ಹೊಸದಿಲ್ಲಿ: ಅಮೆರಿಕದ ಇ-ಕಾಮರ್ಸ್‌ ದಿಗ್ಗಜ ಅಮೆಜಾನ್‌ಗೆ ಭಾರತೀಯ ಮಾರುಕಟ್ಟೆಯಲ್ಲಿ ಬೆಂಗಳೂರು ಮೂಲದ ಫ್ಲಿಪ್‌ಕಾರ್ಟ್‌ ತೀವ್ರ ಸ್ಪರ್ಧೆ ನೀಡುತ್ತಿದೆ. ಏತನ್ಮಧ್ಯೆ, ಅಮೆಜಾನ್‌ ಇಂಡಿಯಾದಲ್ಲಿನ ಮಾರಾಟಗಾರರ ಸಂಖ್ಯೆ 3 ಲಕ್ಷವನ್ನೂ ದಾಟಿದೆ. ಭಾರತದಲ್ಲಿ ಕಾರ್ಯಾಚರಣೆ ಆರಂಭಿಸಿದ 5 ವರ್ಷಕ್ಕೂ ಕಡಿಮೆ ಅವಧಿಯಲ್ಲಿಯೇ ಅಮೆಜಾನ್‌ ಇಂಡಿಯಾ ಹೆಚ್ಚಿನ ಮಾರಾಟಗಾರರನ್ನು ಆಕರ್ಷಿಸಿದೆ.
ಕಳೆದ 7 ತಿಂಗಳಲ್ಲಿಯೇ ಒಂದು ಲಕ್ಷ ವರ್ತಕರನ್ನು ತನ್ನತ್ತ ಅಮೆಜಾನ್‌ ಆಕರ್ಷಿಸಿದೆ. ಫ್ಲಿಪ್‌ಕಾರ್ಟ್‌ಗೆ ತೀವ್ರ ಸ್ಪರ್ಧೆ ನೀಡಿ, ಭಾರತದ ಇ-ಕಾಮರ್ಸ್‌ ವಲಯದಲ್ಲಿ ನೆಲೆ ನಿಲ್ಲಲು ನೂರಾರು ಕೋಟಿ ಬಂಡವಾಳವನ್ನು ಹೂಡಿಕೆ ಮಾಡುತ್ತಿದೆ. ಮೂಲ ಸೌಕರ್ಯ ಅಭಿವೃದ್ಧಿಗೂ ಒತ್ತು ನೀಡಿದೆ. ಸುದ್ದಿ ಸಂಸ್ಥೆ ಜತೆ ಮಾತನಾಡಿದ ಅಮೆಜಾನ್‌ ಇಂಡಿಯಾದ ಮಾರಾಟಗಾರರ ಸೇವೆ ವಿಭಾಗದ ನಿರ್ದೇಶಕ ಮತ್ತು ಜಿಎಂ ಗೋಪಾಲ್‌ ಪಿಳ್ಳೈ, ''ಎರಡನೇ ಮತ್ತು ಮೂರನೇ ಹಂತದ ನಗರಗಳಲ್ಲಿ ಮಾರಾಟಗಾರರ ಸಹಭಾಗಿತ್ವ ಮತ್ತು ಪ್ರೋತ್ಸಾಹ ನಮಗೆ ವ್ಯಕ್ತವಾಗಿದೆ. ಕಳೆದ ಒಂದು ವರ್ಷದಲ್ಲಿ ಮೆಟ್ರೋಯೇತರ ಮತ್ತು ಸಣ್ಣ ನಗರಗಳಿಗೂ ಸೇವೆ ವಿಸ್ತರಿಸಿದ್ದೇವೆ,'' ಎಂದಿದ್ದಾರೆ.
ಸರಕಾರದ ನಾನಾ ಇಲಾಖೆ, ಕುಶಲಕರ್ಮಿಗಳು, ನೇಕಾರರು, ನಾನಾ ಕಂಪನಿಗಳ ಜತೆ ಒಪ್ಪಂದ ಮಾಡಿಕೊಂಡಿದ್ದು, ಆನ್‌ಲೈನ್‌ ಮಾರುಕಟ್ಟೆ ವಿಸ್ತರಣೆಗೆ ಮುಂದಾಗಿದ್ದೇವೆ.