ಬಿಒಬಿ ಜತೆ ವಿಜಯ, ದೇನಾ ಬ್ಯಾಂಕ್‌ ವಿಲೀನಕ್ಕೆ ಸಂಪುಟ ಅಸ್ತು

ಹೊಸದಿಲ್ಲಿ : ಬ್ಯಾಂಕ್‌ ಆಫ್‌ ಬರೋಡಾ (ಬಿಒಬಿ) ಜತೆಗೆ ವಿಜಯ ಬ್ಯಾಂಕ್‌ ಹಾಗೂ ದೇನಾ ಬ್ಯಾಂಕ್‌ಗಳನ್ನು ವಿಲೀನಗೊಳಿಸಲು ಕೇಂದ್ರ ಸಚಿವ ಸಂಪುಟ ಬುಧವಾರ ಒಪ್ಪಿಗೆ ನೀಡಿದೆ. ಇದರೊಂದಿಗೆ ಎಸ್‌ಬಿಐ, ಐಸಿಐಸಿಐ ಬ್ಯಾಂಕ್‌ ನಂತರ ದೇಶದ ಮೂರನೇ ಅತಿ ದೊಡ್ಡ ಬ್ಯಾಂಕ್‌ ಆಗಿ ಬ್ಯಾಂಕ್‌ ಆಫ್‌ ಬರೋಡಾ ಹೊರಹೊಮ್ಮಲಿದೆ.

ಏಪ್ರಿಲ್‌ 1ರಿಂದ ವಿಲೀನ ಜಾರಿಯಾಗಲಿದ್ದು, ಇದೇ ಮೊದಲ ಸಲ ಭಾರತೀಯ ಬ್ಯಾಂಕಿಂಗ್‌ ಇತಿಹಾಸದಲ್ಲಿ ಮೂರು ಬ್ಯಾಂಕ್‌ಗಳ ವಿಲೀನ ನಡೆಯುತ್ತಿದೆ. ಈ ಹಿಂದೆ ಎಸ್‌ಬಿಐ ಹಾಗೂ ಅದರ ಅಧೀನ ಬ್ಯಾಂಕ್‌ಗಳ ವಿಲೀನವಾಗಿತ್ತು. ಆದರೆ ಇದು ಮೂರು ಪ್ರತ್ಯೇಕ ಬ್ಯಾಂಕ್‌ಗಳ ವಿಲೀನವಾಗಿದೆ.

ಈ ಬಗ್ಗೆ ವಿವರ ನೀಡಿದ ಕೇಂದ್ರ ಸಚಿವ ರವಿ ಶಂಕರ್‌ ಪ್ರಸಾದ್‌, ವಿಲೀನದಿಂದ ಮೂರೂ ಬ್ಯಾಂಕ್‌ಗಳ ಉದ್ಯೋಗಿಗಳ ಸ್ಥಿತಿಗತಿಯ ಮೇಲೆ ಯಾವುದೇ ನಕಾರಾತ್ಮಕ ಪರಿಣಾಮ ಉಂಟಾಗುವುದಿಲ್ಲ ಎಂದರು. ಬಿಒಬಿ ದೊಡ್ಡ ಬ್ಯಾಂಕ್‌ ಆಗುವುದರಿಂದ ಜಾಗತಿಕ ಮಟ್ಟದಲ್ಲಿ ಅದರ ಸ್ಪರ್ಧಾತ್ಮಕತೆ ಹೆಚ್ಚಲಿದೆ ಎಂದರು.