71,500 ಕೋಟಿ ರೂ. ಮುಟ್ಟಿದ ಬ್ಯಾಂಕಿಂಗ್‌ ಅವ್ಯವಹಾರಗಳು

ಹೊಸದಿಲ್ಲಿ: ಸಾವಿರಾರು ಕೋಟಿ ರೂ.ಗಳ ಅವ್ಯವಹಾರಗಳಿಂದಾಗಿ ಬ್ಯಾಂಕಿಂಗ್‌ ಉದ್ಯಮ ಸಂಕಷ್ಟದಲ್ಲಿದೆ. ಏತನ್ಮಧ್ಯೆ, ಕಳೆದ 2018-19ರ ಅವಧಿಯಲ್ಲಿ ಬ್ಯಾಂಕ್‌ಗಳಲ್ಲಿ ಒಟ್ಟು 71,500 ಕೋಟಿ ರೂ. ಮೊತ್ತದ 6,801ಕ್ಕೂ ಹೆಚ್ಚು ಅವ್ಯವಹಾರ ಪ್ರಕರಣಗಳು ವರದಿಯಾಗಿವೆ ಎಂದು ಭಾರತೀಯ ರಿಸರ್ವ್‌ ಬ್ಯಾಂಕ್‌(ಆರ್‌ಬಿಐ) ತಿಳಿಸಿದೆ.

2017-18ರಲ್ಲಿ ಬ್ಯಾಂಕಿಂಗ್‌ ವಂಚನೆಯ 5,916 ಪ್ರಕರಣಗಳು ದಾಖಲಾಗಿದ್ದವು. ವಂಚನೆಯ ಮೊತ್ತ 41,167 ಕೋಟಿ ರೂ. ಇತ್ತು. ಇದಕ್ಕೆ ಹೋಲಿಸಿದರೆ, 2018-19ರಲ್ಲಿ ವಂಚನೆ ಮೊತ್ತ ಗಣನೀಯವಾಗಿ ಏರಿಕೆಯಾಗಿದೆ.

ಪಿಟಿಐ ಪತ್ರಕರ್ತರೊಬ್ಬರ ಆರ್‌ಟಿಐ ಅರ್ಜಿಗೆ ಆರ್‌ಬಿಐ ಈ ಮಾಹಿತಿ ನೀಡಿದೆ. ಅದರ ಪ್ರಕಾರ, ಷೆಡ್ಯೂಲ್ಡ್‌ ಮತ್ತು ಕಮರ್ಷಿಯಲ್‌ ಬ್ಯಾಂಕ್‌ಗಳು ಹಾಗೂ ಆಯ್ದ ಹಣಕಾಸು ಸಂಸ್ಥೆಗಳಲ್ಲಿ 6,801 ವಂಚನೆ ಪ್ರಕರಣಗಳು ದಾಖಲಾಗಿವೆ. ಹಿಂದಿನ ವರ್ಷಕ್ಕೆ ಗಮನಿಸಿದರೆ, ಈ ಸಲ ವಂಚನೆ ಮೊತ್ತವು ಶೇ.73ರಷ್ಟು ಏರಿಕೆಯಾಗಿದೆ.

ಕಳೆದ 11 ಹಣಕಾಸು ವರ್ಷಗಳಲ್ಲಿ 53,334 ವಂಚನೆ ಪ್ರಕರಣಗಳು ದಾಖಲಾಗಿದ್ದು, ವಂಚನೆಯ ಒಟ್ಟು ಮೊತ್ತ 2.05 ಲಕ್ಷ ಕೋಟಿ ರೂ. ಮುಟ್ಟಿದೆ ಎಂದು ಕೇಂದ್ರೀಯ ಬ್ಯಾಂಕ್‌ನ ಡೇಟಾ ಹೇಳುತ್ತಿದೆ.

