ಹರಾಜಾಗುವವರೆಗೆ ಕಿಂಗ್‌ಫಿಷರ್ ವಿಮಾನವನ್ನು ಸುಸ್ಥಿತಿಯಲ್ಲಿಡಲು ತೆರಿಗೆ ಇಲಾಖೆ ಯತ್ನ

ಹೊಸದಿಲ್ಲಿ: ಐಷಾರಾಮಿ ಸೌಲಭ್ಯವನ್ನು ಕಡಿಮೆ ದರದಲ್ಲಿ ಒದಗಿಸಿ ಹೆಸರು ಮಾಡಿದ್ದ ಮದ್ಯ ದೊರೆ ವಿಜಯ್ ಮಲ್ಯ ಮಾಲೀಕತ್ವದ ಕಿಂಗ್‌ಪಿಷರ್ ವಿಮಾನವೊಂದನ್ನು ತೆರಿಗೆ ಇಲಾಖೆ ಮುಂದಿನ ತಿಂಗಳು ಹರಾಜು ಕೂಗಲಿದ್ದು, ಅಲ್ಲೀವರೆಗೂ ಅದನ್ನು ಸುಸ್ಥಿತಿಯಲ್ಲಿಡಲು ಏರ್ ಇಂಡಿಯಾ ಎಂಜಿನಿಯರ್‌ಗಳು ಹರಸಾಹಸಪಡುತ್ತಿದ್ದಾರೆ.

ಮೂರು ವರ್ಷಗಳ ಹಿಂದೆ ಮಲ್ಯ ಕಂಪನಿಯ ಈ ಶೋಕಿ ವಿಮಾನವನ್ನು ಸೇವಾ ತೆರಿಗೆ ಇಲಾಖೆ ಮುಟ್ಟುಗೋಲು ಹಾಕಿ ಕೊಂಡಿತ್ತು.

ವಿಜಯ್ ಮಲ್ಯ ಇನಿಷಿಯಲ್‌ನೊಂದಿಗಿದ್ದ ವಿಟಿ-ವಿಜೆಎಂನ ಏರ್‌ಬಸ್ ಜೆಟ್ 319 ಅನ್ನು ಒಂದು ಕಾಲದಲ್ಲಿ ವಿಶ್ವದ ಐಷಾರಾಮಿ ಖಾಸಗಿ ವಿಮಾನವೆಂದೇ ಪರಿಗಣಿಸಲಾಗಿತ್ತು.

ಸುಮಾರು 1,600 ಕೋಟಿ ರೂ.ಗೆ ಈ ವಿಮಾನ ಖರೀದಿಸಿದ್ದ ಮಲ್ಯ, ಮತ್ತೆ 13 ಕೋಟಿಗಳಷ್ಟು ವ್ಯಯಿಸಿ ವಿಮಾನದಲ್ಲಿಯೇ ಬಾರ್, ಡೈನಿಂಗ್ ರೂಂ, ಬೆಡ್‌ರೂಂ, ವಾಷ್‌ರೂಂ ಮತ್ತು ಬ್ಯುಸಿನೆಸ್ ಸೆಕ್ಷನ್ ವ್ಯವಸ್ಥೆ ಮಾಡಿದ್ದರು. ಅಷ್ಟೇ ಅಲ್ಲ ವಿಮಾನದಲ್ಲಿ ನಾಲ್ಕು ಪಿಕಾಸೊ ಪೇಂಟಿಂಗ್‌ಗಳನ್ನಲ್ಲದೇ ಇತರೆ ಮೌಲ್ಯವುಳ್ಳ ಕಲಾಕೃತಿಗಳನ್ನು ಜೋಡಿಸಿದ್ದರು. ವಿಮಾನದಲ್ಲಿದ್ದ ತಿರುಪತಿ ತಿಮ್ಮಪ್ಪನ ಚಿತ್ರವೊಂದರ ನಾಮಕ್ಕೆ 15 ವಜ್ರದ ಹರಳುಗಳನ್ನು ಅಳವಡಿಸಲಾಗಿತ್ತು.

ಸುಮಾರು 1,086 ಕೋಟಿ ಸೇವಾ ತೆರಿಗೆ ಕಟ್ಟುಲು ಮಲ್ಯ ವಿಫಲವಾದ ನಂತರ ಇಲಾಖೆ ಈ ವಿಮಾನವನ್ನು ಮುಟ್ಟುಗೋಲು ಹಾಕಿಕೊಂಡಿತ್ತು. ರಾತ್ರೋ ರಾತ್ರಿ ವಿಮಾನಕ್ಕೆ ಇಲಾಖೆ ಸೀಲ್ ಹಾಕಿತ್ತು.