65 ಸಾವಿರ ಪೆಟ್ರೋಲ್‌ ಪಂಪ್‌ ರೂಪಿಸಲು ಅರ್ಜಿ ಆಹ್ವಾನ

ಹೊಸದಿಲ್ಲಿ: ಸಾರ್ವಜನಿಕ ವಲಯದ ಭಾರತ್‌ ಪೆಟ್ರೋಲಿಯಂ ಕಾರ್ಪೊರೇಷನ್‌ ಲಿಮಿಟೆಡ್‌(ಬಿಪಿಸಿಎಲ್‌), ಹಿಂದೂಸ್ತಾನ್‌ ಪೆಟ್ರೋಲಿಯಂ(ಎಚ್‌ಪಿಸಿಎಲ್‌) ಮತ್ತು ಇಂಡಿಯನ್‌ ಆಯಿಲ್‌ ಕಾರ್ಪೊರೇಷನ್‌(ಐಒಸಿಎಲ್‌) ಸೇರಿದಂತೆ ತೈಲ ಕಂಪನಿಗಳು, ತಮ್ಮ ರೀಟೇಲ್‌ ಔಟ್‌ಲೆಟ್‌ಗಳ(ಪೆಟ್ರೋಲ್‌ ಪಂಪ್‌) ಜಾಲ ವಿಸ್ತರಿಸಲು ಮುಂದಾಗಿವೆ.

ಹೆಚ್ಚುತ್ತಿರುವ ಪೆಟ್ರೋಲ್‌ ಮತ್ತು ಡೀಸೆಲ್‌ನ ಬೇಡಿಕೆ ಪೂರೈಸಲು ದೇಶದಲ್ಲಿ 65,000 ಪೆಟ್ರೋಲ್‌ ಪಂಪ್‌ಗಳನ್ನು ರೂಪಿಸಲು ಅರ್ಜಿಗಳನ್ನು ಆಹ್ವಾನಿಸಲು ತೈಲ ಕಂಪನಿಗಳು ಮುಂದಾಗಿವೆ. 55,649 ಪೆಟ್ರೋಲ್‌ ಪಂಪ್‌ಗಳ ಡೀಲರ್‌ಶಿಪ್‌ಗೆ ಮೊದಲ ಹಂತದಲ್ಲಿ ಅರ್ಜಿ ಆಹ್ವಾನಿಸಲಾಗಿದೆ. ಈ ಸಂಬಂಧಿ ಜಾಹೀರಾತು ಭಾನುವಾರ ಬಿಡುಗಡೆಯಾಗಿದೆ.

ವಿಧಾನಸಭೆ ಚುನಾವಣೆ ನಡೆಯುತ್ತಿರುವ ಐದು ರಾಜ್ಯಗಳನ್ನು ಹೊರತುಪಡಿಸಿ, ಅರ್ಜಿಗಳನ್ನು ಆಹ್ವಾನಿಸಲಾಗಿದೆ. ಚುನಾವಣೆ ಬಳಿಕ, ಆ ರಾಜ್ಯಗಳಲ್ಲೂ ಅರ್ಜಿ ಆಹ್ವಾನಿಸಲಾಗುತ್ತದೆ. ಈ ರಾಜ್ಯಗಳಲ್ಲಿ 9ರಿಂದ 10 ಸಾವಿರ ಪೆಟ್ರೋಲ್‌ ಪಂಪ್‌ಗಳು ತಲೆ ಎತ್ತಲಿವೆ.

ಐಒಸಿ ಈಗಾಗಲೇ 27,377 ಪೆಟ್ರೋಲ್‌ ಪಂಪ್‌ಗಳನ್ನು ಹೊಂದಿದ್ದು, 26,982 ಪಂಪ್‌ಗಳ ರೂಪಿಸಲು ಅರ್ಜಿ ಆಹ್ವಾನಿಸಲಾಗಿದೆ. ಬಿಪಿಸಿಎಲ್‌ 14,592 ಪೆಟ್ರೋಲ್‌ ಪಂಪ್‌ ಹೊಂದಿದ್ದು, ಹೊಸದಾಗಿ 12,865 ಪಂಪ್‌ಗಳ ಸ್ಥಾಪಿಸಲಿದೆ. ಎಚ್‌ಪಿಸಿಎಲ್‌ ಹೊಸದಾಗಿ 12,865 ಕೇಂದ್ರಗಳನ್ನು ತೆರೆಯಲಿದೆ.

''ನಮ್ಮದು ತ್ವರಿತ ವೇಗದ ಆರ್ಥಿಕತೆ. ದೇಶದ ಬೆಳವಣಿಗೆಗೆ ಇಂಧನವು ಅತ್ಯಗತ್ಯವಾಗಿದ್ದು, ಪೆಟ್ರೋಲ್‌ ಮತ್ತು ಡೀಸೆಲ್‌ನ ರೀಟೇಲ್‌ ಮಾರಾಟವು ಕ್ರಮವಾಗಿ ಶೇ.8 ಮತ್ತು ಶೇ.4ರಷ್ಟು ಏರಿಕೆಯಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ನೂತನ ಪೆಟ್ರೋಲ್‌ ಪಂಪ್‌ಗಳ ಸ್ಥಾಪನೆಗೆ ಅರ್ಜಿ ಆಹ್ವಾನಿಸಲಾಗಿದೆ,'' ಎಂದು ತೈಲ ಕಂಪನಿಗಳು ಹೇಳಿವೆ.

ದೇಶದಲ್ಲಿ ಈಗ 63,674 ಪೆಟ್ರೋಲ್‌ ಪಂಪ್‌ಗಳಿವೆ. ಇದರ ಜೊತೆಗೆ ಹೊಸದಾಗಿ 65,000 ಪಂಪ್‌ಗಳು ಸೇರ್ಪಡೆಯಾಗಲಿವೆ. ಆನ್‌ಲೈನ್‌ನಲ್ಲಿ ಅರ್ಜಿ ಸಲ್ಲಿಸಬೇಕು.
ಪೆಟ್ರೋಲ್‌ ಪಂಪ್‌ ತೆರೆಯಲು ಸೂಕ್ತ ಸ್ಥಳದಲ್ಲಿ ಜಾಗ ಹೊಂದಿರಬೇಕು.