ಕಚ್ಚಾತೈಲ ಬೆಲೆ ಏರಿಕೆ: ಆಮದು ಕಡಿತಗೊಳಿಸಲು ಕೇಂದ್ರ ಚಿಂತನೆ

ಹೊಸದಿಲ್ಲಿ: ತೈಲ ಬೆಲೆ ದಿನವೂ ಏರಿಕೆಯಾಗುತ್ತಿದ್ದು, ಮುಂಬಯಿಯಲ್ಲಿ ಈಗಾಗಲೇ ಪ್ರತಿ ಲೀಟರ್ ಪೆಟ್ರೋಲ್‌ಗೆ 90 ರೂ. ಗಡಿದಾಟಿದೆ. ಇದರ ಬೆನ್ನಲ್ಲೇ ದೇಶವು ಆಮದು ಮಾಡಿಕೊಳ್ಳುತ್ತಿರುವ ಕಚ್ಚಾಲದ ಪ್ರಮಾಣದಲ್ಲಿ ಇಳಿಕೆ ಮಾಡಲು ಕೇಂದ್ರ ಸರಕಾರ ಚಿಂತನೆ ನಡೆಸಿದೆ.

ಪ್ರಸ್ತುತ ಕಚ್ಚಾತೈಲ ಬ್ಯಾರೆಲ್‌ಗೆ ಸೋಮವಾರ ಶೇ. 2 ಏರಿಕೆಯಾಗುವುದರೊಂದಿಗೆ 80 ಡಾಲರ್‌ಗೆ ತಲುಪಿದೆ. ವರ್ಷಾಂತ್ಯಕ್ಕೆ ಪ್ರತಿ ಬ್ಯಾರೆಲ್ ಕಚ್ಚಾತೈಲಕ್ಕೆ 100 ಡಾಲರ್ ಆಗಲಿದೆ ಎಂದು ಮಾರುಕಟ್ಟೆ ತಜ್ಞರು ಎಚ್ಚರಿಸಿದ್ದಾರೆ. ಹೀಗಾಗಿ ತೈಲ ಬೆಲೆ ಇಳಿಕೆಯಾಗುವವರೆಗೂ ಪ್ರಸ್ತುತ ದಾಸ್ತಾನು ಇರುವ ಕಚ್ಚಾತೈಲವನ್ನು ಬಳಸಿಕೊಳ್ಳಲು ಸೂಚಿಸಲಾಗುತ್ತದೆ.

ತೈಲ ಬೆಲ ಏರಿಕೆ ಗ್ರಾಹಕರಿಗೆ ಸಂಕಷ್ಟ ತಂದೊಡ್ಡುವ ಜತೆಗೆ ತೈಲ ರಿಫೈನರಿಗಳಿಗೆ, ಹೂಡಿಕೆದಾರರಿಗೆ ಸಮಸ್ಯೆಯಾಗಿದೆ. ರೂಪಾಯಿ ದರ ಡಾಲರ್ ಎದುರು ಕುಸಿತ ಕಂಡಿದ್ದು, ಷೇರು ಪೇಟೆಯಲ್ಲಿನ ಇಳಿಕೆ ಕೂಡ ಪರಿಣಾಮಕ್ಕೆ ಕಾರಣವಾಗಿದೆ.

ಭಾರತ ಅತಿ ಹೆಚ್ಚು ಪ್ರಮಾಣದಲ್ಲಿ ತೈಲ ಆಮದು ಮಾಡಿಕೊಳ್ಳುತ್ತಿದ್ದು, ರೂಪಾಯಿ ಮೌಲ್ಯ ಕುಸಿದಿರುವುದರಿಂದ ಹೆಚ್ಚಿನ ಮೊತ್ತ ಕಚ್ಚಾತೈಲಕ್ಕೆ ಪಾವತಿಸಬೇಕಿದೆ. ಆದರೆ ಕಚ್ಚಾತೈಲ ಆಮದು ಪ್ರಮಾಣದಲ್ಲಿ ಇಳಿಕೆ ಮಾಡುವಂತೆ ಸರಕಾರ ತೈಲ ಶುದ್ಧೀಕರಣಗಾರ ಮತ್ತು ಸಂಗ್ರಹಣಗಾರಗಳಿಗೆ ಸೂಚನೆ ನೀಡಿದೆ.