ಅನಿಲ್‌ ಅಂಬಾನಿಗೆ ತುಸು ನಿರಾಳ: ವಂಚನೆ ಪಟ್ಟಿಗೆ ಕಂಪನಿಗಳನ್ನು ಸೇರಿಸಲು ಹೈಕೋರ್ಟ್‌ ತಡೆ

ಮುಂಬಯಿ: ಉದ್ಯಮಿ ಅನಿಲ್‌ ಅಂಬಾನಿ ಅವರ ಆರ್‌ಕಾಮ್‌, ರಿಲಯನ್ಸ್‌ ಟೆಲಿಕಾಂ ಕಂಪನಿಗಳ ಖಾತೆಗಳನ್ನು 'ವಂಚನೆಯ ಖಾತೆ'ಗಳೆಂದು ಘೋಷಿಸದಂತೆ ಬ್ಯಾಂಕ್‌ಗಳಿಗೆ ದಿಲ್ಲಿ ಹೈಕೋರ್ಟ್‌ ಸೂಚಿಸಿದೆ. ಇದರಿಂದಾಗಿ ಅನಿಲ್‌ ಅವರಿಗೆ ತುಸು ನಿರಾಳ ಸಿಕ್ಕಿದಂತೆ ಆಗಿದೆ. ಪ್ರಕರಣದ ಮುಂದಿನ ವಿಚಾರಣೆ 2021ರ ಜ.13ಕ್ಕೆ ನಡೆಯಲಿದೆ.

ಆದಾಗ್ಯೂ, ಆರ್‌ಕಾಮ್‌ ಮತ್ತು ರಿಲಯನ್ಸ್‌ ಟೆಲಿಕಾಮ್‌ಗೆ ಶೋಕಾಸ್‌ ನೋಟಿಸ್‌ ನೀಡಲು ಬ್ಯಾಂಕ್‌ಗಳಿಗೆ ಅಧಿಕಾರವಿದೆ ಎಂದು ಕೋರ್ಟ್‌ ಹೇಳಿದೆ. ಅಲ್ಲದೇ, ಈ ಕಂಪನಿಗಳಿಗೆ ಸಂಬಂಧಿಸಿದ ಪ್ರಕರಣಗಳಲ್ಲಿ ತನಿಖೆ ಮಾಡಲು ತನಿಖಾಧಿಕಾರಿಗಳಿಗೂ ಅವಕಾಶವಿದೆ ಎಂದಿದೆ.

ತಮ್ಮ ಒಟ್ಟು ಆಸ್ತಿ ಶೂನ್ಯಕ್ಕೆ ತಲುಪಿದೆ ಎಂದು ಅನಿಲ್‌ ಅಂಬಾನಿ ಅವರು ಇತ್ತೀಚೆಗೆ ಹೇಳಿದ್ದರು. ಆದರೆ ಈ ವಾದವನ್ನು ಬ್ಯಾಂಕ್‌ಗಳು ತಳ್ಳಿ ಹಾಕಿದ್ದವು. ದಿವಾಳಿ ಪ್ರಕ್ರಿಯೆಯ ಭಾಗವಾಗಿ ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ, ಯೂನಿಯನ್‌ ಬ್ಯಾಂಕ್‌ ಆಫ್‌ ಇಂಡಿಯಾ ಮತ್ತು ಇಂಡಿಯನ್‌ ಓವರ್‌ಸೀಸ್‌ ಬ್ಯಾಂಕ್‌ಗಳು ಅನಿಲ್‌ ಅಂಬಾನಿಯ ರಿಲಯನ್ಸ್‌ ಕಮ್ಯೂನಿಕೇಷನ್‌ನ ಖಾತೆಯನ್ನು ವಂಚನೆಯ ಪಟ್ಟಿಗೆ ಸೇರಿಸಿದ್ದವು. ಅಲ್ಲದೇ, ಅನಿಲ್‌ ಒಡೆತನದ ರಿಲಯನ್ಸ್‌ ಕಮ್ಯೂನಿಕೇಷನ್ಸ್‌, ರಿಲಯನ್ಸ್‌ ಇನ್‌ಫ್ರಾಟೆಲ್‌ ಮತ್ತು ರಿಲಯನ್ಸ್‌ ಟೆಲಿಕಾಂ ನಡುವಿನ ಹಣಕಾಸು ವ್ಯವಹಾರಗಳ ಬಗ್ಗೆ ಆಳವಾದ ತನಿಖೆಯನ್ನು ಆರಂಭಿಸಿದ್ದವು.

