3,000 ಕೋಟಿ ರೂ. ಬಾಕಿ ವಸೂಲಿಗೆ ಬಿಎಸ್ಸೆನ್ನೆಲ್‌ ಸಜ್ಜು

ಹೊಸದಿಲ್ಲಿ : ನಗದು ಕೊರತೆಯಿಂದ ಬಳಲುತ್ತಿರುವ ಬಿಎಸ್ಸೆನ್ನೆಲ್‌ ನಾನಾ ಸಂಸ್ಥೆ ಹಾಗೂ ಕಂಪನಿಗಳಿಂದ ತನಗೆ ಬರಬೇಕಾಗಿರುವ 3,000 ಕೋಟಿ ರೂ. ಬಾಕಿಯನ್ನು ವಸೂಲು ಮಾಡಲು ಕಾರ್ಯಪ್ರವೃತ್ತವಾಗಿದೆ.

ಮುಂದಿನ 2-3 ತಿಂಗಳುಗಳಲ್ಲಿ ಈ ಎಲ್ಲ ಬಾಕಿಯನ್ನು ವಸೂಲು ಮಾಡಲು ಸಂಸ್ಥೆ ಉದ್ದೇಶಿಸಿದೆ. ಉದ್ಯೋಗಿಗಳ ವೇತನ ವಿತರಣೆಗೂ ಸಂಸ್ಥೆ ಹರಸಾಹಸ ಪಡುವಂತಾಗಿದೆ. ಜುಲೈ ತಿಂಗಳಿನ ವೇತನ ವಿತರಣೆ ಆಗಸ್ಟ್‌ 5ಕ್ಕೆ ವಿಳಂಬವಾಗಿ ವಿತರಿಸಲಾಗಿತ್ತು. ಬಿಎಸ್ಸೆನ್ನೆಲ್‌ 2018-19ರಲ್ಲಿ 14,000 ಕೋಟಿ ರೂ. ನಷ್ಟಕ್ಕೀಡಾಗುವ ಅಂದಾಜಿದೆ. ಆದಾಯವು 19,308 ಕೋಟಿ ರೂ.ಗೆ ಇಳಿದಿರುವುದು ಇದಕ್ಕೆ ಕಾರಣ. ಬಿಎಸ್ಸೆನ್ನೆಲ್‌ನಲ್ಲಿ ಒಟ್ಟು 1,65,179 ಮಂದಿ ಉದ್ಯೋಗಿಗಳಿದ್ದಾರೆ. ಆದಾಯದಲ್ಲಿ ಶೇ.75ರಷ್ಟು ಉದ್ಯೋಗಿಗಳ ವೇತನ ವಿತರಣೆಗೆ ಬೇಕಾಗುತ್ತದೆ. ಖಾಸಗಿ ವಲಯದ ಟೆಲಿಕಾಂ ಕಂಪನಿಗಳು ಉದ್ಯೋಗಿಗಳ ಸಲುವಾಗಿ ಮಾಡುವ ವೆಚ್ಚ ಆದಾಯದಲ್ಲಿ ಕೇವಲ ಶೇ.3ರಿಂದ ಶೇ5.5 ಮಾತ್ರ.