ಪ.ಬಂಗಾಳದಲ್ಲಿ ಬಸ್‌, ಟ್ಯಾಕ್ಸಿ ದರ ಏರಿಕೆ

ಕೋಲ್ಕೊತಾ: ಬಸ್‌ ಮತ್ತು ಟ್ಯಾಕ್ಸಿ ದರವನ್ನು 1 ರೂ. ಏರಿಸಲು ಪಶ್ಚಿಮ ಬಂಗಾಳ ಸರಕಾರವು ಬುಧವಾರ ತೀರ್ಮಾನಿಸಿದೆ. ಇಂಧನ ದರ ಏರಿಕೆಯಿಂದ ಬಸ್‌, ಟ್ಯಾಕ್ಸಿ ಪ್ರಯಾಣ ದರ ಏರಿಕೆ ಅನಿವಾರ್ಯವಾಗಿದೆ ಎಂದು ರಾಜ್ಯ ಸಾರಿಗೆ ಸಚಿವ ಸುವೆಂದು ಅಧಿಕಾರಿ ತಿಳಿಸಿದ್ದಾರೆ.

2014ರ ನಂತರ ಬಸ್‌ ಪ್ರಯಾಣ ದರ ಏರಿಸುತ್ತಿರುವುದು ಇದೇ ಮೊದಲು. ಪ್ರಸ್ತುತ 4 ಕಿ.ಮೀಗಳ ಮೊದಲ ಸ್ಟೇಜ್‌ ಪ್ರಯಾಣಕ್ಕೆ 6 ರೂ. ಇದ್ದು, ಮಿನಿ ಬಸ್‌ನಲ್ಲಿ ಮೊದಲ 2 ಕಿ.ಮೀಗೆ 7 ರೂ. ಇದೆ. ಈಗ 1 ರೂ. ಏರಿಕೆಯಾಗಿದ್ದು, ನಾನಾ ಸ್ಟೇಜ್‌ಗಳಿಗೆ ತಕ್ಕಂತೆ ಪ್ರಯಾಣ ದರಗಳು ಹೆಚ್ಚಳವಾಗಿವೆ.

ಖಾಸಗಿ ಬಸ್‌ ಮತ್ತು ಟ್ಯಾಕ್ಸಿ ಆಪರೇಟರ್‌ಗಳು, ಸಾರಿಗೆ ಸಚಿವರೊಂದಿಗೆ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಮಾತುಕತೆ ನಡೆಸಿದ್ದು, ಆ ಬಳಿಕ ದರ ಏರಿಕೆಯ ತೀರ್ಮಾನ ಹೊರಬಿದ್ದಿದೆ. ''ಕೇಂದ್ರ ಸರಕಾರವು ಡೀಸೆಲ್‌, ಪೆಟ್ರೋಲ್‌ ದರವನ್ನು ಒಂದೇ ಸಮನೆ ಏರಿಸುತ್ತಿದ್ದು, ಅನಿವಾರ್ಯವಾಗಿ ಬಸ್‌, ಟ್ಯಾಕ್ಸಿಗಳ ದರ ಹೆಚ್ಚಿಸಬೇಕಾಗಿದೆ. ಸಾಮಾನ್ಯರ ಮೇಲೆ ಹೊರೆ ಬೀಳಲು ಕೇಂದ್ರವೇ ಕಾರಣ,'' ಎಂದು ಅಧಿಕಾರಿ ಹೇಳಿದ್ದಾರೆ.