ಶೇ.60ರಷ್ಟು ಸ್ಟಾರ್ಟಪ್‌ಗಳಿಗೆ ಸೋಲು: ಪೈ ಭವಿಷ್ಯ

ಜೈಪುರ: ಸದ್ಯಕ್ಕೆ ಹೆಚ್ಚಿನ ಸ್ಟಾರ್ಟಪ್‌ಗಳು ತಲೆ ಎತ್ತುತ್ತಿವೆ. ಆದಾಗ್ಯೂ, ಮಾರುಕಟ್ಟೆ ಕೊರತೆ ಮತ್ತು ಇತರೆ ಕಾರಣಗಳಿಂದ ಶೇ.60ರಷ್ಟು ಸ್ಟಾರ್ಟಪ್‌ಗಳು ವಿಫಲಗೊಳ್ಳಲಿವೆ ಎಂದು ಐಟಿ ಉದ್ಯಮಿ ಟಿ.ವಿ.ಮೋಹನ್‌ ದಾಸ್‌ ಪೈ ಅಭಿಪ್ರಾಯ ಪಟ್ಟಿದ್ದಾರೆ.

''ಭಾರತವು 30 ಸಾವಿರ ಸ್ಟಾರ್ಟಪ್‌ಗಳನ್ನು ಪ್ರಸ್ತುತ ಹೊಂದಿದ್ದು, 3.5ರಿಂದ 4 ಲಕ್ಷ ಉದ್ಯೋಗಿಗಳಿದ್ದಾರೆ. ಪ್ರತಿ ವರ್ಷ 5ರಿಂದ 6 ಸಾವಿರ ಸ್ಟಾರ್ಟಪ್‌ಗಳು ಹೊಸದಾಗಿ ಆರಂಭಗೊಳ್ಳುತ್ತಿವೆ. ಕಳೆದ ವರ್ಷ ಸ್ಟಾರ್ಟಪ್‌ಗಳಿಗೆ 136.5 ಕೋಟಿ ಡಾಲರ್‌ ಹೂಡಿಕೆ ಹರಿದು ಬಂದಿದೆ. 2025ರ ಹೊತ್ತಿಗೆ 1 ಲಕ್ಷ ಸಕ್ರಿಯ ಸ್ಟಾರ್ಟಪ್‌ಗಳು ಇರಲಿವೆ. ಇದರಲ್ಲಿ ಸುಮಾರು 32 ಲಕ್ಷ ಉದ್ಯೋಗಿಗಳು ದುಡಿಯಲಿದ್ದಾರೆ,'' ಎಂದು ಪಿಟಿಐಗೆ ನೀಡಿದ ಸಂದರ್ಶನದಲ್ಲಿ ಹೇಳಿದ್ದಾರೆ.

''ಕೇಂದ್ರದ ಸ್ಟಾರ್ಟಪ್‌ ಇಂಡಿಯಾ ನೀತಿ ಮತ್ತು ರಾಜ್ಯ ಸರಕಾರಗಳ ಐಟಿ ಉತ್ತೇಜಕ ನೀತಿಗಳು ಆಕರ್ಷಕವಾಗಿವೆ. ಅಲ್ಲದೇ, ಫ್ಲಿಪ್‌ಕಾರ್ಟ್‌ ಮತ್ತಿತರ ಸ್ಟಾರ್ಟಪ್‌ಗಳ ಯಶಸ್ಸು ಅನೇಕರನ್ನು ಸೆಳೆಯುತ್ತಿದೆ. ಅನೇಕರು ಉತ್ಸಾಹದಿಂದ ಸ್ಟಾರ್ಟಪ್‌ಗಳನ್ನು ಆರಂಭಿಸುತ್ತಿದ್ದಾರೆ. ಆದರೆ, ಸೋಲಿನ ಪ್ರಮಾಣ ಜಾಸ್ತಿಯೇ ಇರಲಿದೆ. ಇದು ಉದ್ಯಮದ ಸ್ವಾಭಾವ,'' ಎಂದು ಪರಿಸ್ಥಿತಿಯನ್ನು ವಿಶ್ಲೇಷಿಸಿದ್ದಾರೆ.

''ಸ್ಟಾರ್ಟಪ್‌ ಆರಂಭಿಸುವ ಹೊಸ ಉದ್ಯಮಿಗಳಿಗೆ ವ್ಯವಹಾರವನ್ನು ನಿಭಾಯಿಸುವ ತಂತ್ರ ತಿಳಿದಿಲ್ಲ. ಆದರೆ, ಸಂತೋಷದ ಸಂಗತಿಯೇನೆಂದರೆ, ಈ ಸ್ಟಾರ್ಟಪ್‌ಗಳ ನಿಭಾಯಿಸುವಲ್ಲಿ ಸೋತರೂ, ಅಂಥವರು ಸಮಸ್ಯೆ ನೀಗಿಸುವ ಪರಿಣತರಾಗಿ ರೂಪುಗೊಳ್ಳಲಿದ್ದಾರೆ,'' ಎಂದಿದ್ದಾರೆ.