ಮುಂದಿನ ವರ್ಷ 84 ಏರ್‌ಪೋರ್ಟ್‌ಗಳಲ್ಲಿ ಬಾಡಿ ಸ್ಕ್ಯಾ‌ನರ್‌

ಹೊಸದಿಲ್ಲಿ: 2020ರ ಮಾರ್ಚ್‌ನಿಂದ ದೇಶದ 84 ಏರ್‌ಪೋರ್ಟ್‌ಗಳಲ್ಲಿ ಬಾಡಿ ಸ್ಕ್ಯಾ‌ನರ್‌ಗಳನ್ನು ಅಳವಡಿಸುವಂತೆ ಕೇಂದ್ರ ಸರಕಾರವು ನಿರ್ದೇಶನ ನೀಡಿದೆ.

ಈಗಿನ ಡೋರ್‌ ಫ್ರೇಮ್‌ ಮೆಟಲ್‌ ಡಿಟೆಕ್ಟರ್‌ಗಳು, ಹ್ಯಾಂಡ್‌ ಹೆಲ್ಡ್‌ ಸ್ಕ್ಯಾ‌ನರ್‌ಗಳಿಂದ ಲೋಹವೇತರ ಅಸ್ತ್ರಗಳು ಮತ್ತು ಸ್ಫೋಟಕಗಳನ್ನು ಪತ್ತೆ ಹಚ್ಚಲು ಆಗುತ್ತಿಲ್ಲ. ಹೀಗಾಗಿ ಇವುಗಳನ್ನು ಬದಲಿಸಿ, ಬಾಡಿ ಸ್ಕ್ಯಾ‌ನರ್‌ಗಳನ್ನು ಅಳವಡಿಸುವಂತೆ ನಾಗರಿಕ ವಿಮಾನಯಾನ ಭದ್ರತೆ ಸಂಸ್ಥೆಯು(ಬಿಸಿಎಎಸ್‌) ಎಲ್ಲ ಏರ್‌ಪೋರ್ಟ್‌ಗಳಿಗೆ ಸುತ್ತೋಲೆ ಕಳಿಸಿದೆ.

ಬಾಡಿ ಸ್ಕ್ಯಾ‌ನರ್‌ಗಳು ಲೋಹ ಮತ್ತು ಲೋಹವೇತರ ಪದಾರ್ಥಗಳನ್ನೂ ಪತ್ತೆ ಹಚ್ಚಬಲ್ಲವು. ಇವುಗಳ ಅಳವಡಿಕೆಯ ಜೊತೆಗೆ, ಗುಣಮಟ್ಟದ ಕಾರ್ಯಾಚರಣೆ ನಿಯಮಗಳನ್ನು(ಎಸ್‌ಒಪಿ) ಪಾಲಿಸುವಂತೆಯೂ ಬಿಸಿಎಎಸ್‌ ಸೂಚಿಸಿದೆ.

ದೇಶದಲ್ಲಿ ಪ್ರಸ್ತುತ 105 ವಿಮಾನ ನಿಲ್ದಾಣಗಳು ಕಾರ್ಯ ನಿರ್ವಹಿಸುತ್ತಿದ್ದು, ಅದರಲ್ಲಿ ದಿಲ್ಲಿ, ಮುಂಬಯಿ, ಕೋಲ್ಕೊತಾ, ಚೆನ್ನೈ ಸೇರಿದಂತೆ 28 ವಿಮಾನ ನಿಲ್ದಾಣಗಳನ್ನು ಅತಿ ಸೂಕ್ಷ್ಮ ಎಂದು ಗುರ್ತಿಸಲಾಗಿದೆ. ಜಮ್ಮು ಮತ್ತು ಕಾಶ್ಮೀರ ಸೇರಿದಂತೆ ಗಲಭೆ ಪೀಡಿತ ಪ್ರದೇಶಗಳಲ್ಲಿನ 56 ವಿಮಾನ ನಿಲ್ದಾಣಗಳನ್ನು ಸೂಕ್ಷ್ಮ ಎಂದು ಗುರ್ತಿಸಲಾಗಿದೆ. ಈ 28 ಅತಿ ಸೂಕ್ಷ್ಮ ಮತ್ತು 56 ಸೂಕ್ಷ್ಮ ವಿಮಾನ ನಿಲ್ದಾಣಗಳಲ್ಲಿ 2020ರ ಮಾರ್ಚ್‌ ಹೊತ್ತಿಗೆ ಬಾಡಿ ಸ್ಕ್ಯಾ‌ನರ್‌ಗಳನ್ನು ಅಳವಡಿಸಬೇಕಿದೆ. ಉಳಿದ ನಿಲ್ದಾಣಗಳಲ್ಲಿ 2021ರ ಮಾರ್ಚ್‌ ಹೊತ್ತಿಗೆ ಅಳವಡಿಸಬೇಕು ಎಂದು ಸುತ್ತೋಲೆಯಲ್ಲಿ ಹೇಳಲಾಗಿದೆ.

ಬಾಡಿ ಸ್ಕ್ಯಾ‌ನರ್‌ಗಳು ಬಂದರೆ, ಪ್ರಯಾಣಿಕರು ತಮ್ಮ ಜಾಕೆಟ್‌ಗಳು, ಮೈಮೇಲೆ ಹಾಕಿಕೊಂಡ ದಪ್ಪದ ಬಟ್ಟೆಗಳು, ಶೂಗಳು, ಬೆಲ್ಟ್‌ಗಳು ಮತ್ತು ತಮ್ಮಲ್ಲಿನ ಲೋಹದ ವಸ್ತುಗಳನ್ನು ತೆಗೆದಿಟ್ಟು ಬಾಡಿ ಸ್ಕ್ಯಾ‌ನರ್‌ನೊಳಗೆ ಪ್ರವೇಶಿಸಬೇಕಾಗುತ್ತದೆ. ಈ ಸ್ಕ್ಯಾ‌ನರ್‌ಗಳು ಮಿಲಿಮೀಟರ್‌ ವೇವ್‌ ಟೆಕ್ನಾಲಜಿಯನ್ನು ಆಧರಿಸಿವೆ. ಅಯಾನೇತರ ವಿದ್ಯುತ್ಕಾಂತೀಯ ವಿಕಿರಣಗಳು ಬಾಡಿ ಸ್ಕ್ಯಾ‌ನರ್‌ಗಳಲ್ಲಿ ಬಳಕೆಯಾಗುತ್ತವೆ. ಅಂದರೆ, ಗರ್ಭಿಣಿಯರು ಸೇರಿದಂತೆ ಎಲ್ಲ ಪ್ರಯಾಣಿಕರಿಗೂ ಯಾವುದೇ ತೊಂದರೆ ಇರುವುದಿಲ್ಲ.