ಭಾರತ್‌ ಪೆಟ್ರೋಲಿಯಂ ಖಾಸಗೀಕರಣಕ್ಕೆ ಕೇಂದ್ರ ಚಿಂತನೆ

ಹೊಸದಿಲ್ಲಿ: ದೇಶದ ಎರಡನೇ ಅತಿ ದೊಡ್ಡ ಸಾರ್ವಜನಿಕ ತೈಲ ಕಂಪನಿ ಭಾರತ್‌ ಪೆಟ್ರೋಲಿಯಂ ಕಾಪ್‌ರ್‍ ಅನ್ನು(ಬಿಪಿಸಿಎಲ್‌) ಜಾಗತಿಕ ಮಟ್ಟದ ಕಂಪನಿಗೆ ಮಾರಾಟ ಮಾಡಲು ಕೇಂದ್ರ ಸರಕಾರ ಪರಿಶೀಲಿಸುತ್ತಿದೆ. ಷೇರು ಮಾರಾಟದ ವದಂತಿಯ ಬೆನ್ನಲ್ಲೇ ಕಂಪನಿ ಷೇರು ದರ ಶುಕ್ರವಾರ ಶೇ.7ರಷ್ಟು ವೃದ್ಧಿಸಿತು. ಪ್ರಸ್ತುತ ಸರಕಾರ ಬಿಪಿಸಿಎಲ್‌ನಲ್ಲಿಶೇ.53.29ರಷ್ಟು ಷೇರುಗಳನ್ನು ಹೊಂದಿದೆ.

ಸಾರ್ವಜನಿಕ ವಲಯದ ತೈಲ ಕಂಪನಿಗಳ ಪ್ರಾಬಲ್ಯವಿರುವ ದೇಶಿ ರಿಟೇಲ್‌ ತೈಲ ಮಾರುಕಟ್ಟೆಗೆ ಬಹುರಾಷ್ಟ್ರೀಯ ಕಂಪನಿಗಳನ್ನು ಆಕರ್ಷಿಸಿ, ಸ್ಪರ್ಧಾತ್ಮಕವಾಗಿಸಲು ಸರಕಾರ ಚಿಂತನೆ ನಡೆಸಿದೆ. ಪ್ರಸಕ್ತ ಸಾಲಿನಲ್ಲಿಸಾರ್ವಜನಿಕ ವಲಯದ ಕಂಪನಿಗಳ ಮಾರಾಟದ ಮೂಲಕ 1.05 ಲಕ್ಷ ಕೋಟಿ ರೂ. ಸಮಗ್ರಹಿಸುವ ಗುರಿಯನ್ನು ಕೇಂದ್ರ ಸರಕಾರ ಹೊಂದಿದೆ. ಜಿಡಿಪಿ ಬೆಳವಣಿಗೆಯ ಇಳಿಕೆಯ ಪರಿಣಾಮ ಕಂದಾಯ ಸಂಗ್ರಹ ಕೂಡ ಇಳಿಕೆಯಾಗುವ ನಿರೀಕ್ಷೆ ಇದ್ದು, ವಿತ್ತೀಯ ಕೊರತೆಯನ್ನು ನಿಯಂತ್ರಿಸಲು ಸರಕಾರ ಹಲವು ದಾರಿಗಳನ್ನು ಪರಿಶೀಲಿಸುತ್ತಿದೆ.

ಬಿಪಿಸಿಎಲ್‌ನಿಂದ ಸರಕಾರದ ಷೇರು ವಿಕ್ರಯ ಕುರಿತ ಮಾತುಕತೆ ಆರಂಭಿಕ ಹಂತದಲ್ಲಿವೆ. ಸೌದಿ ಅರೇಬಿಯಾದ ಸೌದಿ ಆರಮ್ಕೊ, ರಷ್ಯಾದ ರೋಸ್‌ನೆಫ್ಟ್‌ ಈಗಾಗಲೇ ಭಾರತದ ತೈಲ ಸಂಸ್ಕರಣೆ ವಲಯದಲ್ಲಿಹೂಡಿಕೆ ಮಾಡಿದ್ದು, ಇಲ್ಲಿವಹಿವಾಟು ವಿಸ್ತರಣೆಗೆ ಯೋಚಿಸುತ್ತಿವೆ.

ಮಹಾರತ್ನ ತೈಲ ಮತ್ತು ಅನಿಲ ಕಂಪನಿಯಾದ ಭಾರತ್‌ ಪೆಟ್ರೋಲಿಯಂ ಮುಂಬಯಿನಲ್ಲಿಪ್ರಧಾನ ಕಚೇರಿಯನ್ನು ಹೊಂದಿದೆ. 1920ರಲ್ಲಿಬರ್ಮಾ ಶೆಲ್‌ ಎಂಬ ಹೆಸರಿನಲ್ಲಿಸ್ಥಾಪನೆಯಾಗಿದ್ದ ಭಾರತ್‌ ಪೆಟ್ರೋಲಿಯಂ 1979ರಲ್ಲಿರಾಷ್ಟ್ರೀಕೃತವಾಗಿತ್ತು.