ಮೋಜು ಮಸ್ತಿ ಪ್ರಿಯರಿಗೆ ಶಾಕ್‌, ಗೋವಾದಲ್ಲಿ ಏ.1ರಿಂದ ಮದ್ಯ ದುಬಾರಿ

ಪಣಜಿ: ಗೋವಾದಲ್ಲಿ ಆಲ್ಕೋಹಾಲ್‌ ದರವನ್ನು ಶೇ.20ರಿಂದ 50ರಷ್ಟು ಏರಿಕೆ ಮಾಡಲು ಅಲ್ಲಿನ ಸರಕಾರ ನಿರ್ಧರಿಸಿದೆ. ಏಪ್ರಿಲ್‌ 1ರಿಂದ ಇದು ಜಾರಿಗೆ ಬರಲಿದ್ದು, ಎಲ್ಲ ರೀತಿಯ ಮದ್ಯಗಳೂ ದುಬಾರಿಯಾಗಲಿವೆ.

ಬಿಜೆಪಿ ಆಡಳಿತಾರೂಢ ಸರಕಾರ ಗೋವಾದಲ್ಲಿದ್ದು ಮುಖ್ಯಮಂತ್ರಿ ಪ್ರಮೋದ್‌ ಸಾವಂತ್‌ ಅವರು, ಆಲ್ಕೊಹಾಲ್‌ ದರ ಏರಿಸುವುದಾಗಿ ವಿಧಾನಸಭೆಯಲ್ಲಿ ಪ್ರಕಟಿಸಿದ್ದಾರೆ. ಬಜೆಟ್‌ ಪ್ರಕಟಿಸಿದ ಅವರು, ''ಅಬಕಾರಿ ಸುಂಕದ ಏರಿಕೆ ಮತ್ತು ಆಲ್ಕೊಹಾಲ್‌ ಮಾರಾಟಗಾರರಿಗೆ ನೀಡಬೇಕಾದ ಶುಲ್ಕಗಳು ಹೆಚ್ಚಿದ್ದು, ಆಲ್ಕೊಹಾಲ್‌ ದರವನ್ನೂ ಏರಿಕೆ ಮಾಡಲಾಗಿದೆ,'' ಎಂದಿದ್ದಾರೆ.

ದರ ಏರಿಕೆಯ ಹೊರತಾಗಿಯೂ, ಇತರೆ ರಾಜ್ಯಗಳಿಗಿಂತಲೂ ಗೋವಾದಲ್ಲಿ ಮದ್ಯದ ದರ ಕಡಿಮೆಯೇ ಇದೆ. ಆಲ್ಕೋಹಾಲ್‌ ಮೇಲಿನ ಅಬಕಾರಿ ಸುಂಕ ಏರಿಕೆಯಿಂದ ರಾಜ್ಯ ಸರಕಾರಕ್ಕೆ 100 ಕೋಟಿ ರೂ. ಹೆಚ್ಚುವರಿ ಆದಾಯ ಬರುವ ಅಂದಾಜಿದೆ.

ಮಹದಾಯಿ ನೀರನ್ನು ತಿರುಗಿಸಿದ್ದು ನಿಜ: ಕದ್ದು ಬಳಕೆ ಒಪ್ಪಿಕೊಂಡ ಗೋವಾ ಸಿಎಂ

''ಬಡವರು, ಶ್ರೀಸಾಮಾನ್ಯರಿಗೆ ಹೆಚ್ಚು ತೊಡಕಾಗದಂತೆ ತೆರಿಗೆಗಳನ್ನು ಅಲ್ಪ ಮಟ್ಟದಲ್ಲಿ ಏರಿಕೆ ಮಾಡಲಾಗಿದೆ. ಅಬಕಾರಿ ಸುಂಕಗಳು, ಸ್ಟಾಂಪ್‌ ಡ್ಯೂಟಿ, ಕೋರ್ಟ್‌ ಶುಲ್ಕಗಳನ್ನು ಅಲ್ಪ ಪ್ರಮಾಣದಲ್ಲಿ ಏರಿಸಲಾಗಿದೆ. ಭೂಮಿ ದರಗಳನ್ನೂ ಪರಿಷ್ಕರಿಸಲಾಗಿದೆ,'' ಎಂದು ಮುಖ್ಯಮಂತ್ರಿ ಹೇಳಿದ್ದಾರೆ.