ಅಮೆಜಾನ್‌ಗೆ ಶೇ.29ರಷ್ಟು ನಷ್ಟ

ಬೆಂಗಳೂರು: ಜಾಗತಿಕ ಮಟ್ಟದಲ್ಲಿ ಇ-ಕಾಮರ್ಸ್‌ ದಿಗ್ಗಜ ಅಮೆಜಾನ್‌ ಕಂಪನಿಯ ನಷ್ಟ ಶೇ.29ರಷ್ಟಿದೆ. 2018ರ ಮಾರ್ಚ್‌ ಅಂತ್ಯಕ್ಕೆ ಕಂಪನಿ 622 ದಶಲಕ್ಷ ಡಾಲರ್‌ ನಷ್ಟ ಅನುಭವಿಸಿದೆ (ಸುಮಾರು 41 ಸಾವಿರ ಕೋಟಿ ರೂ.). ಕಳೆದ ವರ್ಷದ ಇದೇ ಅವಧಿಯಲ್ಲಿ ನಷ್ಟದ ಪ್ರಮಾಣ 481 ದಶಲಕ್ಷ ಡಾಲರ್‌ನಷ್ಟಿತ್ತು(ಅಂದಾಜು 32 ಸಾವಿರ ಕೋಟಿ ರೂ.).

ಜಾಗತಿಕವಾಗಿ ವರ್ಷದಿಂದ ವರ್ಷಕ್ಕೆ ಅಮೆಜಾನ್‌ನ ನಷ್ಟ ಮುಂದುವರಿದಿದ್ದು, ಭಾರತದಲ್ಲಿ ಹೂಡಿಕೆಯ ಪ್ರಮಾಣ ಏರಿಕೆಯಾಗಿರುವುದು ಇದಕ್ಕೆ ಪ್ರಮುಖ ಕಾರಣ ಎನ್ನಲಾಗಿದೆ. ಭಾರತದಲ್ಲಿ ಫ್ಲಿಪ್‌ಕಾರ್ಟ್‌ಗೆ ತೀವ್ರ ಸ್ಪರ್ಧೆ ನೀಡಿ, ಮಾರುಕಟ್ಟೆಯನ್ನು ಹಿಡಿತಕ್ಕೆ ಪಡೆಯಲು ಅಮೆಜಾನ್‌ ಭಾರಿ ಹೂಡಿಕೆ ಮಾಡುತ್ತಿದೆ. ಮೂಲಸೌಕರ್ಯಗಳಿಗೆ ಒತ್ತು ನೀಡಿದ್ದು ಮಾರುಕಟ್ಟೆ ವಿಸ್ತರಣೆ ಮಾಡುತ್ತಿದೆ.

''ಜಾಗತಿಕ ಮಟ್ಟದಲ್ಲಿನ ನಷ್ಟದ ನಡುವೆಯೂ ಅಮೆಜಾನ್‌, ಭಾರತದಲ್ಲಿ ಇನ್ನಷ್ಟು ಹೂಡಿಕೆಯನ್ನು ಮುಂದುವರಿಸಲಿದೆ. ಮಾರಾಟ ಮತ್ತು ಗ್ರಾಹಕರ ಸಂಖ್ಯೆ ವೃದ್ಧಿಸಿಕೊಳ್ಳುವ ವಿಷಯಗಳಲ್ಲಿ ಉತ್ತಮ ಫಲಿತಾಂಶ ದೊರೆತಿದೆ. ಗ್ರಾಹಕರಿಗೆ ಉತ್ತಮ ಕೊಡುಗೆ ನೀಡಲು ಕಂಪನಿ ಬದ್ಧವಾಗಿದೆ,'' ಎಂದು ಅಮೆಜಾನ್‌ ಇಂಡಿಯಾದ ಸಿಇಒ ಬ್ರಿಯಾನ್‌ ಒಲ್ಸಾವಸ್ಕಿ ಹೇಳಿದ್ದಾರೆ.

ಅಮೆರಿಕದಲ್ಲಿ ಅಮೆಜಾನ್‌ 10 ಕೋಟಿ ಪ್ರೈಮ್‌ ಸದಸ್ಯರನ್ನು ಹೊಂದಿದೆ.