ಆನ್‌ಲೈನ್‌ ಡಿಸ್ಕೌಂಟ್‌ಗೆ ಅಂಕುಶ?: ದೇಶೀಯ ಇ - ಕಾಮರ್ಸ್, ರೀಟೇಲ್ ಕಂಪನಿಗಳಿಗೆ ಉತ್ತೇಜನ

ಹೊಸದಿಲ್ಲಿ: ಕೇಂದ್ರ ಸರಕಾರ ನೂತನ ಇ-ವಾಣಿಜ್ಯ ನೀತಿಯ ಕರಡು ನೀತಿಯನ್ನು ಸಿದ್ಧಪಡಿಸಿದ್ದು, ಭಾರತೀಯ ಮೂಲದ ಆನ್‌ಲೈನ್‌ ಉದ್ದಿಮೆಗಳ ಹಿತಾಸಕ್ತಿಯನ್ನು ಬಲವಾಗಿ ಪ್ರತಿಪಾದಿಸಿದೆ.

ಇದರ ಪರಿಣಾಮ ಮೆಜಾನ್‌, ಫ್ಲಿಪ್‌ಕಾರ್ಟ್‌ ಇತ್ಯಾದಿ ವಿದೇಶಿ ಮೂಲದ ಇ-ಕಾಮರ್ಸ್‌ ತಾಣಗಳಲ್ಲಿ ಗ್ರಾಹಕರಿಗೆ ನೀಡಲಾಗುತ್ತಿದ್ದ ಭಾರಿ ಡಿಸ್ಕೌಂಟ್‌ಗಳಿಗೆ ಶೀಘ್ರದಲ್ಲಿಯೇ ಕಡಿವಾಣ ಬೀಳುವ ನಿರೀಕ್ಷೆ ಇದೆ.

ಉತ್ಪನ್ನಗಳ ಮಾರಾಟ ದರದ ಮೇಲೆ ಇ-ಕಾಮರ್ಸ್‌ ದಿಗ್ಗಜ ಸಮೂಹಗಳು ಯಾವುದೇ ''ನೇರ ಅಥವಾ ಪರೋಕ್ಷ'' ಪ್ರಭಾವ ಬೀರುವುದನ್ನು ನಿರ್ಬಂಧಿಸಬೇಕು ಎಂದು ಕರಡು ನೀತಿಯಲ್ಲಿ ಶಿಫಾರಸು ಮಾಡಲಾಗಿದೆ. ಹೀಗಾಗಿ ಇ-ಕಾಮರ್ಸ್‌ ಕಂಪನಿಗಳ ರಿಟೇಲ್‌ ಮಾರುಕಟ್ಟೆ ತಂತ್ರಗಾರಿಕೆಗೆ ನಿರ್ಬಂಧ ಉಂಟಾಗಲಿದೆ. ಇದರ ಪರಿಣಾಮ ಗ್ರಾಹಕರಿಗೆ ನೀಡುವ ಭಾರಿ ಡಿಸ್ಕೌಂಟ್‌ಗೆ ಸದ್ಯಕ್ಕೆ ಕತ್ತರಿ ಪ್ರಯೋಗವಾದರೂ, ಭಾರತೀಯ ಮೂಲದ ರಿಟೇಲ್‌ ಹಾಗೂ ಆನ್‌ಲೈನ್‌ ವಲಯಕ್ಕೆ ಸಹಕಾರಿಯಾಗಲಿದೆ.

ಆನ್‌ಲೈನ್‌ ಕಂಪನಿಗಳು ತಮಗೆ ಸಂಬಂಧವಿರುವ ಕಂಪನಿಗಳಿಂದ, ಮಾರುಕಟ್ಟೆಯಲ್ಲಿ ದರದ ಮೇಲೆ ಪ್ರಭಾವ ಬೀರುವ ರೀತಿಯಲ್ಲಿ ಬ್ರ್ಯಾಂಡೆಡ್‌ ಮೊಬೈಲ್‌ ಫೋನ್‌, ವೈಟ್‌ ಗೂಡ್ಸ್‌, ಫ್ಯಾಷನ್‌ ಉತ್ಪನ್ನಗಳನ್ನು ಭಾರಿ ಪ್ರಮಾಣದಲ್ಲಿ ಸಗಟು ಖರೀದಿಸಿ ಮಾರಾಟ ಮಾಡುವುದನ್ನೂ ಕರಡು ನೀತಿಯಲ್ಲಿ ನಿರ್ಬಂಧಿಸಲಾಗಿದೆ.

ಹೊಸ ನೀತಿಯಡಿ ಭಾರತೀಯ ಮೂಲದ ಹಾಗೂ ಶೇ.100ರಷ್ಟು ದೇಶೀಯವಾಗಿ ಉತ್ಪಾದಿಸುವ ಸರಕುಗಳನ್ನು ಮಾತ್ರ ಹೆಚ್ಚುವರಿ ದಾಸ್ತಾನು ಇಟ್ಟುಕೊಳ್ಳಲು ಅವಕಾಶವಿದೆ.

ವಿದೇಶಿ ಮೂಲದ ಇ-ಕಾಮರ್ಸ್‌ ಕಂಪನಿಗಳಿಗೆ ಇಂಥ ಸಡಿಲಿಕೆಯ ನಿಯಮಗಳು ಅನ್ವಯವಾಗುವುದಿಲ್ಲ. ಭಾರಿ ಡಿಸ್ಕೌಂಟ್‌ಗಳಿಗೆ ನಿರ್ದಿಷ್ಟ ಅವಧಿಯನ್ನೂ ವಿಧಿಸಲಾಗಿದೆ. ಭಾರತೀಯ ಮೂಲದ ಉತ್ಪನ್ನಗಳಿಗೆ ಹಲವು ರಿಯಾಯಿತಿಗಳನ್ನು ಘೋಷಿಸಲಾಗಿದೆ. ಇದು ದೇಶೀಯ ಇ-ಮಾರುಕಟ್ಟೆಗೆ ಪೂರಕವಾಗಿರಲಿದೆ.

* ಆನ್‌ಲೈನ್‌ ಮಾರುಕಟ್ಟೆಯಲ್ಲಿ ಆರೋಗ್ಯಕರ ಸ್ಪರ್ಧೆಗೆ ಅವಕಾಶ

* ದೇಶೀಯ ಉತ್ಪಾದನೆಗೂ ಉತ್ತೇಜನ ನೀಡುವ ಉದ್ದೇಶ

* ಭಾರತೀಯ ಮೂಲದ ಸಂಸ್ಥಾಪಕರಿಗೆ ಕಂಪನಿಯಲ್ಲಿ ಹೆಚ್ಚಿನ ಹಕ್ಕು