ್‌ :

ರಿಸರ್ವ್‌ ಬ್ಯಾಂಕ್‌ ಆಫ್‌ ಇಂಡಿಯಾದ ವ್ಯಾಪ್ತಿಯಲ್ಲಿರುವ ನ್ಯಾಶನಲ್‌ ಪೇಮೆಂಟ್ಸ್‌ ಕಾರ್ಪೊರೇಷನ್‌ ಆಫ್‌ ಇಂಡಿಯಾ (ಎನ್‌ಪಿಸಿಐ) ಎಂಬ ಸಂಸ್ಥೆಯು ರುಪೇ ಕಾರ್ಡ್‌ ಅನ್ನು ನಿರ್ವಹಿಸುತ್ತಿದೆ. ಇದರ ರುಪೇ ಕಾರ್ಡ್‌ 2012ರ ಮಾರ್ಚ್‌ 26ರಂದು ಬಿಡುಗಡೆಗೊಳಿಸಲಾಯಿತು. ವೀಸಾ, ಮಾಸ್ಟರ್‌ ಕಾರ್ಡ್‌ಗೆ ಪರ್ಯಾಯವಾಗಿ ಭಾರತದ ಸಂಪೂರ್ಣ ಸ್ವದೇಶಿ ಪೇಮೆಂಟ್‌ ಕಾರ್ಡ್‌ ಇದಾಗಿದೆ. ಹಾಗೂ ಸಂಪೂರ್ಣ ಸುರಕ್ಷಿತ.

ರುಪೇ ಕಾರ್ಡ್‌ ಎಲ್ಲಿ ಸಿಗುತ್ತದೆ?

ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ, ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್‌, ಕೆನರಾ ಬ್ಯಾಂಕ್‌, ಬ್ಯಾಂಕ್‌ ಆಫ್‌ ಬರೋಡಾ, ಯೂನಿಯನ್‌ ಬ್ಯಾಂಕ್‌ ಆಫ್‌ ಇಂಡಿಯಾ, ಬ್ಯಾಂಕ್‌ ಆಫ್‌ ಇಂಡಿಯಾ, ಐಸಿಐಸಿಐ ಬ್ಯಾಂಕ್‌, ಎಚ್‌ಡಿಎಫ್‌ಸಿ ಬ್ಯಾಂಕ್‌, ಸಿಟಿ ಬ್ಯಾಂಕ್‌ ಮತ್ತು ಎಚ್‌ಎಸ್‌ಬಿಸಿಯನ್ನು ರುಪೇ ಕಾರ್ಡ್‌ ವಿತರಣೆಗೆ 10 ಪ್ರಮುಖ ಬ್ಯಾಂಕ್‌ಗಳೆಂದು ಎನ್‌ಪಿಸಿಐ ಗುರುತಿಸಿದೆ. ಮಾತ್ರವಲ್ಲದೆ ಎಲ್ಲ ಪ್ರಮುಖ ಪಿಎಸ್‌ಯು ಬ್ಯಾಂಕ್‌ಗಳು, ಖಾಸಗಿ ಬ್ಯಾಂಕ್‌, ಸಹಕಾರಿ ಮತ್ತು ಗ್ರಾಮೀಣ ಬ್ಯಾಂಕ್‌ಗಳು ರುಪೇ ಕಾರ್ಡ್‌ ವಿತರಿಸುತ್ತಿವೆ.

ರುಪೇ ಕಾರ್ಡ್‌ ಅನುಕೂಲವೇನು?

ಭಾರತದಲ್ಲಿ ಎಲ್ಲಿ ಬೇಕಾದರೂ ರುಪೇ ಕಾರ್ಡ್‌ ಬಳಸಬಹುದು. ಇತ್ತೀಚೆಗೆ ವಿದೇಶಗಳಲ್ಲೂ ಇದರ ಪ್ರಯೋಗ ನಡೆಯುತ್ತಿದೆ. ಇದರಲ್ಲಿ ಪೇಮೆಂಟ್‌ಗೆ ತಗಲುವ ವೆಚ್ಚ ವಿದೇಶಿ ಕಾರ್ಡ್‌ಗೆ ಹೋಲಿಸಿದರೆ ಕಡಿಮೆ.

