ಜೆಟ್‌ ಇಂಧನ ದರ ಏರಿಕೆ: ಏರ್‌ಲೈನ್ ಷೇರು ಕುಸಿತ

ಹೊಸದಿಲ್ಲಿ: ತೈಲ ಬೆಲೆ ಏರಿಕೆ ಒಂದೆಡೆ ಜನಸಾಮಾನ್ಯರನ್ನು ಕಾಡುತ್ತಿದ್ದರೆ, ಮತ್ತೊಂದೆಡೆ ಜೆಟ್ ಇಂಧನ ದರವೂ ಸೋಮವಾರ ಶೇ. 7.3 ಏರಿಕೆಯಾಗಿದ್ದು, ವಿಮಾನಯಾನ ಕಂಪನಿಗಳಿಗೆ ಸಂಕಷ್ಟ ತಂದೊಡ್ಡಿದೆ.

1 ಕಿಲೋ ಲೀ. ಏವಿಯೇಷನ್ ಟರ್ಬೈನ್ ಇಂಧನದ ಬೆಲೆ ಸೋಮವಾರ ಅ. 1ರಂದು ದಿಲ್ಲಿಯಲ್ಲಿ 74,567 ರೂ. ಮತ್ತು ಮುಂಬಯಿಯಲ್ಲಿ 74,177 ರೂ.ಗೆ ಏರಿಕೆಯಾಗಿದೆ.

ಕಳೆದ ತಿಂಗಳು ದಿಲ್ಲಿಯಲ್ಲಿ 69,461 ರೂ. ಮತ್ತು ಮುಂಬಯಿಯಲ್ಲಿ 69,161 ರೂ. ದರವಿತ್ತು. ಇಂಧನ ದರ ಏರಿಕೆಯ ಜತೆಗೆ ಡಾಲರ್ ಎದುರು ರೂಪಾಯಿ ಮೌಲ್ಯ ಇಳಿಕೆ ಕೂಡ ನಷ್ಟಕ್ಕೆ ಕಾರಣವಾಗಿದೆ.

ವಿಮಾನದ ಇಂಧನ ಬೆಲೆ ಏರಿಕೆಯಾಗುತ್ತಿದ್ದಂತೆ ಇಂಡಿಗೋ, ಜೆಟ್ ಏರ್‌ವೇಸ್ ಮತ್ತು ಸ್ಪೈಸ್ ಜೆಟ್‌ ಷೇರು ಕೂಡ ಕುಸಿತ ದಾಖಲಿಸಿದೆ.

ರೂಪಾಯಿ ಮೌಲ್ಯ ಕುಸಿತ ಮತ್ತು ಇಂಧನ ಬೆಲೆ ಏರಿಕೆ ಏರ್‌ಲೈನ್ಸ್ ಮೇಲೆ ಪರಿಣಾಮ ಬೀರಿದೆ. ಬೆಲೆ ಏರಿಕೆಯ ಪ್ರಭಾವ ದೇಶೀಯ ವಿಮಾನಯಾನದ ಮೇಲೆ ಉಂಟಾಗಿದೆ. ಹೀಗಾಗಿ ದೇಶೀಯ ವಿಮಾನಯಾನ ಟಿಕೆಟ್ ದರ ಏರಿಕೆ ಕಂಡಿದೆ ಎಂದು ಏರ್‌ಲೈನ್ ಅಧಿಕಾರಿಯೊಬ್ಬರು ಅಭಿಪ್ರಾಯಪಟ್ಟಿದ್ದಾರೆ.