ಫ್ಲ್ಯಾಟ್‌ ವಿತರಣೆಯಲ್ಲಿ ವಿಳಂಬ: ಸುಪ್ರೀಂ ಚಾಟಿ

ಹೊಸದಿಲ್ಲಿ: ಫ್ಲ್ಯಾಟ್‌ ವಿತರಣೆಯಲ್ಲಿ ಗ್ರಾಹಕರಿಗೆ ದೀರ್ಘ ವಿಳಂಬ ಆಗಬಾರದು. ಹಣ ಕೊಟ್ಟು ಖರೀದಿ ಮಾಡಿದ ಗ್ರಾಹಕರು ಫ್ಲ್ಯಾಟ್‌ಗಾಗಿ ಅನಿರ್ದಿಷ್ಟ ಕಾಲ ಕಾಯುವಂತೆ ಆಗಬಾರದು ಎಂದು ಸುಪ್ರೀಂ ಕೋರ್ಟ್‌ ಹೇಳಿದೆ.

ಗ್ರಾಹಕರೊಬ್ಬರಿಗೆ ಫ್ಲ್ಯಾಟ್‌ನ ಹಸ್ತಾಂತರಕ್ಕೆ 7 ವರ್ಷ ವಿಳಂಬವಾಗಿದ್ದಕ್ಕೆ ಸಂಬಂಧಿಸಿದಂತೆ ರಾಜ್ಯ ಗ್ರಾಹಕ ಹಕ್ಕುಗಳ ಆಯೋಗದ ಆದೇಶವನ್ನು ಸುಪ್ರೀಂ ಕೋರ್ಟ್‌ ಎತ್ತಿ ಹಿಡಿದಿದೆ. ಬಿಲ್ಡರ್‌ ಕೋಲ್ಕೊತಾ ವೆಸ್ಟ್‌ ಇಂಟರ್‌ನ್ಯಾಷನಲ್‌ ಸಿಟಿ ಪ್ರೈವೇಟ್‌ ಲಿಮಿಟೆಡ್‌ ಕಂಪನಿಯ ವಿರುದ್ಧ ಗ್ರಾಹಕರೊಬ್ಬರು ಕೋರ್ಟ್‌ನ ಮೊರೆ ಹೋಗಿದ್ದರು. ಈ ಬಗ್ಗೆ ವಿಚಾರಣೆ ನಡೆಸಿದ ಸುಪ್ರೀಂ ಕೋರ್ಟ್‌ ನ್ಯಾಯಮೂರ್ತಿ ಡಿ.ವೈ.ಚಂದ್ರಚೂಡ್‌ ಮತ್ತು ಹೇಮಂತ್‌ ಮೆಹ್ತಾ ನೇತೃತ್ವದ ನ್ಯಾಯಪೀಠವು ಮಹತ್ವದ ಆದೇಶವನ್ನು ನೀಡಿದೆ. ಈ ಪ್ರಕರಣದಲ್ಲಿ ಗ್ರಾಹಕರು 2006ರಲ್ಲಿ 39 ಲಕ್ಷ ರೂ. ಪಾವತಿಸಿದ್ದರು. 2008ರ ಡಿಸೆಂಬರ್‌ 31ರಂದು ಫ್ಲ್ಯಾಟ್‌ ಹಸ್ತಾಂತರಿಸುವ ಒಪ್ಪಂದವಾಗಿತ್ತು. ಆದರೆ ಸಕಾಲಕ್ಕೆ ಹಸ್ತಾಂತರಿಸದ ಕಾರಣ, ರಾಜ್ಯ ಗ್ರಾಹಕ ಹಕ್ಕುಗಳ ಆಯೋಗಕ್ಕೆ ಅರ್ಜಿ ಸಲ್ಲಿಸಿದ್ದರು. ಶೇ.12ರ ಬಡ್ಡಿಯೊಂದಿಗೆ ಗ್ರಾಹಕರಿಗೆ ಹಣವನ್ನು ಮರಳಿಸುವಂತೆ ಆಯೋಗ ಆದೇಶ ನೀಡಿತ್ತು. ಅಲ್ಲದೇ, 5 ಲಕ್ಷ ರೂ. ಪರಿಹಾರ ನೀಡಲು ಬಿಲ್ಡರ್‌ಗೆ ಸೂಚಿಸಿತ್ತು. ಈ ತೀರ್ಪನ್ನು ಸುಪ್ರೀಂ ಕೋರ್ಟ್‌ ಎತ್ತಿ ಹಿಡಿದಿದೆ.