ಜಿಎಸ್‌ಟಿ ವ್ಯಾಪ್ತಿಗೆ ಪೆಟ್ರೋಲ್‌, ಡೀಸೆಲ್‌ ತನ್ನಿ: ಅಸೋಚಮ್‌

ಮಂಗಳೂರು : ಪೆಟ್ರೋಲ್‌ ಮತ್ತು ಡೀಸೆಲ್‌ ಮೇಲಿನ ಅಬಕಾರಿ ಸುಂಕವನ್ನು ಕಡಿತ ಮಾಡುವ ಮೂಲಕ, ಗ್ರಾಹಕರಿಗೆ ತಾತ್ಕಾಲಿಕವಾಗಿ ತುಸು ಕಡಿಮೆ ದರಕ್ಕೆ ಇಂಧನವನ್ನು ನೀಡಬಹುದಾಗಿದೆ. ದೇಶದ ನಾನಾ ರಾಜ್ಯಗಳಲ್ಲಿ ಪೆಟ್ರೋಲ್‌ ಮತ್ತು ಡೀಸೆಲ್‌ ದರಗಳಲ್ಲಿ ವ್ಯತ್ಯಾಸವಿದ್ದು, ಇವುಗಳನ್ನು ಜಿಎಸ್‌ಟಿ ವ್ಯಾಪ್ತಿಗೆ ತರಬೇಕು. ಆ ಮೂಲಕ ಗ್ರಾಹಕರಿಗೆ ನೆರವಾಗ ಬೇಕು ಎಂದು ಅಸೋಚಮ್‌ ಒತ್ತಾಯಿಸಿದೆ.

''ಕಚ್ಚಾ ತೈಲದ ದರ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಏರುತ್ತಿರುವುದು ಒಂದು ಕಡೆಯಾದರೆ, ರೂಪಾಯಿ ಮೌಲ್ಯ ದುರ್ಬಲವಾಗುತ್ತಿದೆ. ಜತೆಗೆ ಹಣದುಬ್ಬರದ ಪ್ರಭಾವದಿಂದ ದೇಶದ ಪ್ರತಿ ವ್ಯಕ್ತಿ ಮೇಲೂ ನಕಾರಾತ್ಮಕ ಪರಿಣಾಮ ಖಚಿತ. ಅಲ್ಪ ಕಾಲದಲ್ಲಿ ಈ ಪರಿಸ್ಥಿತಿಯಾದರೆ, ದೀರ್ಘಕಾಲದಲ್ಲಿ ಹೆಚ್ಚಿನ ತೊಡಕು ಖಚಿತ,'' ಎಂದು ಅಸೋಚಮ್‌ ಪ್ರಧಾನ ಕಾರ್ಯದರ್ಶಿ ಡಿ.ಎಸ್‌.ರಾವತ್‌ ಅಭಿಪ್ರಾಯಪಟ್ಟಿದ್ದಾರೆ.

''ಇಂಧನ ಸುರಕ್ಷತೆ, ಬಳಕೆ ಮತ್ತು ಪೂರೈಕೆ ಜಾಲವನ್ನು ಮರು ವಿನ್ಯಾಸ ಮಾಡಬೇಕಾಗಿದೆ. ದೇಶದ ಆರ್ಥಿಕ ಬೆಳವಣಿಗೆಯಲ್ಲಿ ಇಂಧನದ ಮೇಲಿನ ಹೆಚ್ಚಿನ ಅವಲಂಬನೆ ವ್ಯತಿರಿಕ್ತ ಪರಿಣಾಮಗಳಿಗೆ ದಾರಿಯಾಗುತ್ತದೆ,'' ಎಂದು ರಾವತ್‌ ಹೇಳಿದ್ದಾರೆ.