BSNL ಬಳಕೆದಾರರಿಗೆ ಉಚಿತವಾಗಿ ಅಮೆಜಾನ್ ಪ್ರೈಮ್ ಸೇವೆ

ಸರಕಾರಿ ಸ್ವಾಮ್ಯದ ಟೆಲಿಕಾಂ ಸಂಸ್ಥೆ ಬಿಎಸ್‌ಎನ್‍ಎಲ್ ಇತ್ತೀಚೆಗೆ ತನ್ನ ಗ್ರಾಹಕರಿಗೆ ಬೊಂಬಾಟ್ ಆಫರ್ ಪ್ರಕಟಿಸಿದೆ. ಭಾರತ್ ಫೈಬರ್ ಗ್ರಾಹಕರಿಗೆ ಅಮೆಜಾನ್ ಪ್ರೈಮ್ ಮೆಂಬರ್‌ಶಿಪ್ ಒಂದು ವರ್ಷದ ಕಾಲ ಉಚಿತವಾಗಿ ನೀಡುತ್ತಿರುವುದಾಗಿ ಘೋಷಿಸಿದೆ. ಇದರ ಬೆಲೆ 999 ರೂ. ಆದರೆ ಆಯ್ಕೆ ಮಾಡಿದ ಗ್ರಾಹಕರಿಗೆ ಮಾತ್ರ ಈ ಆಫರ್ ಅನ್ವಯಿಸುತ್ತದೆ ಎಂದು ಕಂಪೆನಿ ತಿಳಿಸಿದೆ.

ರಿಯಲಯ್ಸ್ ಜಿಯೊ ಗಿಗಾ ಫೈಬರ್ ಸೇವೆಗಳಿಗೆ ಸ್ಪರ್ಧಿಯಾಗಿ ಬಿಎಸ್‍ಎನ್‍ಎಲ್ ಕಳೆದ ತಿಂಗಳು ಭಾರತ್ ಫೈಬರ್ ಬ್ರಾಡ್‍ಬ್ಯಾಂಡ್ ಸೇವೆಗಳನ್ನು ಪ್ರಾರಂಭಿಸಿತು. ಈ ಸೇವೆಗಳು ಪ್ರಾರಂಭವಾದ ಕೆಲವು ವಾರಗಳಲ್ಲೇ ಈ ಆಫರ್ ಪ್ರಕಟಿಸಿರುವುದು ಗಮನಾರ್ಹ.

ಬಿಎಸ್‍ಎನ್‍ಎಲ್ ಫೈಬರ್ ಬ್ರಾಡ್‍ಬ್ಯಾಂಡ್ ಸೇವೆಗಳಲ್ಲಿ ನಿತ್ಯ 35 ಜಿಬಿ ಡಾಟಾ ಪಡೆಯಬಹುದು. ಕಂಪೆನಿ ಒಂದು ಜಿಬಿ ಡಾಟಾಗೆ ಕೇವಲ 1.1 ರೂ. ಚಾರ್ಜ್ ಮಾಡುತ್ತಿದೆ. ಬಿಎಸ್‍ಎನ್‌ಎಲ್ ಅದೇ ರೀತಿ ಜಿಯೊ, ಏರ್‌ಟೆಲ್‌ಗೆ ಸ್ಪರ್ಧಿಯಾಗಿ ಅರ್ಧ ವಾರ್ಷಿಕ ಬ್ರಾಡ್‌ಬ್ಯಾಂಡ್ ಸೇವೆಗಳನ್ನೂ ಸಹ ನೀಡುತ್ತಿದೆ.

ಭಾರತ್ ಫೈಬರ್ ಬ್ರಾಡ್‍ಬ್ಯಾಂಡ್‌ನಲ್ಲಿ 18 ಜಿಬಿ (777 ರೂ.) ಹಾಗೂ ಅದಕ್ಕೂ ಮೀರಿದ ಪ್ಲಾನ್‌ಗಳನ್ನು ಬಳಸುತ್ತಿರುವ ಗ್ರಾಹಕರಿಗೆ ಮಾತ್ರ ಅಮೆಜಾನ್ ಪ್ರೈಮ್ ಉಚಿತ ಸದಸ್ಯತ್ವ ಆಫರ್ ಅನ್ವಯಿಸಲಿದೆ ಎಂದು ಬಿಎಸ್‍ಎನ್‍ಎಲ್ ತಿಳಿಸಿದೆ. ಬಿಎಸ್‍ಎನ್‍ಎಲ್ ವೆಬ್‌ಸೈಟ್‌‍ನಲ್ಲಿ ಗ್ರಾಹಕರು ಈ ಆಫರ್ ಪಡೆಯಬಹುದು.

ಗ್ರಾಹಕರ ಮನರಂಜನೆ ಪ್ರಾಮುಖ್ಯತೆಯನ್ನು ಗಮನದಲ್ಲಿಟ್ಟುಕೊಂಡು, ಅವರಿಗೆ ಉತ್ತಮ ಸೇವೆಗಳನ್ನು ನೀಡಲು ವಿವಿಧ ಪ್ರಾಡಕ್ಟ್‌ಗಳನ್ನು, ತಂತ್ರಜ್ಞಾನವನ್ನು ಹೊರತರುತ್ತಿದ್ದೇವೆ ಎಂದು ಬಿಎಸ್‍ಎನ್‍ಎಲ್ ನಿರ್ದೇಶಕ (ಸಿಎಫ್‌ಎ) ವಿವೇಕ್ ಬಂಜಲ್ ತಿಳಿಸಿದ್ದಾರೆ. ಭಾರತದಲ್ಲಿ ಅಮೆಜಾನ್ ಪ್ರೈಮ್ ಸೇವೆಗಳಿಗೆ ಒಳ್ಳೆಯ ಬೇಡಿಕೆ ಇದೆ ಎಂದಿದ್ದಾರೆ.