ಭಾರತವನ್ನು 'ಐಫೋನ್‌'ಗಳ ಎಕ್ಸ್‌ಪೋರ್ಟ್‌ ಹಬ್‌ ಮಾಡಲು ಮುಂದಾದ 'ಆ್ಯಪಲ್‌ '

ಹೊಸದಿಲ್ಲಿ: ಭಾರತದಲ್ಲಿ ಆ್ಯಪಲ್‌ ಕಂಪನಿಯು ತನ್ನ ಐಫೋನ್‌ ಉತ್ಪಾದನೆ ಮತ್ತು ರಫ್ತನ್ನು ಹೆಚ್ಚಿಸುವ ಸಾಧ್ಯತೆ ಇದೆ. ಆ್ಯಪಲ್‌ನ ಜಾಗತಿಕ ಉತ್ಪಾದನೆಯ ಗುತ್ತಿಗೆದಾರ ಕಂಪನಿಗಳಾದ ಫಾಕ್ಸ್‌ಕಾನ್‌ ಮತ್ತು ವಿಸ್ಟೊರೇನ್‌ ಕೇಂದ್ರ ಸರಕಾರದ ಉತ್ಪಾದನೆ ಆಧಾರಿತ ಇನ್ಸೆಂಟಿವ್‌ (ಪಿಎಲ್‌ಐ) ಯೋಜನೆಗೆ ಅರ್ಜಿ ಸಲ್ಲಿಸಿವೆ. ಹೀಗಾಗಿ ಭಾರತವು ಭವಿಷ್ಯದಲ್ಲಿ ಐಫೋನ್‌ ರಫ್ತಿನ ಪ್ರಮುಖ ಕೇಂದ್ರವಾಗುವ ಸಾಧ್ಯತೆ ಇದೆ.

ಕೇಂದ್ರ ಸರಕಾರವು ಉತ್ಪಾದನೆ ಆಧಾರಿತ ಇನ್ಸೆಂಟಿವ್‌ ಯೋಜನೆಗೆ 41,000 ಕೋಟಿ ರೂ.ಗಳ ನೆರವನ್ನು ಮೀಸಲಿಟ್ಟಿದೆ. ಈ ಯೋಜನೆಗೆ ಸಂಬಂಧಿಸಿ ಅರ್ಜಿಗಳನ್ನು ಆಹ್ವಾನಿಸಲಾಗುತ್ತಿದೆ.

ಮೂಲಗಳ ಪ್ರಕಾರ ಫಾಕ್ಸ್‌ ಕಾನ್‌ ಮತ್ತು ವಿಸ್ಟೊರೇನ್‌ ಈ ಯೋಜನೆಗೆ ಅರ್ಜಿ ಸಲ್ಲಿಸಿವೆ. ಲಾವಾ, ಡಿಕ್ಸಾನ್‌ ಟೆಕ್ನಾಲಜೀಸ್‌, ಕಾರ್ಬನ್‌ ಈಗಾಗಲೇ ಅರ್ಜಿ ಸಲ್ಲಿಸಿವೆ. ದಕ್ಷಿಣ ಕೊರಿಯಾದ ಸ್ಯಾಮ್‌ಸಂಗ್‌ ಕೂಡ ಅರ್ಜಿ ಸಲ್ಲಿಸುವ ನಿರೀಕ್ಷೆ ಇದೆ. ಜುಲೈ 31ರೊಳಗೆ ಅಥವಾ ಆಗಸ್ಟ್‌ ಮೊದಲ ವಾರದ ತನಕ ಕಂಪನಿಗಳು ಅರ್ಜಿ ಸಲ್ಲಿಸಬಹುದು.

ಟಿಕ್‌ಟಾಕ್‌ ಸೇರಿ 59 ಚೀನಾ ಆಪ್‌ಗಳ ಬ್ಯಾನ್‌: ‌ಡ್ರ್ಯಾಗನ್‌ ರಾಷ್ಟ್ರಕ್ಕೆ ಮೋದಿ ಸರಕಾರದ ಬಿಗ್‌ ಟಕ್ಕರ್‌

ಫಾಕ್ಸ್‌ಕಾನ್‌ ಚೆನ್ನೈನಲ್ಲಿ ಹಾಗೂ ವಿಸ್ಟೊರೇನ್‌ ಬೆಂಗಳೂರಿನಲ್ಲಿ ಉತ್ಪಾದನಾ ಘಟಕಗಳನ್ನು ಹೊಂದಿವೆ. ಫಾಕ್ಸ್‌ಕಾನ್‌ 2019ರಲ್ಲಿ ಭಾರತದ ಘಟಕದಲ್ಲಿ 35,000 ಕೋಟಿ ರೂ. ವಹಿವಾಟು ನಡೆಸಿತ್ತು. ಸದ್ಯಕ್ಕೆ ಇವೆರಡೂ ಕಂಪನಿಗಳು ಭಾರತೀಯ ಮಾರುಕಟ್ಟೆಗೆ ಮಾತ್ರ ಐಫೋನ್‌ ಗಳನ್ನು ಉತ್ಪಾದಿಸುತ್ತಿವೆ.

ಪಿಎಲ್‌ಐ ಯೋಜನೆಯ ಅಡಿಯಲ್ಲಿ ಕಂಪನಿಗಳು ಮುಂದಿನ 5 ವರ್ಷಗಳಲ್ಲಿ1.5 ಲಕ್ಷ ಕೋಟಿ ರೂ. ಮೌಲ್ಯದ ಉತ್ಪಾದನೆ ಮಾಡಿದರೆ 7,500 ಕೋಟಿ ರೂ.ಗಳ ಪ್ರೋತ್ಸಾಹಧನ (ಇನ್ಸೆಂಟಿವ್‌) ಪಡೆಯಲಿವೆ. 2028-19ರಲ್ಲಿಭಾರತದಲ್ಲಿ 29 ಕೋಟಿ ಮೊಬೈಲ್‌ ಉತ್ಪಾದನೆಯಾಗಿತ್ತು.