ಆಕಾಶ್‌ ಅಂಬಾನಿ-ಶ್ಲೋಕಾ ಮದುವೆ ಮಾ.9ಕ್ಕೆ

ಹೊಸದಿಲ್ಲಿ: ರಿಲಯನ್ಸ್‌ ಸಮೂಹದ ಮುಕೇಶ್‌ ಅಂಬಾನಿ ಕುಟುಂಬಕ್ಕೆ ಮತ್ತೊಂದು ವಿವಾಹ ಸಂಭ್ರಮ. ಮುಕೇಶ್‌ ಪುತ್ರ ಆಕಾಶ್‌ ಅಂಬಾನಿ ಮತ್ತು ವಜ್ರದ ಉದ್ಯಮಿ ರಸ್ಸೆಲ್‌ ಮೆಹ್ತಾ ಪುತ್ರಿ ಶ್ಲೋಕಾ ಅವರ ವಿವಾಹ ಮಹೋತ್ಸವವು ಮಾ.9ರಂದು ನಡೆಯಲಿದೆ. ಕಳೆದ ವರ್ಷ ಈ ಜೋಡಿಯ ನಿಶ್ಚಿತಾರ್ಥ ನಡೆದಿತ್ತು.

ಮುಂಬಯಿನಲ್ಲಿನ ಬಾಂದ್ರಾ ಕುರ್ಲಾ ಕಾಂಪ್ಲೆಕ್ಸ್‌ನ ಜಿಯೊ ವಲ್ಡ್‌ ಸೆಂಟರ್‌ನಲ್ಲಿ ಮೂರು ದಿನಗಳ ಮದುವೆಯು ಮುಂದಿನ ತಿಂಗಳು ನಡೆಯಲಿದೆ. ಆರತಕ್ಷತೆಯು ಮಾ.11ರಂದು ನಡೆಯಲಿದೆ. ಸಹಜವಾಗಿಯೇ ಈ ಮದುವೆಗೆ ಖ್ಯಾತ ಉದ್ಯಮಿಗಳು, ರಾಜಕಾರಣಿಗಳು ಮತ್ತು ನಾನಾ ವಲಯಗಳ ಸೆಲಬ್ರಿಟಿಗಳ ದಂಡೇ ಆಗಮಿಸುವ ನಿರೀಕ್ಷೆ ಇದೆ. ಮದುವೆಗೆ ಮುನ್ನ ಮೂರು ದಿನಗಳ ಕಾರ್ಯಕ್ರಮವನ್ನು ಸ್ವಿಜರ್ಲೆಂಡ್‌ನಲ್ಲಿ ಆಯೋಜಿಸಲಾಗುತ್ತದೆ. ಫೆ.23ರಿಂದ 25ರ ತನಕ ನಡೆಯುವ ಕಾರ್ಯಕ್ರಮದಲ್ಲಿ ಸುಮಾರು 500 ಅತಿಥಿಗಳು ಪಾಲ್ಗೊಳ್ಳಲಿದ್ದಾರೆ. ರಣಬೀರ್‌ ಕಪೂರ್‌, ಕರಣ್‌ ಜೋಹಾರ್‌ ಸೇರಿದಂತೆ ಬಾಲಿವುಡ್‌ ತಾರಾ ಬಳಗವೇ ಮದುವೆಗೆ ಹಾಜರಾಗುವ ನಿರೀಕ್ಷೆ ಇದೆ.

ಕಳೆದ ವರ್ಷದ ಮಾರ್ಚ್‌ನಲ್ಲಿ ಆಕಾಶ್‌ ಅಂಬಾನಿಯು ತಮ್ಮ ಬಾಲ್ಯದ ಗೆಳತಿ ಶ್ಲೋಕಾ ಮೆಹ್ತಾಗೆ ಪ್ರೀತಿಯನ್ನು ನಿವೇದಿಸಿದ್ದರು. ಗೋವಾದಲ್ಲಿ ಇಬ್ಬರೂ ತಮ್ಮ ಆಪ್ತರ ಜೊತೆ ಪಾರ್ಟಿ ಮಾಡಿದ್ದರು. 2018ರ ಅಂತ್ಯದಲ್ಲಿ ಮುಕೇಶ್‌ ಅಂಬಾನಿ ಅವರ ಪುತ್ರಿ ಇಶಾ ಮತ್ತು ಪಿರಮಲ್‌ ಅವರ ಅದ್ಧೂರಿ ವಿವಾಹ ನಡೆದಿತ್ತು.