ಏರ್‌ ಇಂಡಿಯಾ: ಬ್ಯಾಗೇಜ್‌ ಶುಲ್ಕ 100 ರೂ. ಏರಿಕೆ

ಹೊಸದಿಲ್ಲಿ: ನೀವು ಏರ್‌ ಇಂಡಿಯಾದಲ್ಲಿ ಪ್ರಯಾಣ ಮಾಡಲು ಸಜ್ಜಾಗುತ್ತಿದ್ದರೆ, ಸೂಟ್‌ಕೇಸ್‌ ಅಥವಾ ಬ್ಯಾಗ್‌ಗಳಿಗೆ ಲಗೇಜು ಪ್ಯಾಕ್‌ ಮಾಡುವಾಗ ತುಸು ಎಚ್ಚರವಹಿಸಬೇಕು! ಜೂ.11ರಿಂದಲೇ ಅನ್ವಯವಾಗುವಂತೆ, ಹೆಚ್ಚುವರಿ ಲಗೇಜಿಗೆ ವಿಧಿಸುತ್ತಿದ್ದ ಶುಲ್ಕವನ್ನು 100 ರೂ. ಏರಿಸಲಾಗಿದೆ. ಅಂದರೆ, ಹೆಚ್ಚುವರಿ ಲಗೇಜಿನ ಶುಲ್ಕ ಇನ್ನು ಮುಂದೆ 400ರಿಂದ 500 ರೂಪಾಯಿಗೆ ಏರಿಕೆಯಾಗಿದೆ. ದೇಶದಲ್ಲಿ ಸಂಚರಿಸುವ ವಿಮಾನಗಳಿಗೆ ಇದು ಅನ್ವಯವಾಗುತ್ತದೆ. ಆದಾಗ್ಯೂ, ಏರ್‌ ಇಂಡಿಯಾದ ಪ್ರಾದೇಶಿಕ ಸಂಸ್ಥೆಯಾದ ಅಲಿಯನ್ಸ್‌ ಏರ್‌ಲೈನ್ಸ್‌ನ ಪ್ರಯಾಣಕ್ಕೆ ಇದು ಅನ್ವಯವಾಗುವುದಿಲ್ಲ.

''ಪರಿಷ್ಕೃತ ಶುಲ್ಕಗಳು ಸದ್ಯದಿಂದಲೇ ಜಾರಿಗೆ ಬಂದಿವೆ. ಎಕಾನಮಿ ದರ್ಜೆಯಲ್ಲಿ ಪ್ರಯಾಣಿಕರು ಕೆ.ಜಿ ತೂಕದ ಹೆಚ್ಚುವರಿ ಲಗೇಜಿಗೆ ಇನ್ನು 500 ರೂ. ಪಾವತಿಸಬೇಕು. ಜತೆಗೆ ಶೇ.5ರಷ್ಟು ಜಿಎಸ್‌ಟಿಯೂ ಇದೆ. ಇತರೆ ದರ್ಜೆಯ ಪ್ರಯಾಣಿಕರು ಶೇ.12ರ ಜಿಎಸ್‌ಟಿ ನೀಡಬೇಕಾಗುತ್ತದೆ. ಜಿಎಸ್‌ಟಿಯು ಅರುಣಾಚಲ ಪ್ರದೇಶ, ಮಿಜೋರಾಂ, ತ್ರಿಪುರ, ಅಸ್ಸಾಂ, ಮಣಿಪುರ, ಮೇಘಾಲಯ, ನಾಗಾಲ್ಯಾಂಡ್‌, ಸಿಕ್ಕಿಂ, ಪಶ್ಚಿಮ ಬಂಗಾಳದ ಬಾಗ್‌ದೋಗ್ರಾ ವಿಮಾನ ನಿಲ್ದಾಣಗಳಿಂದ ಹೊರಡುವ ಅಥವಾ ಅಲ್ಲಿಗೆ ತಲುಪುವ ವಿಮಾನಗಳಿಗೆ ಅನ್ವಯವಾಗುವುದಿಲ್ಲ ಎಂದು ಪ್ರಕಟಣೆಯಲ್ಲಿ ಏರ್‌ ಇಂಡಿಯಾ ಹೇಳಿದೆ.