ಆಧಾರ್‌ಗೆ ಪಾನ್ ಜತೆ ಸಂಪರ್ಕ ಕಲ್ಪಿಸುವುದರಿಂದ ನೀವು ವಿನಾಯಿತಿ ಹೊಂದಿರುವೀರಾ? ಇಲ್ಲಿ ಓದಿ

ಹೊಸದಿಲ್ಲಿ: ತೆರಿಗೆ ಪಾವತಿದಾರರು ಜುಲೈ 01ರಿಂದೆ ತಮ್ಮ ಪಾನ್ ಕಾರ್ಡ್‌ಗೆ ಆಧಾರ್ ಕಾರ್ಡ್ ಸಂಖ್ಯೆಯನ್ನು ಕಡ್ಡಾಯವಾಗಿ ಜೋಡಣೆ ಮಾಡಿರಲೇಬೇಕು. ಆದರೆ ಈ ಕಡ್ಡಾಯ ಲಿಂಕಿಂಗ್‌ನಿಂದ ಕೆಲವು ನಿರ್ದಿಷ್ಟ ಪ್ರಕರಣಗಳಲ್ಲಿ ಸೆಂಟ್ರಲ್ ಬೋರ್ಡ್ ಆಫ್ ಡೈರಕ್ಟ್ ಟ್ಯಾಕ್ಸಸ್ (ಸಿಬಿಡಿಟಿ) ವಿನಾಯತಿ ಕಲ್ಪಿಸಿದೆ.

ಹಾಗಿದ್ದರೆ ನೀವು ಕೂಡಾ ಆಧಾರ್‌ಗೆ ಪಾನ್ ಜತೆ ಸಂಪರ್ಕ ಕಲ್ಪಿಸುವುದರಿಂದ ವಿನಾಯಿತಿ ಹೊಂದಿರುವೀರಾ? ಈ ಕೆಳಕಂಡ ವಿಭಾಗದವರಿಗೆ ವಿನಾಯಿತಿ ದೊರಕಲಿದೆ.

1) ಅಸ್ಸಾಂ, ಜಮ್ಮು ಮತ್ತು ಕಾಶ್ಮೀರ ಮತ್ತು ಮೇಘಾಲಯ ರಾಜ್ಯದಲ್ಲಿ ವಾಸಿಸುವ ವ್ಯಕ್ತಿಗೆ.
2) 1961ರ ಆದಾಯ ಕಾಯಿದೆ ಪ್ರಕಾರ ಅನಿವಾಸಿ ಭಾರತೀಯ ಅಥವಾ ಎನ್‌ಆರ್‌ಐ.
3) ಕಳೆದ ವರ್ಷದ ಯಾವುದೇ ಸಂದರ್ಭದಲ್ಲಿ 80 ಅಥವಾ ಅದಕ್ಕಿಂತಲೂ ಹೆಚ್ಚಿನ ವಯಸ್ಸಿನ ಓರ್ವ ವ್ಯಕ್ತಿಗೆ.
4) ಭಾರತದ ಪ್ರಜೆಯಲ್ಲದ ವ್ಯಕ್ತಿ.

ಆದರೆ ಮೇಲಿನ ಅಂಶಗಳಿಗೆ ಮಾನದಂಡವೊಂದಿದೆ. ಅದೇನೆಂದರೆ ಮೇಲೆ ತಿಳಿಸಿದ ವ್ಯಕ್ತಿಗಳು ಆಧಾರ್ ಕಾರ್ಡ್ ಹೊಂದಿರದಿದ್ದಲ್ಲಿ ಮಾತ್ರ ಕಡ್ಡಾಯ ಲಿಂಕಿಂಗ್‌ನಿಂದ ವಿನಾಯಿತಿ ನೀಡಲಾಗುತ್ತದೆ. ಇದಕ್ಕೆ ಸಮಾನವಾಗಿ ಆಧಾರ್ ಇಲ್ಲದ ದೇಶದ ನಿವಾಸಿಗಳಿಗೂ ಈ ವಿನಾಯಿತಿ ಅನ್ವಯಿಸುತ್ತದೆ. ಇದು ಸುಪ್ರೀಂ ಕೋರ್ಟ್‌ನಿಂದ ಲಭ್ಯವಾಗಿರುವ ತಾತ್ಕಾಲಿಕ ಆಶ್ವಾಸನೆ ಮಾತ್ರವಾಗಿದೆ.

ಐಟಿ ರಿಟರ್ನ್ಸ್ ಫೈಲ್ ಮಾಡದೆ ಇರುವ ವ್ಯಕ್ತಿಗಳು ಆಧಾರ್ ಜೊತೆಗೆ ಪಾನ್ ಸಂಪರ್ಕ ಕಲ್ಪಿಸುವಂತೆ ಸರಕಾರ ಸೂಚಿಸಿರುವುದು ಇಲ್ಲಿ ಗಮನಿಸುವುದು ಮುಖ್ಯ.

ಅಂದ ಹಾಗೆ ದೇಶದ್ಯಾಂತ ಇದುವರೆಗೆ 2.7 ಕೋಟಿ ತೆರಿಗೆ ಪಾವತಿದಾರರು ಆಧಾರ್ ಕಾರ್ಡ್ ಜೊತೆ ಪಾನ್ ಸಂಪರ್ಕ ಕಲ್ಪಿಸಿದ್ದಾರೆ. ದೇಶದಲ್ಲಿ 25 ಕೋಟಿ ಪಾನ್ ಕಾರ್ಡ್‌ದಾರರಿದ್ದು ಮತ್ತು 111 ಕೋಟಿ ಮಂದಿಗೆ ಆಧಾರ್ ಕಾರ್ಡ್ ಹಂಚಲಾಗಿದೆ.