ಬಿಎಚ್‌ಇಎಲ್‌ - ಇಸ್ರೋ ನಡುವೆ ಒಪ್ಪಂದ

ಬೆಂಗಳೂರು: ವಿಕ್ರಮ್‌ ಸಾರಾಭಾಯಿ ಬಾಹ್ಯಾಕಾಶ ಕೇಂದ್ರ (ವಿಎಸ್‌ಎಸ್‌ ಸಿ)ದಲ್ಲಿ ಅಭಿವೃದ್ಧಿ ಪಡಿಸಿರುವ ತಂತ್ರಜ್ಞಾನವನ್ನು ಬಳಸಿ ಬಾಹ್ಯಾಕಾಶ ಶ್ರೇಣಿಯ ಲೀಥಿಯಂ-ಅಯಾನ್‌ ಕೋಶಗಳ ಉತ್ಪಾದನೆಗಾಗಿ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ)ದೊಂದಿಗೆ ತಂತ್ರಜ್ಞಾನ ವರ್ಗಾವಣೆ ಒಡಂಬಡಿಕೆಯೊಂದನ್ನು ಭಾರತ್‌ ಹೆವಿ ಎಲೆಕ್ಟ್ರಿಕಲ್ಸ್‌ ಲಿಮಿಟೆಡ್‌(ಬಿಎಚ್‌ಇಎಲ್‌) , ಮತ್ತು ಇಸ್ರೋ ಮಾಡಿಕೊಂಡಿದೆ.

ಬಾಹ್ಯಾಕಾಶ ಇಲಾಖೆಯ ಕಾರ್ಯದರ್ಶಿ ಹಾಗೂ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಕೇಂದ್ರ (ಇಸ್ರೋ)ದ ಅಧ್ಯಕ್ಷ ಡಾ.ಕೆ. ಶಿವನ್‌ ಮತ್ತು ಬಿಎಚ್‌ಇಎಲ್‌ನ ಅಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕ ಅತುಲ್‌ ಸೋಬ್ತಿ ಉಪಸ್ಥಿತಿಯಲ್ಲಿ ಬಿಎಚ್‌ಇಎಲ್‌ನ ನಿರ್ದೇಶಕ ಎಸ್‌.ಬಿಸ್ವಾಸ್‌ ಮತ್ತು ವಿಎಸ್‌ಎಸ್‌ಸಿಯ ನಿರ್ದೇಶಕ ಎಸ್‌. ಸೊಮನಾಥ ಅವರುಗಳು ತಂತ್ರಜ್ಞಾನ ವರ್ಗಾವಣೆ ಒಡಂಬಡಿಕೆಗೆ ಸಹಿ ಹಾಕಿದರು. ಬಿಎಚ್‌ಇಎಲ್‌ ಹಾಗೋ ಇಸ್ರೋದ ಇತರೆ ಹಿರಿಯ ಅಧಿಕಾರಿಗಳು ಉಪಸ್ಥಿತರಿದ್ದರು.

ಇಸ್ರೋ ಸಂಸ್ಥೆಯು ತನ್ನ ಉಪಗ್ರಹಗಳು ಮತ್ತು ಉಡಾವಣಾ ವಾಹನಗಳಲ್ಲಿ ಬಳಸಲು ಲೀಥಿಯಂ ಅಯಾನ್‌ ಕೋಶಗಳನ್ನು ವಿದೇಶಿ ಸರಬರಾಜುದಾರರಿಂದ ಪಡೆದುಕೊಳ್ಳುತ್ತಿದ್ದು, ಆಮದಿತ ಕೋಶಗಳನ್ನು ಬಳಸಿಕೊಂಡು ಬಿಎಚ್‌ಇಎಲ್‌ ಬಾಹ್ಯಾಕಾಶ ಶ್ರೇಣಿಯ ಲೀಥಿಯಂ ಅಯಾನ್‌ ಬ್ಯಾಟರಿಗಳನ್ನು ಉತ್ಪಾದಿಸಿ, ಪರೀಕ್ಷಿಸುತ್ತಿತ್ತು. ಈ ತಂತ್ರಜ್ಞಾನ ವರ್ಗಾವಣೆ ಒಡಂಬಡಿಕೆಯೊಂದಿಗೆ ಇಸ್ರೋ ಹಾಗೂ ಇತರೆ ಅವಶ್ಯಕತೆಗಳಿಗೆ ಬಿಎಚ್‌ಇಎಲ್‌ ಲೀಥಿಯಂ ಅಯಾನ್‌ ಸೆಲ್‌ಗಳನ್ನು ಆಂತರಿಕವಾಗಿ ಉತ್ಪಾದಿಸಲು ಶಕ್ತವಾಗುತ್ತದೆ. ಲೀಥಿಯಂ ಅಯಾನ್‌ ತಂತ್ರಜ್ಞಾನವನ್ನು ಭವಿಷ್ಯದಲ್ಲಿ ಎನರ್ಜಿ ಸ್ಟೋರೇಜ್‌ ಹಾಗೂ ಇ-ಮೊಬಿಲಿಟಿ ಮುಂತಾದ ಉದಯೋನ್ಮುಖ ಕ್ಷೇತ್ರಗಳಲ್ಲಿನ ಬಳಕೆಗೂ ವಿಸ್ತರಿಸಬಹುದಾಗಿದೆ. ಬಿಎಚ್‌ಇಎಲ್‌ ಈ ಕೋಶಗಳನ್ನು ಉತ್ಪಾದಿಸಲು ತನ್ನ ಬೆಂಗಳೂರಿನ ಘಟಕದಲ್ಲಿ ಅತ್ಯುತ್ಕೃಷ್ಟ ಸೌಲಭ್ಯವನ್ನು ಕಲ್ಪಿಸಲಿದೆ.