ಕ್ಯಾರಿ ಬ್ಯಾಗ್‌ಗೆ 3 ರೂ ಹಣ ಪಡೆದು, ದಂಡವಾಗಿ 9,000 ತೆತ್ತ ಬಾಟಾ

ಚಂಡಿಗಢ: ಬಾಟಾ ಕಂಪನಿ ತನ್ನ ಗ್ರಾಹಕರೊಬ್ಬರಿಂದ ಕ್ಯಾರಿ ಬ್ಯಾಗ್‌‌ಗೆ 3 ರೂ. ಪಡೆದದ್ದಕ್ಕೆ ಪ್ರತಿಯಾಗಿ 9,000 ರೂ. ಪರಿಹಾರ ನೀಡಬೇಕಾಗಿದೆ ಬಂದಿದೆ.

ಆಗಿದ್ದೇನು

ಚಂಡೀಗಢದ ನಿವಾಸಿ ದಿನೇಶ್‌ ಪ್ರಸಾದ್‌ ರಟೌರಿ ಎಂಬುವರು ಇತ್ತೀಚೆಗೆ ಬಾಟಾ ಶೋ ರೂಮ್‌ನಲ್ಲಿ 399 ರೂಪಾಯಿಗೆ ಶೂ ಕೊಂಡಿದ್ದರು. ಅಂಗಡಿಯವರು 399ರ ಬದಲಿಗೆ 402 ರೂಪಾಯಿ ಚಾರ್ಜ್ ಮಾಡಿದ್ದರು. 3 ರೂಪಾಯಿ ಹೆಚ್ಚುವರಿ ಏಕೆ ಎಂದು ರಟೌರಿ ಕೇಳಿದ್ದಕ್ಕೆ ಅದು ಶೂ ಹಾಕಿಕೊಟ್ಟಿರುವ ಪೇಪರ್ ‌ ಬ್ಯಾಗ್‌ಗೆ ಎಂದು ಮಾರಾಟಗಾರರು ಹೇಳಿದ್ದರು.

ಇದರಿಂದ ಅಸಮಧಾನಗೊಂಡ ರಟೌರಿ, ಸ್ಥಳೀಯ ಬಾಟಾ ಅಂಗಡಿಯ ವಿರುದ್ಧ ಗ್ರಾಹಕರ ವೇದಿಕೆಗೆ ದೂರು ನೀಡಿದ್ದರು. ಪೇಪರ್‌ ಬ್ಯಾಗ್‌ ಮೂಲಕ ಕಂಪನಿ ತನ್ನ ಬ್ರ್ಯಾಂಡ್‌ ಅನ್ನು ಪ್ರಚಾರ ಮಾಡುತ್ತಿದ್ದು, ಇದು ಸಲ್ಲದು. ಪೇಪರ್‌ ಬ್ಯಾಗ್‌ಗೆ ದುಡ್ಡು ಪಡೆಯುವುದೂ ತಪ್ಪು ಎಂದು ಅವರು ಗ್ರಾಹಕರ ವೇದಿಕೆಗೆ ಮೊರೆ ಹೋಗಿದ್ದರು. ಆ ಮೂರು ರೂಪಾಯಿಯನ್ನು ವಾಪಸ್ ಕೊಡಿಸಬೇಕು ಹಾಗೂ ಸರಿಯಾಗಿ ಸೇವೆ ಒದಗಿಸದ ಕಾರಣ ಪರಿಹಾರ ನೀಡಬೇಕು ಎಂದು ಅವರು ದೂರಿನಲ್ಲಿ ಕೋರಿಕೊಂಡಿದ್ದರು.

ವಿಚಾರಣೆ ನಡೆಸಿದ ಗ್ರಾಹಕ ಹಿತ ರಕ್ಷಣಾ ನ್ಯಾಯಾಲಯ, ಬಾಟಾ ಕಂಪನಿಯಿಂದ ಗ್ರಾಹಕರಿಗೆ ಸೇವೆಯಲ್ಲಿ ಆಗಿರುವ ಅಡಚಣೆಗೆ 9,000 ರೂ. ದಂಡ ವಿಧಿಸಿದೆ ಮತ್ತು ಗ್ರಾಹಕರಿಗೆ ಉಚಿತವಾಗಿ ಪೇಪರ್‌ ಬ್ಯಾಗ್‌ ಕೊಡಬೇಕು ಎಂದು ಆದೇಶಿಸಿದೆ.