ಹೊಸ ಗೃಹಸಾಲಗಳಿಗೆ ರೆಪೋ ದರ ಆಧರಿತ ಬಡ್ಡಿದರ ಸ್ವಯಂ ಅನ್ವಯ

ಮುಂಬಯಿ: ಭಾರತೀಯ ರಿಸರ್ವ್‌ ಬ್ಯಾಂಕ್ ನಿಗದಿಪಡಿಸುವ ರೆಪೋ ದರಕ್ಕೆ ಅನುಗುಣವಾಗಿ ಎಲ್ಲ ಬ್ಯಾಂಕ್‌ಗಳೂ ತಮ್ಮ ಚಿಲ್ಲರೆ ಸಾಲಗಳು ಮತ್ತು ಸಣ್ಣ ಉದ್ಯಮಿಗಳಿಗೆ ನೀಡುವ ಸಾಲಗಳ ಮೇಲಿನ ಬಡ್ಡಿರವನ್ನು ಸ್ವಯಂಚಾಲಿತವಾಗಿ ಹೊಂದಾಣಿಕೆ ಮಾಡಿಕೊಳ್ಳಬೇಕು ಎಂದು ಆರ್‌ಬಿಐ ಸೂಚಿಸಿದೆ.

ಅದರಂತೆ 2019ರ ಅಕ್ಟೋಬರ್‌ನಿಂದ ಈ ಸಾಲಗಳ ಮೇಲಿನ ಬಡ್ಡಿದರ ಇಳಿಕೆಯಾಗಲಿವೆ. ರೆಪೋ ದರಕ್ಕೆ ಅನುಗುಣವಾಗಿ ಸಾಲದ ಮೇಲಿನ ಫ್ಲೋಟಿಂಗ್‌ ಬಡ್ಡಿದರಗಳನ್ನು ಪರಿಷ್ಕರಿಸಬೇಕೆಂದು ವಿತ್ತಸಚಿವೆ ನಿರ್ಮಲಾ ಸೀತಾರಾಮನ್‌ ಅವರು ಸಾರ್ವಜನಿಕ ವಲಯ ಬ್ಯಾಂಕ್‌ಗಳಿಗೆ ಕಟ್ಟುನಿಟ್ಟಿನ ಸೂಚನೆ ನೀಡಿದ ಹಿನ್ನೆಲೆಯಲ್ಲಿ ಬ್ಯಾಂಕುಗಳು ಈ ಕ್ರಮಕ್ಕೆ ಮುಂದಾಗಿವೆ. ಪರಿಣಾಮ ಚಿಲ್ಲರೆ ಸಾಲಗಳ ಗ್ರಾಹಕರು ಮತ್ತು ಸಣ್ಣ ಉದ್ಯಮಗಳಿಗೆ ಲಾಭವಾಗಲಿದೆ.

ಗೃಹ ಸಾಲ, ವಾಹನ ಸಾಲ ಮತ್ತು ಇತರ ವೈಯಕ್ತಿಕ ಸಾಲಗಳು ಹಾಗೂ ಸೂಕ್ಷ್ಮ ಮತ್ತು ಸಣ್ಣ ಉದ್ಯಮಗಳಿಗೆ ನೀಡಿದ ಸಾಲಗಳ ಮೇಲಿನ ಫ್ಲೋಟಿಂಗ್ ಬಡ್ಡಿದರ ಇಳಿಕೆಯಾಗಲಿದೆ. ಬಡ್ಡಿದರದ ಸೀಮಾಂತ ವೆಚ್ಚದ (ಎಂಸಿಎಲ್‌ಆರ್‌) ಬದಲು ಮೂರು ಬಾಹ್ಯ ಮಾನದಂಡಗಳನ್ನು ಅನುಸರಿಸಿ ಬಡ್ಡಿದರ ಇಳಿಕೆಯಾಗಲಿದೆ.

