ದಿನಕ್ಕೆ 12 ಗಂಟೆ ಕೆಲಸ ಮಾಡುವವರು ಬೇಕು: ಜಾಕ್‌ ಮಾ

ಬೀಜಿಂಗ್‌: ಚೀನಾ ಮೂಲದ ಬಹು ರಾಷ್ಟ್ರೀಯ ಇ-ಕಾಮರ್ಸ್‌ ಕಂಪನಿ ಆಲಿಬಾಬಾ ಗ್ರೂಪ್‌ನ ಸ್ಥಾಪಕ ಜಾಕ್‌ ಮಾ ಅವರು, ದಿನಕ್ಕೆ 12 ಗಂಟೆಗಳಂತೆ ವಾರದ 6 ದಿನಗಳಲ್ಲಿ ಶ್ರಮಿಸಬಲ್ಲ ಉದ್ಯೋಗಿಗಳು ಮಾತ್ರ ತಮ್ಮ ಕಂಪನಿಗೆ ಬೇಕು, ಉಳಿದವರಿಗೆ ಜಾಗವಿಲ್ಲ ಎಂದು ಹೇಳಿದ್ದಾರೆ. ಈ ಮೂಲಕ ಚೀನಿ ಇಂಟರ್‌ನೆಟ್‌ ಕಂಪನಿಗಳಲ್ಲಿ ಕಂಡು ಬರುವ ಓವರ್‌ಟೈಮ್‌ ವರ್ಕ್‌ ಕಲ್ಚರ್‌ ಅನ್ನು ಬಲವಾಗಿ ಸಮರ್ಥಿಸಿಕೊಂಡಿದ್ದಾರೆ.

ಕಂಪನಿಯ ಆಂತರಿಕ ಸಭೆಯೊಂದರಲ್ಲಿ ಉದ್ಯೋಗಿಗಳನ್ನು ಉದ್ದೇಶಿಸಿ ಮಾತನಾಡಿದ ಜಾಕ್‌ ಮಾ, ಟಿಕಪಿಕಲ್‌ ಆಗಿ 8 ಗಂಟೆಗಳ ಆಫೀಸ್‌ ಲೈಫ್‌ ಸ್ಟೈಲ್‌ ಬಯಸುವ ಉದ್ಯೋಗಿಗಳು ಆಲಿಬಾಬಾ ಗ್ರೂಪ್‌ಗೆ ಅಗತ್ಯವಿಲ್ಲ ಎಂದರು.

ಚೀನಾದ ತಂತ್ರಜ್ಞಾನ ಕಂಪನಿಗಳ ವಲಯದಲ್ಲಿ '996 ಗಂಟೆ ದುಡಿಯುವ ಸಿಸ್ಟಮ್‌' ಚಾಲ್ತಿಯಲ್ಲಿದೆ. ಅಂದರೆ ಬೆಳಗ್ಗೆ 9 ಗಂಟೆಯಿಂದ ರಾತ್ರಿ 9 ಗಂಟೆಗಳ ಕಾಲ ವಾರದ 6 ದಿನಗಳ ದುಡಿಮೆ. ಚೀನಾದ ಕಾರ್ಮಿಕ ಕಾನೂನುಗಳ ಪ್ರಕಾರ ದಿನಕ್ಕೆ 8 ಗಂಟೆಗಿಂತ ಹೆಚ್ಚು ಕಾಲ ಸಿಬ್ಬಂದಿಯನ್ನು ದುಡಿಸುವಂತಿಲ್ಲ. ವಾರಕ್ಕೆ ಸರಾಸರಿ 44 ಗಂಟೆಗಿಂತ ಹೆಚ್ಚು ಕೆಲಸ ಸಲ್ಲದು. ಹೀಗಾಗಿ '996 ವರ್ಕಿಂಗ್‌ ಅವರ್‌ ಸಿಸ್ಟಮ್‌'ಗೆ ಟೀಕೆಯೂ ಇದೆ.

ದಿನಕ್ಕೆ 12 ಗಂಟೆ ದುಡಿಯುವ ಸಾಮರ್ಥ್ಯ‌ ಯುವಜನತೆಗೆ ಇರುವುದು ದೊಡ್ಡ ಆಶೀರ್ವಾದ. ಇದನ್ನು ಬಳಸಿಕೊಳ್ಳಬೇಕು ಎಂದು ಚೀನಾದ ಶ್ರೀಮಂತ ಉದ್ಯಮಿಯೂ ಆಗಿರುವ ಜಾಕ್‌ ಮಾ ಹೇಳಿದ್ದಾರೆ.

ಚೀನಾದ ಟೆಕ್‌ ಉದ್ದಿಮೆ ವಲಯದಲ್ಲಿ ದೀರ್ಘ ಅವಧಿಯ ಕೆಲಸಗಳು, ಒತ್ತಡದ ಪರಿಣಾಮ ಉದ್ಯೋಗಿಗಳು, ಮುಖ್ಯವಾಗಿ ಸ್ಟಾರ್ಟಪ್‌ಗಳ ಸ್ಥಾಪಕರು ಅಕಾಲಿಕ ಸಾವಿಗೀಡಾಗಿರುವ ಬಗ್ಗೆ ವರದಿಗಳಾಗಿವೆ. '996' ವರ್ಕ್‌ ಶೆಡ್ಯೂಲನ್ನು ಅನುಸರಿಸಿದರೆ ಉದ್ಯೋಗಿಗಳು ಐಸಿಯುಗೆ (ತುರ್ತು ನಿಗಾ ಘಟಕ) ಸ್ಥಳಾಂತರವಾಗುವ ಅಪಾಯ ಹೆಚ್ಚು ಎಂದು ಕೆಲವರು ಟೀಕಿಸಿದ್ದಾರೆ. ಮತ್ತೆ ಕೆಲವರು ದಿನಕ್ಕೆ 12 ಗಂಟೆ ದುಡಿಯುವುದು ಅಪರಾಧವೇನಲ್ಲ ಎಂದೂ ಜಾಕ್‌ ಮಾ ನಿಲುವನ್ನು ಬೆಂಬಲಿಸಿದ್ದಾರೆ.