ತೈಲ ದರ ಇಳಿಕೆಗೆ ಕೇಂದ್ರದಿಂದ ಶೀಘ್ರದಲ್ಲೇ ಕ್ರಮ: ಅಮಿತ್‌ ಶಾ

ಹೈದರಾಬಾದ್‌: ದೇಶದಲ್ಲಿ ಪೆಟ್ರೋಲ್‌ ಮತ್ತು ಡೀಸೆಲ್‌ ದರವನ್ನು ಕಡಿಮೆ ಮಾಡಲು ಕೇಂದ್ರ ಸರಕಾರ ಶೀಘ್ರದಲ್ಲಿಯೇ ಕ್ರಿಯಾ ಯೋಜನೆಯೊಂದನ್ನು ಜಾರಿಗೊಳಿಸಲಿದೆ ಎಂದು ಬಿಜೆಪಿ ಅಧ್ಯಕ್ಷ ಅಮಿತ್‌ ಶಾ ಶನಿವಾರ ಹೇಳಿದ್ದಾರೆ.

ಡಾಲರ್‌ ಎದುರು ರೂಪಾಯಿ ಮೌಲ್ಯ ಕುಸಿಯುತ್ತಿರುವುದು ಹಾಗೂ ತೈಲ ಬೆಲೆ ದಿನೇದಿನೆ ಏರಿಕೆಯಾಗುತ್ತಿರುವುದು ಕಳವಳಕಾರಿಯಾಗಿದೆ. ಈ ಬಗ್ಗೆ ಜನತೆಯ ಆತಂಕ ನಮಗೆ ಅರ್ಥವಾಗುತ್ತಿದೆ. ಆದಷ್ಟು ಶೀಘ್ರ ಕೇಂದ್ರ ಸರಕಾರ ದರ ಇಳಿಕೆಗೆ ಸಂಬಂಧಿಸಿ ಪ್ರತ್ಯೇಕ ಕ್ರಿಯಾ ಯೋಜನೆ ರೂಪಿಸಲಿದೆ ಎಂದರು.

ಹೈದರಾಬಾದ್‌ನಲ್ಲಿ ಸುದ್ದಿಗೋಷಿಯೊಂದರಲ್ಲಿ ಮಾತನಾಡಿದ ಶಾ, ಅಂತಾರಾಷ್ಟ್ರೀಉ ಮಾರುಕಟ್ಟೆಯಲ್ಲಿನ ಏರುಪೇರುಗಳ ಪರಿಣಾಮ ತೈಲ ದರ ಹೆಚ್ಚಳವಾಗಿದೆ. ಇದೇ ಸಂದರ್ಭ ರೂಪಾಯಿ ಮೌಲ್ಯ ಕೂಡ ಕುಸಿದಿದೆ. ಹೀಗಿದ್ದರೂ ಇತರ ಹಲವು ರಾಷ್ಟ್ರಗಳ ಕರೆನ್ಸಿಗಳೂ ಕುಸಿದಿವೆ. ಜನ ಪ್ರತಿಭಟನೆಗಿಳಿದಿರುವುದರ ಬಗ್ಗೆ ನಮಗೆ ಅರಿವು ಇದೆ. ಬಿಜೆಪಿ ಕೂಡ ದರ ಏರಿಕೆಗೆ ಚಿಂತಿತವಾಗಿದೆ ಎಂದರು.

ತೆಲಂಗಾಣದಲ್ಲಿ ಪಕ್ಷದ ಚುನಾವಣಾ ಪ್ರಚಾರಕ್ಕಾಗಿ ಆಗಮಿಸಿದ್ದ ಅಮಿತ್‌ ಶಾ, ತೈಲ ದರ ಏರಿಕೆಯಿಂದ ಉಂಟಾಗಿರುವ ಪರಿಸ್ಥಿತಿಯ್ನು ವಿವರಿಸಿದರು. ಪೆಟ್ರೋಲ್‌ ದರ ಆಗಸ್ಟ್‌ 1ರಿಂದ ಶೇ.6 ಹಾಗೂ ಡೀಸೆಲ್‌ ದರ ಶೇ.8ರಷ್ಟು ವೃದ್ಧಿಸಿದೆ. ಮುಂಬಯಿನಲ್ಲಿ ಪೆಟ್ರೋಲ್‌ ದರ 89 ರೂ, ದಿಲ್ಲಿಯಲ್ಲಿ 81.63 ರೂ.ಗೆ ಏರಿದೆ.