ದೇಶದ ಮೊದಲ ಇಂಟರ್‌ನೆಟ್‌ ಟೆಲಿಫೋನಿ ಸೇವೆ ಶುರು

ಹೊಸದಿಲ್ಲಿ : ಸರಕಾರಿ ಸ್ವಾಮ್ಯದ ಬಿಎಸ್‌ಎನ್‌ಎಲ್‌, ದೇಶದ ಮೊದಲ ಇಂಟರ್‌ನೆಟ್‌ ಟೆಲಿಫೋನಿ ಸೇವೆಗೆ ಬುಧವಾರ ಚಾಲನೆ ನೀಡಿದೆ. ಬಿಎಸ್‌ಎನ್‌ಎಲ್‌ನ 'ವಿಂಗ್ಸ್‌' ಮೊಬೈಲ್‌ ಆ್ಯಪ್‌ ಬಳಸಿ, ದೇಶದ ಯಾವುದೇ ಟೆಲಿಫೋನ್‌ ನಂಬರ್‌ಗೆ ಕರೆ ಮಾಡಲು ಹೊಸ ಸೇವೆಯಲ್ಲಿ ಅವಕಾಶವಿದೆ.

ಹೊಸ ಸೇವೆಗೆ ಚಾಲನೆ ನೀಡಿ ಮಾತನಾಡಿದ ಟೆಲಿಕಾಂ ಸಚಿವ ಮನೋಜ್‌ ಸಿನ್ಹಾ, ''ಪ್ರಸ್ತುತ ಟೆಲಿಕಾಂ ಜಗತ್ತಿನಲ್ಲಿ ದೊಡ್ಡ ಸ್ಪರ್ಧೆಯೇ ಇದೆ. ಆದಾಗ್ಯೂ, ಮಾರುಕಟ್ಟೆ ಪಾಲನ್ನು ಬಿಎಸ್‌ಎನ್‌ಎಲ್‌ ಹೆಚ್ಚಿಸಿಕೊಳ್ಳುತ್ತಿದೆ. ಸಿಮ್‌ ರಹಿತವಾಗಿ ಗ್ರಾಹಕರು ಕರೆ ಮಾಡಲು ಅವಕಾಶ ಕಲ್ಪಿಸುವ ನೂತನ ಇಂಟರ್‌ನೆಟ್‌ ಟೆಲಿಫೋನಿ ಸೇವೆ ಆರಂಭಿಸಿದ ಬಿಎಸ್‌ಎನ್‌ಎಲ್‌ಗೆ ಅಭಿನಂದನೆಗಳು,'' ಎಂದಿದ್ದಾರೆ.

========

ಏನಿದು ಹೊಸ ಸೇವೆ?

ದೇಶದಲ್ಲಿ ಇಂಟರ್‌ನೆಟ್‌ ಆಧಾರಿತ ಫೋನ್‌ ಸೇವೆಗಳು ಹೊಸತೇನಲ್ಲ. ವಾಟ್ಸಾಪ್‌, ಫೇಸ್‌ಬುಕ್‌ ಮೆಸೆಂಜರ್‌ನಂಥ ಆ್ಯಪ್‌ಗಳ ಮೂಲಕವೂ ಕರೆ ಮಾಡಬಹುದು. ಆದರೆ, ಆಯಾ ಮೊಬೈಲ್‌ ಆ್ಯಪ್‌ಗಳಿಗಷ್ಟೇ ಪರಸ್ಪರ ಈ ತನಕ ಕರೆ ಮಾಡುವ ಸೌಲಭ್ಯ ಇತ್ತು. ಟೆಲಿಫೋನ್‌ ನಂಬರ್‌ಗಳಿಗೆ ಕರೆ ಮಾಡಲು ಆಗುತ್ತಿರಲಿಲ್ಲ. ಆದರೆ, ಬಿಎಸ್‌ಎನ್‌ಎಲ್‌ ಗ್ರಾಹಕರು, ನೂತನ ಇಂಟರ್‌ನೆಟ್‌ ಟೆಲಿಫೋನಿ ಸೇವೆ ಮೂಲಕ ವಿಂಗ್ಸ್‌ ಆ್ಯಪ್‌ ಬಳಸಿ, ದೇಶದ ಯಾವುದೇ ಟೆಲಿಫೋನ್‌ಗೆ ಬೇಕಾದರೂ ಕರೆ ಮಾಡಬಹುದು.

=======

* ಬಿಎಸ್‌ಎನ್‌ಎಲ್‌ ವೈ-ಫೈ ಅಥವಾ ಬೇರೆ ಇನ್ನಾವುದೇ ಕಂಪನಿಯ ಸೇವೆ ಬಳಸಿ ದೇಶದ ಯಾವುದೇ ನೆಟ್‌ವರ್ಕ್‌ಗೆ ಬೇಕಾದರೂ ಗ್ರಾಹಕರು ಕರೆ ಮಾಡಬಹುದು.

* ಹೊಸ ಸೇವೆಗೆ ನೋಂದಣಿಯು ಈ ವಾರ ಆರಂಭಗೊಳ್ಳುತ್ತದೆ. ಸೇವೆಯು ಜು.25ರಿಂದ ಶುರುವಾಗಲಿದೆ.

* ಸಾಮಾನ್ಯ ಕರೆಗಳಿಗೆ ಅನ್ವಯವಾಗುವ ನಿಯಮ ಮತ್ತು ಶುಲ್ಕಗಳು ಬಿಎಸ್‌ಎನ್‌ಎಲ್‌ನ ಇಂಟರ್‌ನೆಟ್‌ ಟೆಲಿಫೋನಿ ಸೇವೆಗೂ ಅನ್ವಯ.