ಆಕರ್ಷಕ ಡಿಸ್ಕೌಂಟ್‌: ವಿಮಾನ ಯಾನಕ್ಕೆ ಇದು ಸಕಾಲ

ಹೊಸದಿಲ್ಲಿ: ದೇಶಿ ಮತ್ತು ವಿದೇಶಿ ಏರ್‌ಲೈನ್ಸ್‌ಗಳು ನಿರ್ದಿಷ್ಟ ಅವಧಿಗೆ ಡಿಸ್ಕೌಂಟ್‌ ದರದ ಏರ್‌ ಟಿಕೆಟ್‌ಗಳನ್ನು ಪ್ರಕಟಿಸಿವೆ. ದೇಶದೊಳಗಿನ ಪ್ರಯಾಣಕ್ಕೆ 899 ರೂ. ಹಾಗೂ ವಿದೇಶ ಪ್ರಯಾಣಕ್ಕೆ 3,399 ರೂ.ಗಳ ಟಿಕೆಟ್‌ಗಳ ಕೊಡುಗೆಯನ್ನು ಪ್ರಕಟಿಸಿವೆ.

ಈ ವರ್ಷ ಕಡಿಮೆ ಸಂಚಾರ ದಟ್ಟಣೆಯ ಅವಧಿಗೆ ಸೀಟುಗಳ ಭರ್ತಿಗೊಳಿಸುವುದು ಹಾಗೂ ಮುಂಗಡ ವಹಿವಾಟಿನ ಮೂಲಕ ಆದಾಯ ಗಳಿಕೆ ಇದರ ಉದ್ದೇಶ. ವಿದೇಶಿ ಏರ್‌ಲೈನ್ಸ್‌ಗಳೂ ಭಾರತದ ಪ್ರಯಾಣಿಕರನ್ನು ಆಕರ್ಷಿಸಲು ದರ ಕಡಿತ ಪ್ರಕಟಿಸಿವೆ.

ಉದಾಹರಣೆಗೆ ಕತಾರ್‌ ಏರ್‌ವೇಸ್‌ ಶೇ.25-35ರ ತನಕ ದರ ಕಡಿತ ಪ್ರಕಟಿಸಿದೆ. ಜನವರಿ 16ರೊಳಗೆ ಟಿಕೆಟ್‌ ಬುಕ್‌ ಮಾಡುವವರಿಗೆ ಇದು ಅನ್ವಯ. ಬ್ರಿಟಿಷ್‌ ಏರ್‌ವೇಸ್‌ 100 ಕಡೆಗಳಿಗೆ ರಿಯಾಯಿತಿ ದರದ 'ಜನವರಿ ಸೇಲ್‌' ಪ್ರಕಟಿಸಿದೆ.

ಅಬುಧಾಬಿ ಮೂಲದ ಎತಿಹಾಡ್‌ ಏರ್‌ವೇಸ್‌, ಭಾರತದಿಂದ ಅಬುಧಾಬಿ, ಅಮೆರಿಕ, ಯುರೋಪ್‌, ಕೆನಡಾ, ಆಸ್ಪ್ರೇಲಿಯಾ, ಆಫ್ರಿಕಾಗೆ ಪ್ರಯಾಣಿಸುವವರಿಗೆ ಡಿಸ್ಕೌಂಟ್‌ ದರ ಘೋಷಿಸಿದೆ. 2019ರ ಜನವರಿ 29ರಿಂದ ಮಾರ್ಚ್‌ 29ರ ತನಕ ಪ್ರಯಾಣದ ಅವಧಿಗೆ ಇದು ಅನ್ವಯ.

ಇಂಡಿಗೊ ಏರ್‌ಲೈನ್ಸ್‌ ದೇಶೀಯ ಮಾರ್ಗಗಳಲ್ಲಿ 899 ರೂ. ಹಾಗೂ ಅಂತಾರಾಷ್ಟ್ರೀಯ ಮಾರ್ಗಗಳಲ್ಲಿ 3,399 ರೂ.ಗಳಿಂದ ಆರಂಭವಾಗುವ ಡಿಸ್ಕೌಂಟ್‌ ದರದ ಟಿಕೆಟ್‌ ಗಳನ್ನು ಘೋಷಿಸಿದ್ದು, ಜನವರಿ 13ರೊಳಗೆ ಟಿಕೆಟ್‌ ಬುಕ್‌ ಮಾಡಬೇಕು. ಹಾಗೂ ಪ್ರಯಾಣದ ಅವಧಿ ಜನವರಿ 24ರಿಂದ ಏಪ್ರಿಲ್‌ 15 ಆಗಿದೆ. ಗೋ ಏರ್‌ ಕೂಡ ಜನವರಿ 25ರಿಂದ ಸೆಪ್ಟೆಂಬರ್‌ 29ರ ತನಕ ಪ್ರಯಾಣ ಅವಧಿಯಿರುವ, 999 ರೂ.ಗಳಿಂದ ಆರಂಭವಾಗುವ ಟಿಕೆಟ್‌ ಸೌಲಭ್ಯವನ್ನು ಪ್ರಕಟಿಸಿದೆ.