ಆರ್‌ಬಿಐ ರೆಪೋ ದರಕ್ಕೆ ಅನುಗುಣವಾಗಿ ಮೂರು ತಿಂಗಳು ಅಥವಾ ಆರು ತಿಂಗಳು ಖಜಾನೆ ಬಿಲ್‌ಗಳ ಆದಾಯ ಅಥವಾ ಫೈನಾನ್ಶಿಯಲ್ ಬೆಂಚ್‌ಮಾರ್ಕ್ಸ್‌ ಇಂಡಿಯಾ (ಎಫ್‌ಬಿಐಎಲ್) ನಿಗದಿಪಡಿಸುವ ಯಾವುದೇ ಮಾನದಂಡದ (ಬೆಂಚ್‌ಮಾರ್ಕ್‌) ಅನ್ವಯ ಈ ಬಡ್ಡಿದರಗಳು ನಿರ್ಧಾರವಾಗುತ್ತವೆ.

ಆರ್‌ಬಿಐ ಸೂಚನೆ ಬಳಿಕ ಎಲ್ಲಕ್ಕಿಂತ ಮೊದಲು ಭಾರತೀಯ ಸ್ಟೇಟ್ ಬ್ಯಾಂಕ್‌ ರೆಪೋ ದರ ಆಧರಿತ ಗೃಹಸಾಲ ಮತ್ತು ಠೇವಣಿ ಬಡ್ಡಿದರಗಳನ್ನು ವಿಧಿಸಲಾರಂಭಿಸಿದೆ. ಐಡಿಬಿಐ ಬ್ಯಾಂಕ್‌, ಬ್ಯಾಂಕ್ ಆಫ್ ಇಂಡಿಯಾ, ಯೂನಿಯನ್ ಬ್ಯಾಂಕ್ ಆಫ್ ಇಂಡಿಯಾ, ಸೆಂಟ್ರಲ್ ಬ್ಯಾಂಕ್ ಆಫ್ ಇಂಡಿಯಾ, ಯುನೈಟೆಡ್ ಬ್ಯಾಂಕ್ ಆಫ್ ಇಂಡಿಯಾ ಮತ್ತು ಅಲಹಾಬಾದ್ ಬ್ಯಾಂಕ್‌ ಸೇರಿದಂತೆ ಇತರ ಬ್ಯಾಂಕ್‌ಗಳು ಎಸ್‌ಬಿಐ ನಡೆಯನ್ನೇ ಅನುಸರಿಲಿವೆ. ಹಲವು ಬ್ಯಾಂಕ್‌ಗಳು ಈಗಾಗಲೇ ರೆಪೋ ಲಿಂಕ್ಡ್‌ ಉಳಿತಾಯ ಖಾತೆಗಳನ್ನು ನೀಡುತ್ತಿವೆ.

ಎಂಸಿಎಲ್‌ಆರ್‌/ ಬೇಸ್ ರೇಟ್/ ಪ್ರಧಾನ ಬಡ್ಡಿದರಗಳಿಗೆ ಸಂಯೋಜಿತವಾದ ಹಾಲಿ ಸಾಲಗಳು ಮತ್ತು ಕ್ರೆಡಿಟ್‌ ಮಿತಿಗಳು ಮರುಪಾವತಿ ಅಥವಾ ನವೀಕರಣದ ವರೆಗೆ ಈಗ ಇರುವಂತೆಯೇ ಮುಂದುವರಿಯಲಿವೆ. ರೆಪೋ ಲಿಂಕ್ಡ್‌ ಬಡ್ಡಿದರವನ್ನು ಗ್ರಾಹಕರು ಮತ್ತು ಸಂಬಂಧಿತ ಬ್ಯಾಂಕ್‌ ಪರಸ್ಪರ ಒಪ್ಪಿಗೆ ಮೇರೆಗೆ ಅನ್ವಯಿಸಿಕೊಳ್ಳಬಹುದು' ಎಂದು ಆರ್‌ಬಿಐ ಹೇಳಿದೆ.

ಈವರೆಗೆ ಬ್ಯಾಂಕ್‌ಗಳು ಬಡ್ಡಿದರ ಇಳಿಕೆಯ ಲಾಭವನ್ನು ಗ್ರಾಹಕರಿಗೆ ವರ್ಗಾಯಿಸಲು ಹಿಂದೇಟು ಹಾಕುತ್ತಿದ್ದವು. ಇದರಿಂದಾಗಿ ಆರ್‌ಬಿಐ ಬಡ್ಡಿದರ ಇಳಿಸಿದರೂ ಗ್ರಾಹಕರಿಗೆ ಅದರ ಲಾಭ ಸಮರ್ಪಕವಾಗಿ ದೊರೆಯುತ್ತಿರಲಿಲ್ಲ.