ಮಾರುಕಟ್ಟೆಗೆ ನ್ಯಾನೊ ಡಿಎಪಿ ದ್ರವ ಗೊಬ್ಬರ, ವಾಣಿಜ್ಯ ಮಾರಾಟಕ್ಕೆ ಚಾಲನೆ ನೀಡಿದ ಅಮಿತ್‌ ಶಾ

ಹೊಸದಿಲ್ಲಿ: ಇಪ್ಕೋದ ನ್ಯಾನೊ ದ್ರವ (ಲಿಕ್ವಿಡ್) ರೂಪದ ಡಿಎಪಿ ರಸಗೊಬ್ಬರವನ್ನು ದೇಶದಲ್ಲಿ ವಾಣಿಜ್ಯ ಮಾರಾಟಕ್ಕೆ ಕೇಂದ್ರ ಸಹಕಾರ ಸಚಿವ ಅಮಿತ್ ಶಾ ಅವರು ಬುಧವಾರ ಬಿಡುಗಡೆ ಮಾಡಿದರು.“ನ್ಯಾನೊ (ದ್ರವ) ಗೊಬ್ಬರವನ್ನೇ ರೈತರು ಬಳಸಬೇಕು. ಏಕೆಂದರೆ ಇದು ಮಣ್ಣಿನ ಆರೋಗ್ಯದ ಮೇಲೆ ದುಷ್ಪರಿಣಾಮ ಬೀರುವುದಿಲ್ಲ. ಬದಲಿಗೆ ಕೃಷಿ ಉತ್ಪಾದಕತೆಯನ್ನು ಹೆಚ್ಚಿಸುತ್ತದೆ. ರೈತರು ಹೆಚ್ಚಿನ ಪ್ರಮಾಣದಲ್ಲಿ ದ್ರವ ಡಿಪಿಪಿಯನ್ನೇ ಉಪಯೋಗಿಸಬೇಕು," ಎಂದು ಸಚಿವ ಅಮಿತ್ ಶಾ ಅವರು ರೈತರನ್ನುದ್ದೇಶಿಸಿ ಹೇಳಿದರು.

"ನ್ಯಾನೊ ದ್ರವ ಡಿಎಪಿ ಬಳಕೆಯು ರಸಗೊಬ್ಬರ ಉತ್ಪಾದನೆಯಲ್ಲಿ ಭಾರತವು ಸ್ವಾವಲಂಬಿಯಾಗಲು ಸಹಾಯ ಮಾಡುತ್ತದೆ," ಎಂದು ಅವರು ವಿವರಿಸಿದರು.

Nano Urea: ವಿಶ್ವದ ಮೊದಲ ಪರಿಸರ ಸ್ನೇಹಿ ಗೊಬ್ಬರ 'ನ್ಯಾನೋ ಯೂರಿಯಾ': ಇಫ್ಕೋ ಸಂಸ್ಥೆಯ ಹೊಸ ಆವಿಷ್ಕಾರ
ಅಗ್ಗದ ಬೆಲೆಯಲ್ಲಿ ಲಭ್ಯ

ನ್ಯಾನೊ ಲಿಕ್ವಿಡ್ ಡಿಎಪಿಯ 500 ಎಂಎಲ್ ಬಾಟಲಿಗೆ 600 ರೂ. ನಿಗದಿಯಾಗಿದೆ. ಇದು ಸಾಂಪ್ರದಾಯಿಕ ಡಿಎಪಿಯ ಪ್ರಸ್ತುತ ಬೆಲೆಯ ಅರ್ಧಕ್ಕಿಂತ ಕಡಿಮೆಯಾಗಿದೆ. ಇದು ವಿಶ್ವದ ಮೊದಲ ನ್ಯಾನೊ ದ್ರವ ಡಿಎಪಿಯಾಗಿದ್ದು, ಭಾರತವು ತನ್ನ ಆಮದು ಅವಲಂಬನೆಯನ್ನು ಕಡಿತಗೊಳಿಸಲು ನೆರವಾಗಲಿದೆ.

