27 ವರ್ಷಗಳ ಬಳಿಕ ಮೆಹ್ತಾ ಕುಟುಂಬಕ್ಕೆ ತೆರಿಗೆ ನಿರಾಳ

ಮುಂಬಯಿ: 27 ವರ್ಷಗಳ ಸುದೀರ್ಘ ತೆರಿಗೆ ಸಮರದ ಬಳಿಕ ಹರ್ಷದ್‌ ಮೆಹ್ತಾ ಕುಟುಂಬಕ್ಕೆ ತೆರಿಗೆಗೆ ಸಂಬಂಧಿಸಿದಂತೆ ಸಮಾಧಾನವಾಗುವಂಥ ತೀರ್ಪನ್ನು ಆದಾಯ ತೆರಿಗೆ ನ್ಯಾಯಾಧಿಕರಣ(ಐಟಿಎಟಿ) ನೀಡಿದೆ.

2,000 ಕೋಟಿ ರೂ.ಗೂ ಅಧಿಕ ಮೊತ್ತದ ಆದಾಯಕ್ಕೆ ಸಂಬಂಧಿಸಿದಂತೆ ತೆರಿಗೆ ಪಾವತಿಸಬೇಕು ಎಂದು ದಿವಂಗತ ಹರ್ಷದ್‌ ಮೆಹ್ತಾ ಕುಟುಂಬದ ವಿರುದ್ಧ ಐಟಿ ಇಲಾಖೆಯು ಕಾನೂನು ಸಮರ ನಡೆಸಿತ್ತು. ವಾದ, ಪ್ರತಿವಾದ, ಮರು ಅರ್ಜಿಗಳು ಸೇರಿದಂತೆ ಆಮೆ ವೇಗದಲ್ಲಿ ಈ ಕಾನೂನು ಸಮರ ನಡೆಯಿತು. ಅಂತಿಮವಾಗಿ ಹರ್ಷದ್‌ ಮೆಹ್ತಾ ಪತ್ನಿ ಜ್ಯೋತಿ, ಸಹೋದರ ಅಶ್ವಿನ್‌ ಮತ್ತು ಕುಟುಂಬದ ಮೇಲಿನ ತೆರಿಗೆ ಬಾಕಿ ಪ್ರಕರಣದ ತೀರ್ಪನ್ನು ಐಟಿಎಟಿ ನೀಡಿದೆ. ತೆರಿಗೆ ಇಲಾಖೆ ನೀಡಿದ್ದ ಬಹುತೇಕ ಎಲ್ಲ ತೆರಿಗೆ ಬೇಡಿಕೆ ನೋಟಿಸ್‌ಗಳನ್ನು ರದ್ದುಪಡಿಸಿದೆ.

ಮೆಹ್ತಾ ಕುಟುಂಬವು ಮನಿ ಮತ್ತು ಸ್ಟಾಕ್‌ ಮಾರ್ಕೆಟ್‌ನಲ್ಲಿ ಹೊಂದಿರುವ ವ್ಯವಹಾರಗಳೂ ಸೇರಿದಂತೆ 2,014 ಕೋಟಿ ರೂ. ಆದಾಯ ಹೊಂದಿದೆ ಎಂದು ತೆರಿಗೆ ಇಲಾಖೆ ವಾದಿಸಿತ್ತು. 1992ರ ಬಹುಕೋಟಿ ರೂಪಾಯಿ ಷೇರು ಹಗರಣದ ಪ್ರಮುಖ ಆರೋಪಿ ಹರ್ಷ ಮೆಹ್ತಾ 2002ರಲ್ಲಿ ಮೃತಪಟ್ಟಿದ್ದರು.