ಎಲ್ಲ ಎಟಿಎಂ, ಸ್ವೈಪಿಂಗ್‌ ಮೆಶೀನ್‌ಗಳಲ್ಲಿ ಉಪಯೋಗಿಸಬಹುದು.

ಕ್ಯಾಶ್‌ ಬ್ಯಾಕ್‌, ವಿಮೆ, ವಿಶೇಷ ರಿಯಾಯಿತಿಗಳೂ ಆಗಿಂದಾಗ್ಗೆ ದೊರೆಯುತ್ತದೆ.

ವಿದೇಶಿ ಡೆಬಿಟ್‌ ಕಾರ್ಡ್‌ಗೆ ಹೋಲಿಸಿದರೆ, ರುಪೇ ಕಾರ್ಡ್‌ನಲ್ಲಿ ಪೇಮೆಂಟ್‌ಗೆ ತಗಲುವ ವೆಚ್ಚ 2/3ರಷ್ಟು ಅಗ್ಗ. ಉದಾಹರಣೆಗೆ 2,000 ರೂ. ವರ್ಗಾವಣೆಗೆ ವಿದೇಶಿ ಕಾರ್ಡ್‌ನಲ್ಲಿ 3.25 ರೂ. ತಗಲಿದರೆ, ರುಪೇ ಕಾರ್ಡ್‌ನಲ್ಲಿ 2.50 ರೂ. ಸಾಕು.

ವೀಸಾ ಅಥವಾ ಮಾಸ್ಟರ್‌ ಕಾರ್ಡ್‌ಗೆ ಹೋಲಿಸಿದರೆ ರುಪೇ ಕಾರ್ಡ್‌ನಲ್ಲಿ ಹಲವು ಸೌಲಭ್ಯಗಳು ಸಿಗುತ್ತವೆ. ಆದರೆ ವಿದೇಶಗಳಲ್ಲಿ ರುಪೇ ಕಾರ್ಡ್‌ ಬಳಕೆ ಸದ್ಯಕ್ಕೆ ವ್ಯಾಪಕವಾಗಿಲ್ಲ ಎನ್ನುವುದು ನಿಜ. ಆದರೆ ದೇಶದೊಳಗೆ ಸರ್ವವ್ಯಾಪಿ ಬಳಸಬಹುದು.

ರುಪೇ ಮೈಲುಗಲ್ಲು

ಚಾಲನೆ : 2012 ಮಾರ್ಚ್‌

ರಾಷ್ಟ್ರಪತಿಯವರಿಂದ ಲೋಕಾರ್ಪಣೆ : 2014, ಮೇ

ರುಪೇ ಪ್ಲಾಟಿನಮ್‌ ಕಾರ್ಡ್‌ ಬಿಡುಗಡೆ: 2014, ಜುಲೈ

700ಕ್ಕೂ ಹೆಚ್ಚು ಬ್ಯಾಂಕ್‌ಗಳಲ್ಲಿ ರುಪೇ ಸೌಲಭ್ಯ: 2017, ಮಾರ್ಚ್‌

ರುಪೇ ಕ್ರೆಡಿಟ್‌ ಕಾರ್ಡ್‌ ಬಿಡುಗಡೆ: 2017, ಜೂನ್‌

50 ಕೋಟಿಗೂ ಅಧಿಕ ರುಪೇ ಬಳಕೆ : 2018 ಜುಲೈ

ಮಾಸಿಕ 26 ಕೋಟಿ ಪೇಮೆಂಟ್‌ಗಳು: 2018, ಜುಲೈ