''ವಂಚನೆ ಬಗ್ಗೆ ಕ್ರಿಮಿನಲ್‌ ದೂರುಗಳು ದಾಖಲಾದರೆ, ಅಂಥ ಪ್ರಕರಣಗಳನ್ನು ಬ್ಯಾಂಕ್‌ಗಳು ಆರ್‌ಬಿಐಗೆ ವರದಿ ಮಾಡುತ್ತವೆ. ಈ ಪ್ರಕರಣಗಳ ಸಂಬಂಧ ಬ್ಯಾಂಕ್‌ಗಳು ಕೈಗೊಂಡ ಕ್ರಮಗಳ ಬಗ್ಗೆ ನಮಗೆ ಮಾಹಿತಿ ಲಭ್ಯವಿಲ್ಲ,'' ಎಂದು ಆರ್‌ಬಿಐ ಹೇಳಿದೆ.

ವಿಜಯ ಮಲ್ಯ, ನೀರವ್‌ ಮೋದಿಯಂಥ ಹೆಸರಾಂತ ಉದ್ಯಮಿಗಳು ದೇಶದ ಬ್ಯಾಂಕ್‌ಗಳಿಗೆ ಸಾವಿರಾರು ಕೋಟಿ ರೂ. ವಂಚನೆ ಮಾಡಿ, ದೇಶ ಬಿಟ್ಟು ಪಲಾಯನ ಮಾಡಿದ್ದಾರೆ.

========

11 ಹಣಕಾಸು ವರ್ಷಗಳಲ್ಲಿ 2 ಲಕ್ಷ ಕೋಟಿ ರೂ. ವಂಚನೆ:

2008-09ರಲ್ಲಿ 4,372 ವಂಚನೆ ಪ್ರಕರಣಗಳು ದಾಖಲಾಗಿದ್ದು, ವಂಚನೆಯ ಮೊತ್ತ 1,860 ಕೋಟಿ ರೂ.

2009-10ರಲ್ಲಿ 4,669 ಪ್ರಕರಣಗಳು ವರದಿಯಾಗಿದ್ದು, 1,998 ಕೋಟಿ ರೂ. ವಂಚನೆಯಾಗಿದೆ.

2010-11ರಲ್ಲಿ 4,534 ಪ್ರಕರಣಗಳು, ವಂಚನೆಯ ಮೊತ್ತ 3,815 ಕೋಟಿ ರೂ.

2011-12ರಲ್ಲಿ 4,093 ಪ್ರಕರಣಗಳು, ವಂಚನೆಯ ಮೊತ್ತ 4,501 ಕೋಟಿ ರೂ.

2012-13ರಲ್ಲಿ 4,235 ಪ್ರಕರಣಗಳು, ವಂಚನೆಯ ಮೊತ್ತ 8,590 ಕೋಟಿ ರೂ.

2013-14ರಲ್ಲಿ 4,306 ಪ್ರಕರಣಗಳು, ವಂಚನೆಯ ಮೊತ್ತ 10,170 ಕೋಟಿ ರೂ.

2014-15ರಲ್ಲಿ 4,639 ಪ್ರಕರಣಗಳು, ವಂಚನೆಯ ಮೊತ್ತ 19,455 ಕೋಟಿ ರೂ.

2015-16ರಲ್ಲಿ 4,693 ಪ್ರಕರಣಗಳು, ವಂಚನೆಯ ಮೊತ್ತ 18,698 ಕೋಟಿ ರೂ.

2016-17ರಲ್ಲಿ 5,076 ಪ್ರಕರಣಗಳು, ವಂಚನೆಯ ಮೊತ್ತ 23,933 ಕೋಟಿ ರೂ.

2017-18ರಲ್ಲಿ 5,916 ಪ್ರಕರಣಗಳು ದಾಖಲಾಗಿದ್ದವು. ವಂಚನೆಯ ಮೊತ್ತ 41,167 ಕೋಟಿ ರೂ.