ಆರ್‌ಕಾಮ್‌ನಿಂದ ಬಾಕಿ ವಸೂಲಿಗೆ ಬಿಎಸ್‌ಎನ್‌ಎಲ್‌ ಯತ್ನ

ಹೊಸದಿಲ್ಲಿ: ಅನಿಲ್‌ ಅಂಬಾನಿ ನೇತೃತ್ವದ ರಿಲಯನ್ಸ್‌ ಕಮ್ಯುನಿಕೇಷನ್ಸ್‌ನಿಂದ(ಆರ್‌ಕಾಮ್‌) ಬರಬೇಕಾದ 700 ಕೋಟಿ ರೂ.ಗಳ ಬಾಕಿ ವಸೂಲಿಗೆ ಬಿಎಸ್‌ಎನ್‌ಎಲ್‌ ಪ್ರಯತ್ನ ನಡೆಸಿದೆ. ಈ ಬಗ್ಗೆ ರಾಷ್ಟ್ರೀಯ ಕಂಪನಿ ಕಾಯ್ದೆಯ ನ್ಯಾಯಮಂಡಳಿಗೆ(ಎನ್‌ಸಿಎಲ್‌ಟಿ) ಬಿಎಸ್‌ಎನ್‌ಎಲ್‌ ಮೊರೆ ಹೋಗಿದೆ ಎಂದು ಮೂಲಗಳು ತಿಳಿಸಿವೆ.

ಸಾಲದ ಹೊರೆ ಹೊತ್ತಿರುವ ಆರ್‌ಕಾಮ್‌, ಎನ್‌ಸಿಎಲ್‌ಎಟಿ ಮುಂದೆ ದಿವಾಳಿ ಪ್ರಕ್ರಿಯೆಯ ಅರ್ಜಿಯನ್ನು ಇಟ್ಟಿದೆ. ಏತನ್ಮಧ್ಯೆ, ತನ್ನ ಬಾಕಿ ವಸೂಲಿಗೆ ಬಿಎಸ್‌ಎನ್‌ಎಲ್‌ ಮುಂದಾಗಿದೆ.

ಎರಿಕ್ಸನ್‌ ಕಂಪನಿಗೆ 550 ಕೋಟಿ ರೂ. ಪೈಕಿ 453 ಕೋಟಿ ರೂ. ಅನ್ನು ತಕ್ಷಣಕ್ಕೆ ಪಾವತಿಸಬೇಕಾದ ಒತ್ತಡದಲ್ಲಿ ಆರ್‌ಕಾಮ್‌ ಇದೆ. ''ಮಾ.19ರೊಳಗೆ ಎರಿಕ್ಸನ್‌ಗೆ ಬಾಕಿ ಪಾವತಿಸಿ, ಇಲ್ಲವೇ ಮೂರು ತಿಂಗಳ ಜೈಲು ಶಿಕ್ಷೆ ಅನುಭವಿಸಲು ಸಿದ್ಧರಾಗಿರಿ'' ಎಂದು ಆರ್‌ಕಾಮ್‌ ಅಧ್ಯಕ್ಷ ಅನಿಲ್‌ ಅಂಬಾನಿಗೆ ಸುಪ್ರೀಂ ಕೋರ್ಟ್‌ ಈಗಾಗಲೇ ಎಚ್ಚರಿಸಿದೆ. ಪ್ರಕರಣದ ಮುಂದಿನ ವಿಚಾರಣೆ ಏ.8ರಂದು ನಡೆಯಲಿದೆ.