ರಿಲಯನ್ಸ್‌ ರಿಟೇಲ್‌ಗೆ‌ ಹೂಡಿಕೆ ಸುಗ್ಗಿ, ಮುಬಡಾಲಾದಿಂದ 6,247 ಕೋಟಿ ರೂ. ಹೂಡಿಕೆ

ಹೊಸದಿಲ್ಲಿ: ಅಬುದಾಭಿ ಮೂಲದ ಹೂಡಿಕೆ ವಲಯದ ಕಂಪನಿ ಮುಬಡಾಲಾ, ಉದ್ಯಮಿ ಮುಕೇಶ್‌ ಅಂಬಾನಿ ನೇತೃತ್ವದ ರಿಲಯನ್ಸ್‌ ಇಂಡಸ್ಟ್ರೀಸ್‌ನ ಅಧೀನದಲ್ಲಿರುವ ರಿಲಯನ್ಸ್‌ ರಿಟೇಲ್‌ ವೆಂಚರ್ಸ್‌ನಲ್ಲಿ 6,247 ಕೋಟಿ ರೂಪಾಯಿ ಹೂಡಿಕೆ ಮಾಡಲಿದೆ.

ಇದರೊಂದಿಗೆ ಮುಬಡಾಲಾ ಕಂಪನಿಯು ರಿಲಯನ್ಸ್‌ ಇಂಡಸ್ಟ್ರೀಸ್‌ ಗ್ರೂಪ್‌ನಲ್ಲಿ ಎರಡನೇ ಬಾರಿಗೆ ಹೂಡಿಕೆ ಮಾಡಿದಂತಾಗಿದೆ. ರಿಲಯನ್ಸ್‌ ಜಿಯೊದಲ್ಲಿ ಕೂಡ ಕಂಪನಿ ಈ ವರ್ಷ ಹೂಡಿಕೆ ಘೋಷಿಸಿತ್ತು.

ರಿಲಯನ್ಸ್‌ ರಿಟೇಲ್‌ ವೆಂಚರ್ಸ್‌ ಅಧೀನದಲ್ಲಿರುವ ರಿಲಯನ್ಸ್‌ ರಿಟೇಲ್‌, ರಾಷ್ಟ್ರವ್ಯಾಪಿ 12,000ಕ್ಕೂ ಹೆಚ್ಚು ರಿಟೇಲ್‌ ವ್ಯಾಪಾರ ಮಳಿಗೆಗಳನ್ನು ಹೊಂದಿದೆ. ಈ ನಡುವೆ ಅಮೆರಿಕ ಮೂಲದ ಜನರಲ್‌ ಅಟ್ಲಾಂಟಿಕ್‌ ರಿಲಯನ್ಸ್‌ ರಿಟೇಲ್‌ ವೆಂಚರ್ಸ್‌ನಲ್ಲಿ 3,675 ಕೋಟಿ ರೂ. ಹೂಡಿಕೆಗೆ ನಿರ್ಧರಿಸಿದೆ.

ಸಿಲ್ವರ್ ಲೇಕ್ ಸಹ ಹೂಡಿಕೆದಾರರಿಂದ ರಿಲಯನ್ಸ್‌ ರೀಟೇಲ್‌ನಲ್ಲಿ ಹೆಚ್ಚುವರಿ ₹1,875 ಕೋಟಿ ಹೂಡಿಕೆ
ಇದಲ್ಲದೆ ಅಮೆರಿಕದ ಸಿಲ್ವರ್‌ ಲೇಕ್ಸ್‌ ಕಂಪನಿಯ ಹೂಡಿಕೆದಾರರು ಹೆಚ್ಚುವರಿ 1,875 ಕೋಟಿ ರೂ. ಬಂಡವಾಳ ಹೂಡಿಕೆ ಮಾಡಲಿದ್ದಾರೆ. ಮುಕೇಶ್‌ ಅಂಬಾನಿ ಮಾಲಿಕತ್ವದ ಕಂಪನಿಗೆ ಹೂಡಿಕೆಗಳು ಮೇಲಿಂದ ಮೇಲೆ ಹರಿದು ಬರುತ್ತಿದ್ದು, ಇದರೊಂದಿಗೆ ರಿಲಯನ್ಸ್‌ ರಿಟೇಲ್‌ ವೆಂಚರ್ಸ್‌ನ ಒಟ್ಟು ಮೌಲ್ಯ 4.29 ಲಕ್ಷ ಕೋಟಿ ರೂಪಾಯಿಗೆ ವೃದ್ಧಿಸಿದೆ.