ಬರುತ್ತಿದೆ ಲೋಕಸಭಾ ಚುನಾವಣೆ: ಜಾಹಿರಾತಿನಲ್ಲಿ ಅಮೆಜಾನ್‌, ನೆಟ್‌ಫ್ಲಿಕ್ಸ್‌ ಹಿಂದಿಕ್ಕಿ ನಂ. 1 ಆದ ಬಿಜೆಪಿ

ಹೊಸದಿಲ್ಲಿ: ಲೋಕಸಭಾ ಚುನಾವಣೆ ಸಮೀಪಿಸುತ್ತಿದ್ದು, ಪಂಚರಾಜ್ಯ ಚುನಾವಣೆಯೂ ನಡೆಯುತ್ತಿರುವುದರಿಂದ ಟಿವಿ ಜಾಹಿರಾತು ನೀಡುವಿಕೆಯಲ್ಲಿ ಬಿಜೆಪಿ ನಂಬರ್ 1 ಸ್ಥಾನದಲ್ಲಿದೆ.

ಬಾರ್ಕ್ ಬಿಡುಗಡೆ ಮಾಡಿರುವ ದತ್ತಾಂಶ ಪ್ರಕಾರ ನ. 16ಕ್ಕೆ ಕೊನೆಗೊಂಡ ವಾರದಲ್ಲಿ ಅತಿ ಹೆಚ್ಚು ಜಾಹಿರಾತು ನೀಡುವ ವಿಮಲ್ ಪಾನ್ ಮಸಾಲಾವನ್ನೂ ಹಿಂದಿಕ್ಕಿರುವ ಬಿಜೆಪಿ ಮೊದಲ ಸ್ಥಾನ ಪಡೆದಿದೆ.

ಬಿಜೆಪಿ ನಂತರ ಸ್ಥಾನದಲ್ಲಿ ನೆಟ್‌ಫ್ಲಿಕ್ಸ್ ಮತ್ತು ಟ್ರಿವಾಗೊ ಇದೆ. ಅದಾದ ಬಳಿಕದ ಸ್ಥಾನದಲ್ಲಿ ಹಿಂದುಸ್ಥಾನ್ ಯುನಿಲಿವರ್ ಇದೆ. ಅದಕ್ಕೂ ಮುಂಚಿನ ವಾರದಲ್ಲಿ ಬಿಜೆಪಿ ಎರಡನೇ ಸ್ಥಾನದಲ್ಲಿತ್ತು. ಮಧ್ಯ ಪ್ರದೇಶ, ರಾಜಸ್ಥಾನ, ಛತ್ತೀಸ್‌ಗಢ, ತೆಲಂಗಾಣ ಮತ್ತು ಮಿಜೋರಾಂನಲ್ಲಿ ಚುನಾವಣೆ ನಡೆಯುತ್ತಿದೆ. ಜತೆಗೆ ಮುಂದಿನ ವರ್ಷ ನಡೆಯಲಿರುವ ಲೋಕಸಭಾ ಚುನಾವಣೆಯನ್ನು ಕೂಡ ಬಿಜೆಪಿ ಗಮನದಲ್ಲಿರಿಸಿಕೊಂಡಿದೆ.


ಆದರೆ ಕಾಂಗ್ರೆಸ್ ಮಾತ್ರ ಜಾಹಿರಾತು ನೀಡಿರುವ ಟಾಪ್ 10 ಪಟ್ಟಿಯಲ್ಲಿಲ್ಲ. ಬಿಜೆಪಿ ಮೀಡಿಯಾ ಸೆಲ್ ವಿವಿಧ ಮಾಧ್ಯಮಗಳ ಮೂಲಕ ಜನರನ್ನು ತಲುಪಲು ಯತ್ನಿಸುತ್ತಿದೆ. ಟಿವಿ ಮಾಧ್ಯಮಕ್ಕೆ ಹೆಚ್ಚಿನ ಪ್ರಾಶಸ್ತ್ಯ ನೀಡಿರುವ ಬಿಜೆಪಿ, ವಿವಿಧ ಜಾಹೀರಾತುಗಳ ಮೂಲಕ ಚುನಾವಣಾ ಪ್ರಚಾರ ಮಾಡುತ್ತಿದೆ.

ಮುಂದೆ ಲೋಕಸಭಾ ಚುನಾವಣೆ ಸಮೀಪಿಸುತ್ತಿದ್ದಂತೆ ಜಾಹಿರಾತು ನೀಡುವಿಕೆಯೂ ಹೆಚ್ಚಲಿದೆ.