ಕೆನರಾ ಬ್ಯಾಂಕ್‌ಗೆ 4,859 ಕೋಟಿ ರೂ. ನಷ್ಟ

ಹೊಸದಿಲ್ಲಿ: ಸಾರ್ವಜನಿಕ ವಲಯದ ಕೆನರಾಬ್ಯಾಂಕ್‌, ಮಾರ್ಚ್‌ 31ಕ್ಕೆ ಅಂತ್ಯವಾದ ತನ್ನ ತ್ರೈಮಾಸಿಕ ಫಲಿತಾಂಶವನ್ನು ಶುಕ್ರವಾರ ಪ್ರಕಟಿಸಿದ್ದು, 4859 ಕೋಟಿ ರೂ. ನಷ್ಟಕ್ಕೀಡಾಗಿದೆ. ವಸೂಲಾಗದ ಸಾಲದ ಬಾಬ್ತು ಬ್ಯಾಂಕ್‌ ಭಾರಿ ಮೊತ್ತವನ್ನು ತೆಗೆದಿಟ್ಟಿರುವುದರಿಂದ ನಷ್ಟಕ್ಕೀಡಾಗಿದೆ. ವರ್ಷದ ಹಿಂದೆ ಇದೇ ಅವಧಿಯಲ್ಲಿ 214 ಕೋಟಿ ರೂ. ಲಾಭದಲ್ಲಿತ್ತು. ಡಿಸೆಂಬರ್‌ ತ್ರೈಮಾಸಿಕದಲ್ಲೂ 126 ಕೋಟಿ ರೂ. ನಿವ್ವಳ ಲಾಭ ಗಳಿಸಿತ್ತು.

ಕೆನರಾ ಬ್ಯಾಂಕ್‌ನ ನಿವ್ವಳ ಬಡ್ಡಿ ಆದಾಯವು ಜನವರಿ-ಮಾರ್ಚ್‌ ಅವಧಿಯಲ್ಲಿ 2,987 ಕೋಟಿ ರೂ.ಗಳಾಗಿದ್ದು, 10 ಪರ್ಸೆಂಟ್‌ ಏರಿಕೆಯಾಗಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ 2,708 ಕೋಟಿ ರೂ. ಇತ್ತು.

ಕೆನರಾ ಬ್ಯಾಂಕ್‌ ಎನ್‌ಪಿಎ ನಿರ್ವಹಣೆಯ ಸಲುವಾಗಿ 9,075 ಕೋಟಿ ರೂ.ಗಳನ್ನು ಮಾರ್ಚ್‌ ತ್ರೈಮಾಸಿಕದಲ್ಲಿ ತೆಗೆದಿಟ್ಟಿದ್ದು, ಕಳೆದ ವರ್ಷದ ಇದೇ ಅವಧಿಯಲ್ಲಿ 2,708 ಕೋಟಿ ರೂ. ತೆಗೆದಿಟ್ಟಿತ್ತು. ಬ್ಯಾಂಕ್‌ನ ಎನ್‌ಪಿಎ (ಅನುತ್ಪಾದಕ ಅಥವಾ ವಸೂಲಾಗದ ಸಾಲ) ಶೇ.6.78ರಿಂದ ಶೇ.7.48ಕ್ಕೆ ಏರಿಕೆಯಾಗಿದೆ.

ಕೆನರಾ ಬ್ಯಾಂಕ್‌ 2015ರಲ್ಲಿ ಬ್ಯಾಲೆನ್ಸ್‌ಶೀಟ್‌ ಸ್ವಚ್ಛಗೊಳಿಸುವ ಕಾರ್ಯ ಆರಂಭಿಸಿದ್ದು, ನಂತರ ಸಾರ್ವಜನಿಕ ಬ್ಯಾಂಕ್‌ಗಳ ವಲಯದಲ್ಲಿ ಎರಡನೇ ಅತಿ ದೊಡ್ಡ ತ್ರೈಮಾಸಿಕ ನಷ್ಟ ಇದಾಗಿದೆ. 2016ರ ಮಾರ್ಚ್‌ ತ್ರೈಮಾಸಿಕದಲ್ಲಿ ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್‌ 5,367 ಕೋಟಿ ರೂ. ನಷ್ಟ ದಾಖಲಿಸಿತ್ತು.