ರಸಗೊಬ್ಬರಕ್ಕಾಗಿ ರೈತರು ಸರದಿ ಸಾಲಲ್ಲಿ ಕಾಯುವ ಪರಿಸ್ಥಿತಿ ದೇಶದಲ್ಲಿದೆ. ಮುಂಬರುವ ಮಳೆಗಾಲವನ್ನು ಗಮನದಲ್ಲಿಟ್ಟುಕೊಂಡು ಕೇಂದ್ರ ಸರಕಾರವು ನ್ಯಾನೊ ಲಿಕ್ವಿಡ್‌ ಡಿಎಪಿ ಬಳಕೆಗೆ ಸಂಬಂಧಿಸಿದಂತೆ ಕಳೆದ ಮಾರ್ಚ್‌ನಲ್ಲಿ ಮಹತ್ವದ ನಿರ್ಧಾರ ಕೈಗೊಂಡಿತ್ತು.

ಇದರಿಂದ ಲಾಭ ಏನು?

ದೇಶದಲ್ಲಿ ಯೂರಿಯಾ ನಂತರ ಹೆಚ್ಚು ಬಳಕೆಯಾಗುವ ರಸಗೊಬ್ಬರ ಎಂದರೆ ಡಿಎಪಿ. ನ್ಯಾನೊ ರಸಗೊಬ್ಬರಗಳಿಂದಾಗಿ ಭಾರತಕ್ಕೆ ವಿದೇಶಿ ವಿನಿಮಯವನ್ನು ಉಳಿಸಲು ಅನುಕೂಲವಾಗುತ್ತದೆ. ಸಬ್ಸಿಡಿ ಹೊರೆಯನ್ನು ಕಡಿಮೆ ಮಾಡಿಕೊಳ್ಳಲು ಸರಕಾರಕ್ಕೆ ಸಹಾಯ ಮಾಡಲಿದೆ.

ಸಬ್ಸಿಡಿ ಇಲ್ಲ

ಸರಕಾರವು ಸಾಂಪ್ರದಾಯಿಕ ಡಿಎಪಿಗೆ ಸಬ್ಸಿಡಿಯನ್ನು ನೀಡುತ್ತದೆ. ಆದರೆ ನ್ಯಾನೊ ಡಿಎಪಿಗೆ ಯಾವುದೇ ಸಬ್ಸಿಡಿ ನೀಡುತ್ತಿಲ್ಲ.

ಆತ್ಮನಿರ್ಭರ ಭಾರತ ಇಪ್ಕೊ ಸಾಧನೆ

ನ್ಯಾನೊ ಯೂರಿಯಾವನ್ನು 2021ರಲ್ಲಿ ಸಹಕಾರ ಸಂಸ್ಥೆ ಇಪ್ಕೊ ಬಿಡುಗಡೆ ಮಾಡಿತ್ತು. ಈಗ ಇಪ್ಕೊ ದೇಶೀಯ ತಂತ್ರಜ್ಞಾನ ಬಳಸಿ ತಯಾರಿಸಿರುವ ಲಿಕ್ವಿಡ್ ನ್ಯಾನೊ ಡಿಎಪಿ ಬಿಡುಗಡೆ ಮಾಡಿದೆ.

ದರ ಅರ್ಧಕ್ಕರ್ಧ ಕಡಿಮೆಸಾಂಪ್ರದಾಯಿಕ ಡಿಎಪಿ (ಡೈ-ಅಮೋನಿಯಂ ಫಾಸ್ಟೇಟ್ ) 50 ಕೆ.ಜಿ ಚೀಲವನ್ನು ಪ್ರಸ್ತುತ ರೈತರಿಗೆ 1,350 ರೂ.ಗೆ ಮಾರಾಟ ಮಾಡಲಾಗುತ್ತಿದೆ. 50 ಕೆ.ಜಿ ತೂಕದ ಚೀಲಕ್ಕೆ 500 ಎಂಎಲ್‌ನ ಬಾಟಲ್‌ನ ಡಿಎಪಿ ಸಮ.