ಸೆನ್ಸೆಕ್ಸ್‌ 355 ಅಂಕ ಪತನ: 38,000 ಮಟ್ಟಕ್ಕಿಂತ ಕೆಳಕ್ಕಿಳಿದ ಸೂಚ್ಯಂಕ

ಮುಂಬಯಿ: ಅಮೆರಿಕ ಮತ್ತು ಯುರೋಪ್‌ನಲ್ಲಿ ಆರ್ಥಿಕ ಹಿಂಜರಿತ ಮರುಕಳಿಸಲಿದ ಎಂಬ ವರದಿಗಳು ಜಾಗತಿಕ ಷೇರು ಮಾರುಕಟ್ಟೆಯನ್ನು ಸೋಮವಾರ ತಲ್ಲಣಗೊಳಿಸಿತು. ಅಮೆರಿಕ, ಏಷ್ಯಾ, ಯುರೋಪ್‌ನಾದ್ಯಂತ ಷೇರು ಸೂಚ್ಯಂಕಗಳು ಮುಗ್ಗರಿಸಿತು.

ಮುಂಬಯಿ ಷೇರು ಮಾರುಕಟ್ಟೆ ಸಂವೇದಿ ಸೂಚ್ಯಂಕ ಸೆನ್ಸೆಕ್ಸ್‌ 355.70 ಅಂಕ ಕಳೆದುಕೊಂಡು 37,808.91ಕ್ಕೆ ದಿನದ ವಹಿವಾಟು ಮುಕ್ತಾಯಗೊಳಿಸಿತು. ನಿಫ್ಟಿ 102.65 ಅಂಕ ಕಳೆದುಕೊಂಡು 11,354.25ಕ್ಕೆ ಸ್ಥಿರವಾಯಿತು.

ಸೆನ್ಸೆಕ್ಸ್‌ ಎರಡು ದಿನಗಳ ಅವಧಿಯಲ್ಲಿ 575 ಅಂಕ ಕಳೆದುಕೊಂಡಿದ್ದು, ಅಮೆರಿಕ ಮತ್ತು ಯುರೋಪ್‌ನ ಆರ್ಥಿಕತೆ ಕುರಿತ ಇತ್ತೀಚಿನ ವರದಿಗಳು ಹೂಡಿಕೆದಾರರನ್ನು ತಲ್ಲಣಗೊಳಿಸಿವೆ. ವೇದಾಂತ, ಟಾಟಾ ಮೋಟಾರ್ಸ್‌, ಯಸ್‌ ಬ್ಯಾಂಕ್‌, ಎಂಆ್ಯಂಡ್‌ ಎಂ, ಐಸಿಐಸಿಐ ಬ್ಯಾಂಕ್‌, ಎಚ್‌ಡಿಎಫ್‌ಸಿ, ಕೋಟಕ್‌ ಬ್ಯಾಂಕ್‌, ಸನ್‌ ಫಾರ್ಮಾ, ಎಸ್‌ಬಿಐ ಷೇರುಗಳು ನಷ್ಟಕ್ಕೀಡಾಯಿತು. ರಿಯಾಲ್ಟಿ, ಲೋಹ, ಎಫ್‌ಎಂಸಿಜಿ ವಲಯದ ಷೇರುಗಳು ಕುಸಿದವು.

ಅಮೆರಿಕದಲ್ಲಿ ಬಾಂಡ್‌ಗಳ (ಸಾಲಪತ್ರ)ಉತ್ಪತ್ತಿಯ ಪ್ರಮಾಣ ಕಳೆದ 10 ವರ್ಷಗಳಲ್ಲಿಯೇ ಕನಿಷ್ಠ ಮಟ್ಟಕ್ಕೆ ಕುಸಿದಿರುವುದು ಹೂಡಿಕೆದಾರರನ್ನು ಆತಂಕಕ್ಕೀಡು ಮಾಡಿತು.

ಚಿನ್ನದ ದರ ಏರಿಕೆ:
ಜಾಗತಿಕ ಷೇರು ಮಾರುಕಟ್ಟೆ ಸೂಚ್ಯಂಕಗಳ ಕುಸಿತದ ಬೆನ್ನಲ್ಲೇ ಚಿನ್ನದ ದರಗಳಲ್ಲಿ ಏರಿಕೆ ದಾಖಲಾಗಿದೆ. ಬೆಳ್ಳಿಯ ದರದಲ್ಲೂ ತುಸು ಹೆಚ್ಚಳ ಕಂಡು ಬಂದಿದೆ. ಬೆಂಗಳೂರಿನಲ್ಲಿ ಬಂಗಾರದ ಸ್ಟ್ಯಾಂಡರ್ಡ್‌ ದರ ಪ್ರತಿ 10 ಗ್ರಾಮ್‌ಗೆ 32,245 ರೂ.ನಷ್ಟಿತ್ತು.