ಚೀನಾ vs ಅಮೆರಿಕ: ವಾಣಿಜ್ಯ ಸಮರ ಶುರು

ಬೀಜಿಂಗ್‌/ವಾಷಿಂಗ್ಟನ್‌: ಚೀನಾದ 34 ಶತಕೋಟಿ ಡಾಲರ್‌ ಮೌಲ್ಯದ ಆಮದು ವಸ್ತುಗಳ ಮೇಲೆ ಅಮೆರಿಕ ಸುಂಕ ವಿಧಿಸಿದ್ದು, ಶುಕ್ರವಾರದಿಂದ ಜಾರಿಗೆ ಬಂದಿದೆ. ಆ ಮೂಲಕ ಬೃಹತ್‌ ಆರ್ಥಿಕತೆ ಹೊಂದಿರುವ ವಿಶ್ವದ ಎರಡು ಪ್ರಮುಖ ದೇಶಗಳ ನಡುವಿನ ವಾಣಿಜ್ಯ ಸಮರ ಅಧಿಕೃತವಾಗಿ ಆರಂಭಗೊಂಡಿದೆ.

ಚೀನಾದ ಸರಕುಗಳಿಗೆ ಶೇ.25ರಷ್ಟು ಆಮದು ಸುಂಕವನ್ನು ಅಮೆರಿಕ ಏರಿದೆ. ಈ ಕ್ರಮವನ್ನು ಖಂಡಿಸಿರುವ ಚೀನಾ, ''ವಿಶ್ವದ ಆರ್ಥಿಕತೆಯ ಇತಿಹಾಸದಿಲ್ಲಿಯೇ ಅಮೆರಿಕ ಈಗ ದೊಡ್ಡ ವಾಣಿಜ್ಯ ಸಮರವನ್ನು ಆರಂಭಿಸಿದೆ,'' ಎಂದು ಹೇಳಿದೆ. ಅಲ್ಲದೇ, ಅಮೆರಿಕ ಏಟಿಗೆ ಎದುರೇಟು ನೀಡುವಂತೆ, ಅಮೆರಿಕದ 545 ಉತ್ಪನ್ನಗಳ ಮೇಲೆ ಶೇ.25ರಷ್ಟು ಆಮದು ಸುಂಕ ಏರಿದೆ. ಇದು ಸರಿ ಸುಮಾರು 34 ಶತಕೋಟಿ ಡಾಲರ್‌ ಮೌಲ್ಯವನ್ನು ಹೊಂದಿದೆ.

''ಚೀನಾ ವಿರುದ್ಧ ಆಮದು ಸುಂಕದ ಅಸ್ತ್ರ ಪ್ರಯೋಗಿಸಲು ಅಮೆರಿಕ ಮುಂದಾಯಿತು. ನಾವೂ ಸೂಕ್ತ ಕ್ರಮ ಕೈಗೊಂಡಿದ್ದೇವೆ,'' ಎಂದು ಚೀನಾದ ವಿದೇಶಾಂಗ ಸಚಿವಾಲಯದ ವಕ್ತಾರರು ಪ್ರತಿಕ್ರಿಯಿಸಿದ್ದಾರೆ.

ಅಮೆರಿಕದ ತಂತ್ರಜ್ಞಾನ ಮತ್ತು ಬೌದ್ಧಿಕ ಆಸ್ತಿ ಚೀನಾಕ್ಕೆ ವರ್ಗವಾಗುವುದನ್ನು ತಡೆಯಲು ಮತ್ತು ಅಮೆರಿಕದ ಉದ್ಯೋಗ ಮತ್ತು ಆರ್ಥಿಕತೆ ಹೆಚ್ಚಿಸಲು ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಸ್ವಹಿತಾಸಕ್ತಿಯ ಕ್ರಮಗಳನ್ನು ಕೈಗೊಳ್ಳುತ್ತಿದ್ದಾರೆ. ಈ ನಿಟ್ಟಿನಲ್ಲಿ ಚೀನಾ ವಿರುದ್ಧದ ವಾಣಿಜ್ಯ ಸಮರ ಗಮನ ಸೆಳೆದಿದೆ. ಚೀನಾದ ಸರಕುಗಳ ಮೇಲಿನ ಸುಂಕ, ಬೌದ್ಧಿಕ ಆಸ್ತಿಯ ಕಳ್ಳತನ ಎಂದು ವರ್ಗೀಕರಿಸುವ ಪ್ರತಿಕ್ರಿಯೆಗೆ ಅನುಗುಣವಾಗಿದೆ ಎಂದು ಅಮೆರಿಕ ಹೇಳಿದೆ.

ಮುಂದಿನ ದಿನಗಳಲ್ಲಿ ಇನ್ನೂ 16 ಶತಕೋಟಿ ಡಾಲರ್‌ ಮೌಲ್ಯದ ಚೀನಾ ಸರಕುಗಳ ಮೇಲೆ ಆಮದು ಸುಂಕ ವಿಧಿಸಲು ಅಮೆರಿಕ ಚಿಂತನೆ ನಡೆಸಿದೆ. ವಾಣಿಜ್ಯ ಸಮರದ ಪ್ರಭಾವ ಏಷ್ಯಾದ ಷೇರು ಮಾರುಕಟ್ಟೆ ಮೇಲೆ ಅಲ್ಪ ಪ್ರಮಾಣದಲ್ಲಿ ಕಂಡು ಬಂತು.

ಟ್ರಂಪ್‌ ಅವರ ಸರಕಾರವು ಈಗಾಗಲೇ ಐರೋಪ್ಯ ಒಕ್ಕೂಟ, ಮೆಕ್ಸಿಕೊ, ಕೆನಡಾದಿಂದ ಆಮದಾಗುವ ವಾಷಿಂಗ್‌ಮೆಷಿನ್‌ಗಳು ಮತ್ತು ಸೌರ ಫಲಕಗಳು ಮತ್ತಿತರ ಸರಕುಗಳ ಮೇಲೆ ಹೆಚ್ಚಿನ ಶುಲ್ಕಗಳನ್ನು ಹೇರಿದೆ. ಚೀನಾ ಸರಕುಗಳ ಮೇಲೆ 50 ಶತಕೋಟಿ ಡಾಲರ್‌ ಮೊತ್ತದ ಸುಂಕ ವಿಧಿಸಲಾಗುವುದು ಎಂದು ಕಳೆದ ಮಾರ್ಚ್‌ನಲ್ಲಿ ಟ್ರಂಪ್‌ ಎಚ್ಚರಿಸಿದ್ದರು. ಇದಕ್ಕೆ ಪ್ರತಿಯಾಗಿ ತಾನು ಕೂಡ ಕಾರು, ವಿಮಾನ ಮತ್ತು ಸೊಯಾಬೀನ್‌ ರೀತಿಯ ಅಮೆರಿಕನ್‌ ಸರಕುಗಳ ಮೇಲೆ 50 ಶತಕೋಟಿ ಡಾಲರ್‌ ಪ್ರತಿಕಾರ ತೆರಿಗೆ ವಿಧಿಸುವುದಾಗಿ ಈ ಹಿಂದೆ ಚೀನಾ ಕೂಡ ಬೆದರಿಕೆ ಒಡ್ಡಿತ್ತು.