ಏತನ್ಮಧ್ಯೆ, ದಿಲ್ಲಿ ಹೈಕೋರ್ಟ್‌ಗೆ ಅನಿಲ್‌ ಅಂಬಾನಿ ಕಂಪನಿಗಳು ಅರ್ಜಿ ಸಲ್ಲಿಸಿದ್ದವು. ವಿಚಾರಣೆ ನಡೆಸಿದ ಕೋರ್ಟ್‌, ಯೂನಿಯನ್‌ ಬ್ಯಾಂಕ್‌ ಆಫ್‌ ಇಂಡಿಯಾ ಮತ್ತು ಇಂಡಿಯನ್‌ ಓವರ್‌ಸೀಸ್‌ ಬ್ಯಾಂಕ್‌ಗಳಿಗೆ ಆರ್‌ಕಾಮ್‌ ಮತ್ತು ರಿಲಯನ್ಸ್‌ ಟೆಲಿಕಾಂನ ಖಾತೆಗಳನ್ನು ವಂಚನೆಯ ಪಟ್ಟಿಗೆ ಪರಿಗಣಿಸದಂತೆ ಸೂಚಿಸಿದೆ. ಮುಂದಿನ ವಿಚಾರಣೆಯನ್ನು ಜನವರಿ 13ಕ್ಕೆ ಮುಂದೂಡಿದೆ.

ಮಲ್ಯ, ನೀರವ್‌ಗಿಂತ ಹೆಚ್ಚು

ವಿಜಯ್‌ ಮಲ್ಯ (9,000 ಕೋಟಿ ರೂ.) ಹಾಗೂ ನೀರವ್‌ ಮೋದಿಗೆ (7,400 ಕೋಟಿ ರೂ.) ಹೋಲಿಸಿದರೆ ರಿಲಯನ್ಸ್‌ ಕಮ್ಯೂನಿಕೇಷನ್ಸ್‌, ಇದಕ್ಕಿಂತ ಹತ್ತು ಪಟ್ಟು ಹೆಚ್ಚಿನ ಹಣವನ್ನು ಬ್ಯಾಂಕ್‌ಗಳಿಗೆ ಪಾವತಿಸಬೇಕಿದೆ. ಹೀಗಿದ್ದೂ ಅನಿಲ್‌ ಅಂಬಾನಿಯ ಮೇಲೆ ಯಾವುದೇ ಕ್ರಮಗಳನ್ನು ಕೈಗೊಂಡಿಲ್ಲ ಎಂದು ಸುಪ್ರೀಂ ಕೋರ್ಟ್‌ ಹಿರಿಯ ವಕೀಲ ಪ್ರಶಾಂತ್‌ ಭೂಷಣ್‌ ದೂರಿದ್ದಾರೆ.

ಬಾಕಿ ಮೊತ್ತ 1 ಲಕ್ಷ ಕೋಟಿ ರೂ.!

ಬ್ಯಾಂಕ್‌ಗಳ ಆರೋಪದಿಂದಾಗಿ ರಿಲಯನ್ಸ್‌ ಕಮ್ಯೂನಿಕೇಷನ್‌ ಅನ್ನು ಬಿಕ್ಕಟ್ಟಿನಿಂದ ಹೊರತರುವ ಪ್ಲಾನ್‌ ಅಪಾಯಕ್ಕೆ ಸಿಲುಕಿದೆ. ಕಂಪನಿಯ ಅಧಿಕೃತ ವೆಬ್‌ಸೈಟ್‌ ಪ್ರಕಾರವೇ ಕಂಪನಿ 49,193 ಕೋಟಿ ರೂಪಾಯಿ ಸಾಲ ಪಾವತಿಸಬೇಕಿದೆ. ಇದರ ಜೊತೆಗೆ ರಿಲಯನ್ಸ್‌ ಟೆಲಿಕಾಂ 24,306 ಕೋಟಿ ರೂ. ಹಾಗೂ ರಿಲಯನ್ಸ್‌ ಇನ್‌ಫ್ರಾಟೆಲ್‌ 12,687 ಕೋಟಿ ರೂ.ಗಳ ಸಾಲವನ್ನು ಹೊತ್ತುಕೊಂಡಿವೆ. ಎಲ್ಲವನ್ನೂ ಸೇರಿಸಿದರೆ 86,188 ಕೋಟಿ ರೂಪಾಯಿಗಳಾಗುತ್ತವೆ. ಇದಕ್ಕಿನ್ನೂ ಸ್ಪೆಕ್ಟ್ರಂ ಬಾಕಿ 28,837 ಕೋಟಿ ರೂ.ಗಳನ್ನು ಸೇರಿಸಿಲ್ಲ. ಇದನ್ನೂ ಲೆಕ್ಕಕ್ಕೆ ತೆಗೆದುಕೊಂಡರೆ ಅನಿಲ್‌ ಅಂಬಾನಿ ಕಂಪನಿಗಳ ಬಾಕಿ ಮೊತ್ತ 1 ಲಕ್ಷ ಕೋಟಿ ರೂ. ದಾಟುತ್ತದೆ.